Адразу некалькі чытачоў з Дзяржынска паведамілі, што ноччу ў сваёй кватэры быў затрыманы стваральнік некалькіх лакальных Telegram-чатаў (адзін з іх да гэтага моманту ўжо быў выдалены). Акрамя таго, ператрусы і агляды прайшлі ў іншых актывістаў раёна, піша Tut.by.
Сёння ў Tut.by звярнуўся мясцовы жыхар, які сам калісьці быў адміністратарам аднаго з супольнасцяў жыхароў Дзяржынска ў Telegram. Ён распавёў, што «за ноч зніклі Telegram-чаты «Стройка Дзяржынск» (аб'явы будаўнічай тэматыкі), «Дзе ДАІ. Дзяржынск і раён» і «Сітуацыя на дарогах (Мачулішчы — Гатава)».
«У першых двух дакладна адмінам была дзяўчына Аксана. Яна была затрыманая ўначы работнікамі Дзяржынскага РАУС», — дадаў мужчына.
Замест групы, прысвечанай перасоўванням ДАІ ў Дзяржынску, у Telegram стварылі новую суполку.
Аказалася, што гэтай ноччу была затрыманая не толькі Аксана, але і яе муж Уладзімір, які калісьці стварыў чаты «Дзяржынск City» і ўжо згаданы «ДАІ.Дзяржынск», але ўжо «адышоў ад спраў». Калі дакладней, то адміністратар цяперашняга чата «Дзяржынск city» знаходзіцца за межамі Беларусі — Уладзімір адміністраваў ранейшы чат на больш чым тры тысячы чалавек, які быў выдалены яшчэ ў пачатку кастрычніка 2020 года.
Затрыманне Уладзіміра пацвердзілі яго сястра і яшчэ адзін адміністратар лакальнага чата Дзяржынска. Па іх словах, ноччу сілавікі прыйшлі ў кватэру мужа і жонкі, «ледзь не выламалі дзверы«,» напалохалі дзяцей, канфіскавалі ўсю тэхніку» і забралі Уладзіміра (Аксана цяпер ужо дома).
Паводле непацверджаных звестак, Уладзіміра абвінавачваюць у падпале адміністрацыйнага будынка ў Фаніпалі, але, як сказалі ў сям'і, «ён у Фаніпалі быў апошні раз гадоў пяць таму». Цяпер мужчына пад вартай.
Яшчэ адзін мясцовы жыхар, актывіст, які папрасіў не паказваць яго імя, распавёў, што ўвечары 11 сакавіка ў раёне 16.00 пачаліся ператрусы і агляды ў многіх актывістаў Дзяржынскага раёна.
— Агулам затрыманыя дзевяць чалавек. Некаторыя былі з пацверджаным дыягназам «кавід» і тэмпературай, - сцвярджае ён. — Прычыны ва ўсіх розныя. Кагосьці па адміністрацыйных, кагосьці па крымінальнай (спроба падпалу Фаніпальскага выканкама), у іншых ператрусы па гэтай справе праходзілі яшчэ ў кастрычніку. Яшчэ ёсць затрыманы па справе аб надпісах на плоце ў вёсцы Петкавічы.
Актывіст сцвярджае, што працавалі дзве групы сілавікоў на мікрааўтобусах з нумарамі шостага і сёмага рэгіёну — падчас ператрусаў яны шукалі «нейкае адзенне, сімволіку, літаратуру, канфіскоўвалі тэхніку».
— Наш РАУС заўсёды выдае розную інфармацыю, перадачы да суда не прымаюць. Усе затрыманыя ў ІЧУ Дзяржынска, аднаго адпусцілі — ён праходзіў сведкам па справе аб падпале Фаніпальскага выканкама, у яго канфіскаваны тэлефон, чалавек цяпер шпіталізаваны — дадае суразмоўца. — Стваральнік ранейшых чатаў «Дзяржынск city» і «ДАІ. Дзяржынск» таксама трапіў у ІЧУ, быў дапытаны па вышэйпаказанай крымінальнай справе. У яго канфіскаваная тэхніка, сям'я ў шоку.
У Дзяржынскім раённым аддзеле ўнутраных спраў паведамілі «што «не ўпаўнаважаныя даваць каментары». У прэс-службе МУС сказалі, што раскажуць пра ўсё пазней.
Каментары