U Dziaržynsku prajšli šmatlikija palityčnyja zatrymańni

Siońnia ŭ Tut.by źviarnuŭsia miascovy žychar, jaki sam kaliści byŭ administrataram adnaho z supolnaściaŭ žycharoŭ Dziaržynska ŭ Telegram. Jon raspavioŭ, što «za noč źnikli Telegram-čaty «Strojka Dziaržynsk» (abjavy budaŭničaj tematyki), «Dzie DAI. Dziaržynsk i rajon» i «Situacyja na darohach (Mačuliščy — Hatava)».

«U pieršych dvuch dakładna adminam była dziaŭčyna Aksana. Jana była zatrymanaja ŭnačy rabotnikami Dziaržynskaha RAUS», — dadaŭ mužčyna.

Zamiest hrupy, pryśviečanaj pierasoŭvańniam DAI ŭ Dziaržynsku, u Telegram stvaryli novuju supołku.

Akazałasia, što hetaj nočču była zatrymanaja nie tolki Aksana, ale i jaje muž Uładzimir, jaki kaliści stvaryŭ čaty «Dziaržynsk City» i ŭžo zhadany «DAI.Dziaržynsk», ale ŭžo «adyšoŭ ad spraŭ». Kali dakładniej, to administratar ciapierašniaha čata «Dziaržynsk city» znachodzicca za miežami Biełarusi — Uładzimir administravaŭ raniejšy čat na bolš čym try tysiačy čałaviek, jaki byŭ vydaleny jašče ŭ pačatku kastryčnika 2020 hoda.

Zatrymańnie Uładzimira paćvierdzili jaho siastra i jašče adzin administratar łakalnaha čata Dziaržynska. Pa ich słovach, nočču siłaviki pryjšli ŭ kvateru muža i žonki, «ledź nie vyłamali dźviery«,» napałochali dziaciej, kanfiskavali ŭsiu techniku» i zabrali Uładzimira (Aksana ciapier užo doma).

Pavodle niepaćvierdžanych źviestak, Uładzimira abvinavačvajuć u padpale administracyjnaha budynka ŭ Fanipali, ale, jak skazali ŭ siamji, «jon u Fanipali byŭ apošni raz hadoŭ piać tamu». Ciapier mužčyna pad vartaj.

Jašče adzin miascovy žychar, aktyvist, jaki paprasiŭ nie pakazvać jaho imia, raspavioŭ, što ŭviečary 11 sakavika ŭ rajonie 16.00 pačalisia pieratrusy i ahlady ŭ mnohich aktyvistaŭ Dziaržynskaha rajona.

— Ahułam zatrymanyja dzieviać čałaviek. Niekatoryja byli z paćvierdžanym dyjahnazam «kavid» i tempieraturaj, - śćviardžaje jon. — Pryčyny va ŭsich roznyja. Kahości pa administracyjnych, kahości pa kryminalnaj (sproba padpału Fanipalskaha vykankama), u inšych pieratrusy pa hetaj spravie prachodzili jašče ŭ kastryčniku. Jašče jość zatrymany pa spravie ab nadpisach na płocie ŭ vioscy Pietkavičy.

Aktyvist śćviardžaje, što pracavali dźvie hrupy siłavikoŭ na mikraaŭtobusach z numarami šostaha i siomaha rehijonu — padčas pieratrusaŭ jany šukali «niejkaje adzieńnie, simvoliku, litaraturu, kanfiskoŭvali techniku».

— Naš RAUS zaŭsiody vydaje roznuju infarmacyju, pieradačy da suda nie prymajuć. Usie zatrymanyja ŭ IČU Dziaržynska, adnaho adpuścili — jon prachodziŭ śviedkam pa spravie ab padpale Fanipalskaha vykankama, u jaho kanfiskavany telefon, čałaviek ciapier špitalizavany — dadaje surazmoŭca. — Stvaralnik raniejšych čataŭ «Dziaržynsk city» i «DAI. Dziaržynsk» taksama trapiŭ u IČU, byŭ dapytany pa vyšejpakazanaj kryminalnaj spravie. U jaho kanfiskavanaja technika, siamja ŭ šoku.

U Dziaržynskim rajonnym adździele ŭnutranych spraŭ paviedamili «što «nie ŭpaŭnavažanyja davać kamientary». U pres-słužbie MUS skazali, što raskažuć pra ŭsio paźniej.

• 0
• 0
• 0
• 0
• 0
• 0
• 0
• 0