«Гэта не значыць, што я не патрыёт». Загадчыца кафедры журфака БДУ апраўдваецца за адпачынак у Еўропе
Летам загадчыца кафедры тэлебачання і радыёвяшчання журфака БДУ Алеся Кузьмінава паехала ў Еўропу — у Італію і Аўстрыю. Здавалася б, нічога дзіўнага ў такім адпачынку. Але ў гэтай гісторыі ёсць пару цікавых дэталяў.
«Калі я выехала на 7 дзён у Еўропу, гэта не значыць, што я не патрыёт сваёй краіны. Гэта ўсё, што я вам хацела сказаць. Прывітанне блогерам. Калі шчыра, ашаломленая. Мусіць, час пазнаёміцца асабіста. Скажыце мне гэта ўсё ў твар», — апраўдвалася выкладчыца ў сацсетках за вандроўку.
Цікава, што раней Кузьмінава выкладала пост, у якім пісала: «Не трэба нам Ніца, не трэба нам Каны, у нас ёсць сталіца і тэлеэкраны! «Тэлевяршыня» — сканцэнтраваная энергія. Як жа рада была ўсіх бачыць!»
Чаму для адпачынку загадчыца кафедры не абрала сталіцу Беларусі — застаецца здагадвацца.
Вядомы выпадкі, калі ў 2020-м выкладчыца ціснула на студэнтаў, якія адкрыта выказвалі сваю пазіцыю аб тым, што адбываецца ў краіне, пагражала адлічэннем.
«У 2020-м спачатку загаварыла аб тым, што ніхто з датычных да пратэстаў не знойдзе працу, потым ужо і на праблемы ва ўніверсітэце стала намякаць, — расказвае адзін з яе былых студэнтаў. — Калі студэнты на самім журфаку пратэставалі, яна з нашай групай выхаваўчую гутарку праводзіла і пагражала, што ў яе ёсць спіс тых, хто пайшоў на забастоўку 1 верасня і ў іх будуць складанасці на сесіі, калі яны «не возьмуцца за галаву».
Потым адкрытым тэкстам казала, што мае гісторыі ў інстаграм глядзяць «там, дзе трэба», а ў мяне яшчэ размеркаванне, трэба маўчаць, а то сашлюць у вёску. Потым на парах пачала рэгулярна за БТ заступацца».
У 2022-м Кузьмінава, кажуць, прымушала студэнтаў галасаваць на рэферэндуме. Аднаму з іх паставіла ўмову: ці ён галасуе датэрмінова, ці ў яго будуць праблемы з размеркаваннем. Хлопец доўга адпіраўся, пасля чаго загадчыца кафедры скінула яму сэлфі з дэканам факультэта са словамі «думаем пра вас».
«Калі мяне з-за антываенных навінаў звольнілі з радыё, яна выклікала на гутарку і пачала казаць, што ў мяне не будзе нармальнага размеркавання, што за мной і так «сачылі», а зараз наогул трэба хадзіць і аглядацца, што мне трэба адлічвацца, каб я «не ганьбіў БДУ».
Яшчэ я ўсе курсавыя пісаў пра «Еўрабачанне» і збіраўся дыплом аб ім рабіць. Але яна мне забараніла, бо гэта еўрапейскі праект, які, па яе словах, «выступае супраць Беларусі». І дала тэму наратываў на БТ, каб я пісаў, які там цудоўны сторытэлінг і якія там прафесіяналы», — падзяліўся былы студэнт.
Каментары
Мы пра гэта вам хлусім з экранаў
Ну а самі канаем у Каны,
Покуль гэта не бачаць паханы.