Удалося пацвердзіць асобу беларуса, узятага ў палон брыгадай хуткага рэагавання Нацыянальнай гвардыі Украіны. Палоннага завуць Андрэй Герыловіч, яму 34 гады, паведамляе Беларускі расследавальніцкі цэнтр.
На відэа ён крытыкуе сваіх камандзіраў і абвінавачвае іх.
Вось што пра яго вядома. Ён родам з вёскі Заспа Рэчыцкага раёна. Пасля школы працаваў у мясцовым калгасе «Савецкая Беларусь».
Затым служыў прапаршчыкам у вайсковай часці № 68473 у Калодзішчах (86-я брыгада сувязі). Далей працаваў альпіністам-мантажнікам у прыватнай фірме.
Яго жонка адмовілася ад каментароў.
Апазнаць Герыловіча дапамаглі «Кіберпартызаны». Дарадца міністра ўнутраных спраў Украіны Антон Герашчанка пацвердзіў ягоную асобу. «Пацвярджаю. Гэта ён», — напісаў ён у адказ на запыт.
Герашчанка не ведае абставіны палону Герыловіча, але, з ягоных слоў, яго віна — гэта «ўдзел у злачыннай вайне супраць Украіны».
20 лістапада брыгада хуткага рэагавання Нацыянальнай гвардыі Украіны размясціла ў сваім тэлеграм-канале відэа з палонным наймітам з ПВК «Вагнер». Па даных Нацгвардыі, баец мае пазыўны «Заспа» (што супадае з назвай яго роднай вёскі), ён прымаў непасрэдны ўдзел у баявых дзеяннях супраць Украіны, у прыватнасці, карэктуючы артылерыю расійскіх наймітаў.
Каментары