У тэатры імя Горкага працягваецца капітальны рамонт. Як зменіцца будынак ФОТА
Пад абшыўкай над балконам захавалася старое скляпенне з аўтэнтычнымі роспісамі. У будынку таксама аднаўляюць маўрытанскую муроўку, рэстаўрыруюць люстру вагой больш за паўтоны і рыхтуюць сцэну, з-пад якой змогуць з’яўляцца акторы.
Капітальны рамонт тэатра імя Максіма Горкага ў Мінску набліжаецца да завяршэння, пішуць «Мінск-Навіны». Калектыў працуе па-за сценамі свайго тэатра ўжо больш за два гады.
Будынак пачалі ўзводзіць у 1902 годзе як харальную сінагогу ў маўрытанскім стылі. Пасля вайны яго перадалі рускаму драматычнаму тэатру. Перабудова 1950‑х істотна змяніла фасад: замест вялікай аркі з’явіўся порцік з шасцю калонамі і трохкутным франтонам.
Цяпер частку старых архітэктурных дэталяў зноў адкрываюць.
Пад тынкоўкай захавалася дэкаратыўная муроўка з чаргаваннем рознакаляровай цэглы. Яе ачысцілі і адрэстаўравалі. На першым паверсе аднавілі два раней закладзеныя вокны, захаваўшы іх гістарычныя памеры.
Бакавыя сцены пафарбавалі ў тэракотавы колер — адценне старой цэглы падбіралі з дапамогай фізіка-хімічных даследаванняў. А граніт на прыступках галоўнага ўвахода замест цёмна-шэрага стаў чырвона-карычневым.
Паводле архіўных фотаздымкаў адновяць слупы агароджы сінагогі. Цяпер іх будуць выкарыстоўваць як тэатральныя афішныя тумбы.
Каля фундамента таксама знайшлі рэшткі старой брукаванкі — пры добраўпарадкаванні тэрыторыі пакладуць плітку, якая яе імітуе.
У глядзельнай зале аднавілі цыліндрычнае скляпенне з ляпнінай і роспісам 1904 года. Для ўзнаўлення малюнка выкарыстоўвалі спецыяльныя трафарэты, а склад старой грунтоўкі і фарбы папярэдне даследавалі.
Нечаканую знаходку зрабілі над балконам: пасля дэмантажу абшыўкі там адкрылася яшчэ адно аўтэнтычнае распісное скляпенне. Яго таксама змогуць убачыць гледачы.
Месцаў у зале стане менш праз сучасныя патрабаванні пажарнай бяспекі. Затое пад кожным крэслам прадугледжаная вентыляцыя, а частку сцен абліцавалі панэлямі для паляпшэння акустыкі.
Абсталяванне сцэны аўтаматызавалі: дэкарацыямі, заслонамі і святлом будуць кіраваць з пульта.
З’явіліся і два спецыяльныя люкі, праз якія можна будзе апускацца пад сцэну або з’яўляцца з-пад яе.
«Прадугледжаны новы насціл сцэны — важны элемент для артыстаў. Ён павінен быць роўным і трывалым, бо на ім усталёўваюць дэкарацыі. Часам падчас спектакля па сцэне ездзяць некалькі тон», — расказала дырэктарка тэатра Наталля Грамыка.
Вялізную люстру вырашылі рэстаўраваць на месцы: яна важыць больш за 500 кілаграмаў. Майстры працуюць з рыштаванняў — чысцяць крыштальныя элементы і аднаўляюць на металічных дэталях пакрыццё сусальным золатам.
У фае ўсталююць скульптуру Максіма Горкага на поўны рост. Над ёй працуюць выкладчыкі Беларускай дзяржаўнай акадэміі мастацтваў.
Будаўніча-мантажныя работы плануюць скончыць да канца восені, пасля пачнуць наладжваць абсталяванне. Да новага святла і гуку трэба будзе адаптаваць усе 32 спектаклі рэпертуару.
«Калі ўсё складзецца добра, з канца зімы — пачатку вясны 2027 года пачнём паказваць спектаклі ў абноўленым будынку», — паведаміла Грамыка.
Першым плануюць сыграць «Графа Монтэ-Крыста».
Каментары