Новы генсак НАТА выступіў за права Украіны наносіць дальнабойныя ўдары па Расіі
Былы прэм'ер-міністр Нідэрландаў Марк Рутэ на другі дзень пасля свайго ўступлення на пасаду генеральнага сакратара НАТА адправіўся ў Кіеў і заявіў, што Украіна павінна мець магчымасць абстрэльваць расійскую тэрыторыю дальнабойнымі заходнімі ракетамі.
«Украіна, безумоўна, мае права на самаабарону, і міжнароднае права тут на яе баку», — заявіў новы кіраўнік Паўночнаатлантычнага альянсу, выступаючы на прэс-канферэнцыі разам з прэзідэнтам Украіны Уладзімірам Зяленскім.
Пры гэтым права Украіны на самаабарону, па словах Рутэ, «не заканчваецца на мяжы»: Расія вядзе незаконную вайну, і гэта азначае, што нанясенне ўдараў па расійскіх знішчальніках і ракетах да таго, як яны могуць быць выкарыстаныя супраць грамадзянскай інфраструктуры Украіны, можа дапамагчы выратаваць жыцці людзей.
Зяленскі сказаў, што выклаў Рутэ элементы свайго «плана Перамогі», які ён нядаўна падаў прэзідэнту ЗША Джо Байдэну і абмяркоўваў з лідарамі іншых краін падчас візіту ў Злучаныя Штаты. Галоўнае палажэнне гэтага плана — даць Украіне больш сучаснай зброі.
У Кіеве Зяленскі ў чарговы раз заклікаў дапамагчы Украіне не толькі ў абароне, але і ў наступленні, зняўшы забарону на прымяненне дальнабойных ракет, такіх як ATACMS і Storm Shadow.
«Вядома, мы хочам, каб Украіна не была забытая. Але найлепшы спосаб не забыцца пра Украіну — даць адпаведную зброю і неабходныя дазволы. І дапамагчы збіваць… тыя ж іранскія ракеты або беспілотнікі; як яны збіваюцца над Ізраілем — каб сапраўды гэтак жа сама іх збівалі і над Украінай», — сказаў Зяленскі, маючы на ўвазе дапамогу заходніх краін у адбіцці іранскіх удараў ракетамі па Ізраілю.
Нягледзячы на некалькі тыдняў абмеркавання тэмы дальнабойных ракет, Джо Байдэн пакуль не даў згоды на іх прымяненне для ўдараў углыб Расіі, лідары якой зноў сталі пагражаць прымяненнем ядзернай зброі ў выпадку перасячэння чарговых чырвоных ліній.
Але Марк Рутэ ў Кіеве заявіў:
«Адзіная краіна тут, якая перасекла чырвоную лінію, — гэта не Украіна, гэта Расія».
Цяпер чытаюць
Што вядома пра затрыманых радыёаматараў, якім пагражае аж да расстрэлу5
Каментары