У сераду-чацвер беларуская тэма стане прадметам абмеркавання ў Еўрапарламенце.
У сераду-чацвер беларуская тэма стане прадметам абмеркавання ў Еўрапарламенце. Узяць удзел у ім запрошаныя старшыня Саюза палякаў Беларусі Анжаліка Борыс і старшыня Руху за Свабоду Аляксандр Мілінкевіч.
У Брусэлі яны адзінадушна выступілі супраць увядзення санкцый супраць Беларусі і за адкрытасць ЕС да беларускага грамадства.
«Ёсць заклікі да ўвядзення санкцый. Але я як грамадзянка Беларусі ад 2005 году ніколі не заклікала да іх увядзення. Я перакананая, што трэба забяспечыць адкрытасць Еўропы грамадзянам Беларусі, беларускаму грамадству ў цэлым.Каб простыя грамадзяне маглі лёгка атрымаць шэнгенскую візу і прыехаць у Еўропу», – зазначыла Анжаліка Борыс.
Падобную пазіцыю заняў і А.Мілінкевіч. «ЕС павінен прадэманстраваць, што мае інструменты ўплыву на дыктатуры і аўтарытарныя рэжымы, бо толькі сілай можна змусіць улады да крокаў у бок дэмакратызацыі, — заявіў Мілінкевіч. — Якія гэта інструменты? — Усё вельмі проста.
Беларусь атрымлівае падарункі ў выглядзе крэдытаў, не столькі ад ЕС, колькі ад Міжнароднага валютнага фонду. Але супраца з міжнароднымі інстытутамі павінна адбывацца на падставе правоў чалавека. Гэта прынцыповая рэч, — заявіў Мілінкевіч,лаўрэат прэміі імя Сахарава, што прысуджаецца Еўрапарламентам.
З Мілінкевічам і Борыс сустрэўся старшыня Еўрапарламента Ежы Бузак. Пасля сустрэчы Бузак, Мілінкевіч і Борыс правялі брыфінг, а потым пачалося пасяджэнне дэлегацыі Еўрапарламэнта па Беларусі. З беларускага боку ў сустрэчы бралі ўдзел Мілінкевіч, Борыс і памочнік Мілінкевіча Алесь Лагвінец, а таксама прадстаўнік беларускага пасольства, які ўдзельнічаў у дыскусіі.
Анжаліка Борыс адзначыла, што за столькі гадоў у Беларусі ў яе не было магчымасці размаўляць з уладамі, хоць ёй таго хацелася. А тут гэта адбылося.
Запланаваныя сустрэчы Мілінкевіча й Борыс з усімі найбуйнейшымі фракцыямі парламента. Борыс таксама спаткаецца з еўракамісарам па пытаннях палітыкі суседства Штэфанам Фюле.
Цяпер чытаюць
«Яна забрала дзяцей і вярнулася ў Мінск»: гісторыя беларуса, які эміграваў у Барселону з сям'ёй, а застаўся адзін11
Каментары