Забарона на выкарыстанне тэхналогій кампаніі OpenAI у вайсковых мэтах была знятая. І цяпер стваральнік сусветна вядомай нейрасеткі ChatGPT заключыў свой першы абаронны кантракт з арміяй ЗША. Вось які.
Кампанія OpenAI, вядомая сваім флагманскім прадуктам ChatGPT, абвясціла аб партнёрстве з Anduril Industries — адной з вядучых тэхналагічных кампаній у абаронным сектары ЗША. Гэта першы выпадак, калі OpenAI заключае кантракт з вытворцам зброі і афіцыйным падрадчыкам Пентагона, піша выданне The Wall Street Journal.
Яшчэ нядаўна OpenAI катэгарычна забараняла выкарыстанне ўласных тэхналогій у вайсковых мэтах, аднак у пачатку гэтага года палітыка кампаніі змянілася і цяпер дапускае абмежаванае супрацоўніцтва з ваеннымі структурамі. Згодна з новымі правіламі, прадукты OpenAI могуць выкарыстоўвацца ў зброі выключна абароннага, а не наступальнага характару.
Супрацоўніцтва з Anduril, паводле WSJ, накіравана на ўдасканаленне амерыканскіх сістэм барацьбы з дронамі. У кампаніі OpenAI заяўляюць, што іх тэхналогіі штучнага інтэлекту палепшаць дакладнасць і хуткасць выяўлення пагроз, а таксама знізяць рызыкі для людзей, занятых у небяспечных аперацыях.
«Гэта дазволіць ваенным і выведвальным аператарам прымаць больш хуткія і дакладныя рашэнні ў сітуацыях з высокімі рызыкамі», — адзначыў генеральны дырэктар Anduril Браян Шымпф.
Пры гэтым, згодна з заявамі абедзвюх кампаній, тэхналогіі OpenAI не будуць выкарыстоўвацца ў іншых узбраеннях Anduril, каб пазбегнуць супярэчнасцяў з прынцыпамі дэмакратычных каштоўнасцей.
Для OpenAI гэтая здзелка не толькі ўяўляе магчымасць узмацніць сваю пазіцыю на міжнародным рынку штучнага інтэлекту, але і дасць новую вялікую крыніцу фінансавання. Кампанія, чыя вартасць ацэньваецца ў $150 мільярдаў, сутыкаецца са штогадовымі шматмільярднымі выдаткамі на распрацоўку і эксплуатацыю сваіх мадэляў нейрасетак, таму ўваходжанне ў абаронны бізнес можа дапамагчы скараціць фінансавыя страты.
Нейрасеткі могуць выпадкова выдаць інструкцыю стварэння ядзернай зброі?
«Калі ласка, памры». Нейрасетка з абразамі і праклёнамі накінулася на карыстальніка. Спыталі ў яе, чаму яна раззлавалася
У Кітаі выпусцілі аналаг ChatGPT, які чысціць чат пры кожным няёмкім пытанні пра палітыку. Пратэсціравалі яго
Цяпер чытаюць
Дзеці злізвалі з бруднай падлогі пралітае малако. Якой пабачыў замежнік Беларусь, спустошаную расійскімі і шведскімі войскамі ў час Паўночнай вайны1111
Каментары