Кныровіч тры гады працаваў у супольнасці блогераў «Інфапойнт», але цяпер развітаўся з аб'яднаннем
Ён будзе сам шукаць фінансаванне для свайго ютуб-канала «Кнырович. План».
Бізнэсмен Аляксандр Кныровіч напісаў у сацсетках, што выйшаў з кааліцыі блогераў «Інфапойнт» (юрыдычная асоба IMN Stream, раней — Infopoint Media Network). Цяпер ён збіраецца самастойна развіваць праект «Кнырович. План».
«Інфапойнт» быў створаны ў 2020 годзе па ініцыятыве Франака Вячоркі. Блогеры і некалькі медыя, якія ўвайшлі ў кааліцыю, каардынаваліся між сабой, абменьваліся інфармацыяй. Паколькі ім было складана паасобку шукаць фінансаванне, гэту задачу ўзяло на сябе кіраўніцтва «Інфапойнта». Сярод публічных удзельнікаў кааліцыі называліся «Беларусь галаўнога мозгу», Kyky.org, The Village Belarus. Такія буйныя незалежныя медыя, як «Наша Ніва», «Зеркало», «Радыё Свабода», «Белсат», у «Інфапойнт» ніколі не ўваходзілі. Праз некаторы час Вячорка адышоў ад праекту і заняўся палітычнай дзейнасцю. Арганізацыяй кіравала Саша Раманава, былая дырэктарка Kyky.org.
Многія абвінавачвалі блогераў з «Інфапойнта», што яны цалкам падпарадкаваныя Офісу Святланы Ціханоўскай. Кныровіч абвяргае такую практыку.
«За 150 планёрак «Інфапойнта» з лютага 2022 года я ні разу не бачыў там Франака Вячорку, больш за тое — і духу яго не адчуваў. Гэта значыць, за ўсе 3 гады не было ніводнага кіруючага ўказання з боку Офіса ні мне, ні ў маёй прысутнасці. Чуткі аб «вялікім і жудасным» лялькаводзе «Інфапойнта» — толькі чуткі», — запэўнівае ён.
Як Кныровіч расказаў «НН», у яго не было ніякай пасады ў «Інфапойнце». Ён удзельнічаў нароўне з астатнімі ўдзельнікамі кааліцыі, атрымліваў фінансавую падтрымку на праект.
«Але гэта зусім невялікія сумы, яны не могуць закрыць патрэбы чалавека на месяц. Тры гады таму мы з Сашай Раманавай дамовіліся аб тым, што яны будуць падтрымліваць мой асабісты ютуб-канал. Была дамоўленасць, што працуем адзін «электаральны цыкл». Кантракт скончыўся — таму я і сышоў».
Паводле інфармацыі «Нашай Нівы», у 2024 і 2025 годзе некаторыя блогеры, праекты і тэлеграм-каналы гэтаксама пакінулі «Інфапойнт» і перайшлі ў свабоднае плаванне. Гэта адбылося таму, што ў дырэктаркі аб'яднання Сашы Раманавай былі прэтэнзіі да блогераў наконт іх дысцыплінаванасці. Ім жа не падабалася, што большасць бюджэту кааліцыі ідзе на праект Кныровіча.
Саша Раманава не стала каментаваць сітуацыю «Нашай Ніве».
Цяпер чытаюць
Мінскі медык пайшоў ваяваць за Расію, праз месяц атрымаў цяжкае раненне, а цяпер выбівае выплаты, седзячы ў інвалідным вазку27
Мінскі медык пайшоў ваяваць за Расію, праз месяц атрымаў цяжкае раненне, а цяпер выбівае выплаты, седзячы ў інвалідным вазку
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1414
Каментары