Краіны Балтыі незадаволеныя, што іх не запрасілі на саміт па Украіне ў Лондане
Вялікабрытанія не запрасіла Латвію, Літву і Эстонію на саміт па Украіне, які пройдзе ў Лондане 2 сакавіка. Гэта рашэнне выклікала «сур'ёзную незадаволенасць» з боку балтыйскіх краін, паведамляе Sky News са спасылкай на дыпламатычную крыніцу.
«Расія і наша грамадства ясна ўбачаць, што нам здрадзілі не толькі ЗША, але і Вялікабрытанія з Францыяй», — заявіла крыніца на ўмовах ананімнасці.
Суразмоўца выдання расказаў, што прэм'ер-міністр Вялікабрытаніі Кір Стармер плануе правесці тэлефонныя перамовы з лідарамі Латвіі, Літвы і Эстоніі, але адзначыў, што гэта не кампенсуе іх адсутнасць на саміце.
«Мы вельмі незадаволеныя тым, што лідараў краін Балтыі не запрасілі», — падкрэсліла крыніца.
Паводле яе звестак, Францыя бярэ актыўны ўдзел у арганізацыі сустрэчы на Даўнінг-стрыт, падчас якой плануецца абмеркаваць падтрымку Украіны і магчымасць стварэння міжнародных міратворчых сіл, якія могуць быць разгорнутыя на тэрыторыі Украіны, калі ЗША дасягнуць дамоўленасці паміж Кіевам і Масквой.
Таксама сярод ключавых тэм саміту будзе стаяць пытанне еўрапейскай бяспекі. Гэта асабліва актуальна пасля таго, як прэзідэнт ЗША Дональд Трамп заявіў, што еўрапейскім саюзнікам па НАТА неабходна ўзяць на сябе большую адказнасць за ўласную бяспеку, а не разлічваць на вайсковую моц ЗША.
У спіс запрошаных краін увайшлі Нарвегія, Фінляндыя, Швецыя і Польшча. Аднак крыніца засведчыла, што і Хельсінкі, і Варшава раней публічна заявілі, што не маюць намеру адпраўляць свае войскі ў склад магчымых міжнародных міратворчых сіл ва Украіне.
Пры гэтым суразмоўца Sky News падкрэсліў: балтыйскія краіны распрацавалі свой план.
«Латвія, Літва і Эстонія — адны з найбольш актыўных прыхільнікаў Украіны, калі ўлічваць памер іх эканомік і вайсковую дапамогу Кіеву. Любыя рашэнні, якія будуць прынятыя на саміце, непасрэдна закранаюць нашу бяспеку», — сказаў дыпламат.
Прэм'ер-міністр Вялікабрытаніі Кір Стармер, які вярнуўся напярэдадні з Вашынгтона, правядзе саміт у Лондане ў нядзелю, 2 сакавіка. У сталіцы Вялікабрытаніі, як чакаецца, збяруцца лідары больш за дзесяці еўрапейскіх краін. Галоўнай тэмай сустрэчы стане сітуацыя ва Украіне і гарантаванне бяспекі Еўропы. На саміт запрошаны і ўкраінскі прэзідэнт Уладзімір Зяленскі.
Ці патрэбная беларуская мова тым, хто размаўляе па-руску? Азаронак задаўся такім пытаннем на СТБ, а выпускнік Акадэміі МУС прапанаваў замяніць урокі факультатывамі4444
Каментары
))) Нехта адтуль ні жазволім забаронім...
І гэта толькі пачатак " 53 актывісты"...гатуйцесь