«Напісалі, як я хачу вярнуцца ў святую Расію». Прапаганда перакруціла жарт беларускі і прыдумала фэйк пра загніваючую Амерыку
Дзяўчына, у якой дома на сцяне вісіць бел-чырвона-белы сцяг, раптам даведалася, што яна расчараваная амерыканскай марай мадэль з Екацярынбурга.
Ганна тры гады таму выехала з Беларусі і цяпер жыве ў ЗША. У інстаграме яна расказвае пра жыццё мігранта ў гэтай краіне. Часам на фоне яе ролікаў можна пабачыць і бела-чырвона-белы сцяг.
Пару дзён таму Ганна запісала жартаўлівы ролік, у якім сказала, што жыве на Манхэтэне, і паказала від са свайго акна, падпяваючы радкі з вядомай песні «Она хотела бы жить на Манхэттене…». Нягледзячы на тое, што гэта рог знакамітага Брадвея і Канал-стрыт у Трайбецы, адным з самых модных, заможных і бяспечных раёнаў Манхэтэна, від з акна адкрываўся не лепшы: абадраныя сцены ў графіці, вулічны гандаль з рук на тратуарах і паркоўцы, паўсюль раскіданае смецце. Іронія дзяўчыны зразумелая.
Але Ганна ніяк не чакала, што яе відэа падхопіць расійская антызаходняя прапаганда. Днямі яна апублікавала новы ролік, у якім расказала, што пасля публікацыі папярэдняга відэа падпісчыкі сталі дасылаць ёй розныя прапагандысцкія артыкулы па яго матывах.
«Яно хутка пачало набіраць прагляды, таму што там была нагода зас*аць загніваючую Амерыку», — кажа дзяўчына.
Спачатку яе відэа з'явілася ў расійскім выданні «Известия».
«Горы смецця, наркаманы і вулічны рынак — сапраўдная карцінка «прыгожага жыцця» на Манхэтэне», — так падпісалі ролік прапагандысты.
Але некаторыя расійскія прапагандысты пайшлі яшчэ далей. Яны скарысталіся скрыншотамі з відэа Ганны, каб расказаць абсалютна выдуманую гісторыю пра 26-гадовую Кацю, мадэль з Екацярынбурга, якая быццам пераехала ў Нью-Ёрк з надзеяй на «амерыканскую мару», але сутыкнулася з непрывабнай рэальнасцю.
За маленькую студыю на Манхэтэне бацькі Каці быццам бы плацяць $3500 за месяц, але вакол бруд, крыкі бяздомных, шалёныя цэны нават на каву, а без страхоўкі кожны візіт да доктара ператвараецца ў пакуты. У мадэльным бізнэсе — пастаянны ціск, канкурэнцыя і нестабільныя заробкі. Самота, фальш і страх сталі яе будзённасцю. Нью-Ёрк, пра які марыла, аказаўся быццам не горадам магчымасцяў, а горадам выжывання, таму Каця марыць выехаць адтуль.
«Гэтыя артыкулы напісаныя нібы ад майго імя, там напісана, што мяне завуць Каця, я мадэль з Екацярынбурга, як мне дрэнна ў Нью-Ёрку і як я мару вярнуцца дамоў у святую Расію. Калі што, я Гануля, родам з Беларусі, жыву ў Сан-Францыска і люблю Амерыку», — патлумачыла Ганна.
Каментатары іранізуюць, што дзяўчыне, якая марыла стаць папулярнай, варта было ўдакладняць, якім менавіта чынам. Ганна пагаджаецца: не пра такую папулярнасць яна марыла.
Іншыя каментатары заўважаюць, што, нягледзячы на тое, што ў Расіі забаронены амерыканскі інстаграм, карыстальнікі з гэтай краіны ўсё роўна ў ім чамусьці сядзяць і чакаюць чарговых пацвярджэнняў пра загніваючы Захад.
«Тыя, хто глядзіць тэлік у Расіі, больш вераць вядоўцам, што ты Каця, чым табе, што ты Аня», — адзначыў адзін з каментатараў пад ролікам.
-
У Беларусі вырашылі не забараняць вэйпы — бо на іх ёсць «пэўны спажывецкі попыт»
-
У Мінску паставілі бронзавы помнік качцы, якая летась стала любіміцай сталіцы
-
Гісторыя ў ЕГУ — гэта гістфак вашай мары. Еўрапейскі дыплом з навучаннем на беларускай мове пры інтэнсіўным вывучэнні англійскай. І поўная свабода
Каментары