Гамяльчан напалохалі расійскія «Шахеды»: кружылі так нізка, што «палкамі можна было збіваць»
Магчыма, беспілотнікаў было некалькі.
З раніцы 26 лютага на працягу некалькіх гадзін над Гомелем кружыў мінімум адзін расійскі беспілотны лятальны апарат тыпу «Шахед», даведаўся Флагшток. Яго выдаваў чорны колер і характэрны гук «як у мапеда». Магчыма, беспілотнікаў было некалькі.
Афіцыйна аб пагрозе ні ўлады, ні сілавыя органы нічога не паведамілі. Больш за тое, менавіта на 26 лютага ў Гомелі была запланавана штомесячная планавая праверка сістэмы апавяшчэння з уключэннем электрасірэн. Але ў момант пралёту БпЛА — рэальнай пагрозы — сірэны маўчалі.
На здарэнне адрэагаваў толькі неафіцыйны Тэлеграм-канал ідэолагаў Гомельскага аблвыканкама: апублікаваў папярэджанне «проста, каб ведаць» аб мерах бяспекі пры выяўленні дронаў і прыстрашыў крымінальным пераследам і пазбаўленнем волі на некалькі гадоў за «любую здымку і публікацыю фота ці відэа».
Але людзі ўсё роўна актыўна пакідалі паведамленні ў сацсетках і месенджарах.
Характэрна, што ўкраінскія маніторынгавыя каналы ў тую раніцу і напярэдадні не паведамлялі аб залёце расійскіх дронаў з тэрыторыі Украіны. Ёсць верагоднасць, што ўварванне адбылося наўпрост з Расіі.
Візуальныя назіранні за БпЛА, які з'явіўся прыкладна ў 07:30, паказалі, што, верагодна, над Гомелем кружыў расійскі Shahed-136 (Герань). Баявая частка такіх дронаў складае каля 50 кілаграм выбухоўкі.
Магчыма, што дрон быў не адзін. Гомельцы паведамлялі аб серыі пралётаў.
Дакладна вядома, што «Шахед» бачылі і чулі не раз у Цэнтральным, Чыгуначным, Савецкім раёнах, а канкрэтна над некалькімі мікрараёнамі: Сельмашаўскі, Заходні, Шведская Горка, Стары Аэрадром, Мельнікаў Луг, таксама ў Касцюкоўцы і Пакалюбічах.
Некаторыя сцвярджалі, што дроны лёталі «чаргой» і здзіўляліся:
- «Чаму сірэны маўчаць?»
- «Чаму наогул усе маўчаць?»
- «Адзін дрон, падобны на Герань, праляцеў а 8.54 над вул Б. Царыкава, з боку цэнтра ў бок Мільчы. Другі быў чутны прыкладна праз 10 хвілін, але бачна яго не было. Трэці быў чутны на вуліцы Кірава, у раёне Рэмбыттэхнікі каля 9.30».
Па словах відавочцаў, пралёты БпЛА былі такімі нізкімі, што «з даху палкамі можна было збіваць». Шэраг карыстальнікаў сцвярджаў, што бачылі ад 5 да 10 пралётаў.
Неўзабаве за шалёным дронам (ці дронамі) вайскоўцы адправілі верталёт, які таксама зафіксавалі жыхары Гомеля.
Лёс БпЛА пакуль застаецца невядомым.
Цяпер чытаюць
Дэпутат Клішэвіч стаў кандыдатам гістарычных навук з дысертацыяй пра разлажэнне беларускага камсамола ў часы «перабудовы»6
Каментары