«І я пацалую табе руку, калі будуць курчыцца Фукуяма, Леві і Кісінджэр». Як Азаронак фліртаваў з Дугінай
Такога саладжавага Азаронка вы не ведаеце.
Вядомы прапагандыст Рыгор Азаронак сімпатызаваў Дар’і Дугінай, дачцэ ідэолага расійскага фашызму Аляксандра Дугіна. Такую выснову можна зрабіць, чытаючы дзённік Дугінай «Топі і высі майго сэрца. Дзённік», апублікаваны ў 2023 годзе, піша Reform.news.
Дугіна (Платонава) загінула ў жніўні 2022 года ў выніку падрыву аўтамабіля ў Падмаскоўі, якім яна кіравала. Невядома, ці была мішэнню яна сама або ўсё ж яе бацька, які не паехаў з ёй, у апошні момант чамусьці перасеўшы ў іншую машыну.
Вось фрагмент дзённіка, дзе згадваецца Азаронак і публікуюцца яго асабістыя паведамленні.
Складаецца ўражанне, што сама Дугіна не адказвала яму ўзаемнасцю.
Уражанні Азаронка пра Дар’ю Платонаву: «А я падумаў яшчэ да аўтобуса ў Растове — якая прыгожая францужанка, якога хрэна з ёй гэты блізкаўсходні персанаж».
Азаронак: «На фронце, на перадавой — там найлепшыя мужчыны, там найлепшыя, там воіны. Простыя з прамым позіркам — сур’ёзныя, засяроджаныя, моцныя, прыгожыя — самыя, самыя найлепшыя, самыя эталонныя. Кожны з іх — самы, самы цудоўны. А ў тылах сядзяць персанажы, якія ладзяць вечарынкі, оргіі, абліваюць б… шампанскім, смяюцца з тупаватых «Ванек» на франтах».
Азаронак: «Вальс, і я пацалую табе руку, калі будуць курчыцца Фукуяма, Леві і Кісінджэр. Ты спытаеш — што за гук, я скажу — не адцягвайся, танцуй».
Азаронак вельмі балюча адрэагаваў на забойства Дугінай. У эфіры СТБ ён надрыўна сказаў:
«Дар’я Дугіна, узарваная подлым і агідным тэрактам. Не змаглі і не зможаце нічога зрабіць з бацькам — вырашылі забіць яго смерцю дачкі. А ён устаў і сказаў: нам патрэбна толькі наша Перамога. На яе алтар паклала сваё дзявочае жыццё мая дачка. Дык перамажыце, калі ласка! І вы задрыжалі, спалохаліся».
Ён таксама склаў «Спіс Дугінай» — у яго ён уключыў беларусаў, якія, з яго пункту гледжання, няправільна адрэагавалі на смерць Дар’і.
Вядома, што Азаронку 30 гадоў. Ён дагэтуль не жанаты. Гэты факт неаднойчы станавіўся нагодай для жартаў з боку Аляксандра Лукашэнкі. Той публічна нагадваў яму пра гэты «даўжок», на што Азаронак адказваў, што працуе над гэтым.
Каментары
Хтосьці яшчэ сумняецца ў тым што Азаронак - прадстаўнік ЛГБТ?