Напярэдадні сезона адпачынкаў DW Беларусь высветліла, карткі якіх беларускіх банкаў працуюць у ЕС і якія ёсць альтэрнатыўныя віды аплаты.
У канцы красавіка некалькі беларускіх банкаў паведамілі, што іх карты перасталі працаваць у краінах ЕС. Большасць з 21 камерцыйнага банка, які працуе ў Беларусі, знаходзіцца пад еўрапейскімі санкцыямі праз сітуацыю з правамі чалавека ў Беларусі і падтрымку беларускім рэжымам вайны ва Украіне.
Карткі якіх беларускіх банкаў не працуюць у Еўрасаюзе?
З 21 красавіка 2026 года аперацыі з выкарыстаннем картак Mastercard Белгазпрамбанка і Альфа-Банка Беларусь сталі недаступныя на тэрыторыі краін ЕС, а таксама ў інтэрнэт-крамах, зарэгістраваных у гэтых краінах. Яшчэ ў сакавіку ў краінах ЕС перасталі прымаць карты Visa гэтых банкаў. Гэта адбылося па рашэнні плацежных сістэм праз санкцыі ЕС, уведзеныя супраць беларускіх банкаў.
У 19‑ы пакет санкцый Еўрасаюза супраць Расіі, які ўступіў у сілу 2 снежня 2025 года, патрапілі тры беларускія банкі: Альфа-Банк, Сбербанк, Банк ВТБ. Таксама ў дакуменце згадваюцца БелВЭБ і Белгазпрамбанк — для іх санкцыі пачалі дзейнічаць задняй датай, яшчэ з 25 лютага 2025 года. Акрамя таго, пад еўрапейскімі санкцыямі таксама знаходзяцца Белінвестбанк, Белаграпрамбанк, Банк Дабрабыт і Банк развіцця. Яшчэ ў 2022 годзе яны былі адключаныя ад сістэмы SWIFT, а з 18 ліпеня 2025 ЕС увёў забарону на любыя банкаўскія аперацыі з гэтымі арганізацыямі.
Плацежная сістэма таксама мае значэнне
Трэба разумець, што карты любых банкаў на беларускай плацежнай сістэме «Белкарт» і расійскай плацежнай сістэме «Мір» у Еўропе нідзе не прымаюць. Адпаведна, пры паездцы ў Еўропу пры сабе трэба мець карты сістэм Visa або Mastercard.
Акрамя таго, ёсць альтэрнатыўная плацежная сістэма — кітайская Union Pay. Яна асабліва папулярная ў краінах Азіі, але і ў краінах ЕС яе таксама могуць прымаць — усё залежыць ад таго, ці падтрымлівае аплату канкрэтны банкаўскі тэрмінал. У Беларусі карты Union Pay выпускае Белгазпрамбанк.
Некаторыя беларускія карты ў Еўропе працуюць, але ёсць нюанс
Усё яшчэ працоўнымі лічацца карткі Беларусбанка, банка Рашэнне, Банка РРБ, Беларускага народнага банка, БСБ Банка, МТБанка, Неа Банка Азія, Парытэтбанка, Прыёрбанка, СтатусБанка, Тэхнабанка і Цэптэр Банка.
Аднак гарантый таго, што аплата беларускай картай пройдзе ў Еўропе, няма, дзеляцца вопытам беларусы-падарожнікі.
Нават картка банка, які не знаходзіцца пад санкцыямі, можа не спрацаваць пры аплаце ў Еўропе праз рэгуляцыі канкрэтнага банка, які абслугоўвае плацежны тэрмінал або гандлёвы пункт.
Часта еўрапейскія банкі блакуюць любыя аперацыі з «беларускім кампанентам» — закрываюць рахункі беларускім грамадзянам або не дазваляюць аплату беларускімі картамі. Гэтая агаворка распаўсюджваецца і на зняцце наяўных у банкаматах у Еўропе.
А што з аплатай анлайн беларускімі картамі?
На сэрвісах браніравання жылля Booking.com і Airbnb практычна немагчыма заплаціць беларускай картай — яны афіцыйна спынілі працу з беларускімі банкамі.
Аднак, як пішуць беларусы ў сацсетках, часам аплата і праходзіць — можна спрабаваць карты розных банкаў, уключаць VPN або выбіраць аплату праз Paypal.
Таксама раяць падчас браніравання выбіраць варыянты, пры якіх не патрабуецца перадаплата і ёсць магчымасць разлічыцца наяўнымі на месцы.
Тое ж самае тычыцца і аплаты ў еўрапейскіх інтэрнэт-крамах, сэрвісах таксі і дастаўкі — карткі непадсанкцыйных банкаў з плацежнымі сістэмамі VISA і Mastercard павінны працаваць, але гарантый няма.
Як альтэрнатыву можна выкарыстоўваць аплату з дапамогай ApplePay з карткай непадсанкцыйнага банка.
Што яшчэ трэба ведаць для аплаты за мяжой
У некаторых рэстаранах, гатэлях і крамах у Еўропе можна пытацца пра аплату з дапамогай Paypal — калі карта ўжо прывязаная, то аплата на тэлефоне з NFC з выкарыстаннем QR-кода павінна прайсці без праблем.
Улічваючы няпростую сітуацыю з аплатай картамі падчас паездак у Еўрасаюз, самая папулярная парада падарожнікаў — мець пры сабе наяўныя грошы. Без дэкларавання беларусы могуць перавозіць праз мяжу да 10 тысяч долараў, але трэба ўлічваць і патрабаванні краін-суседак. Так, пры выездзе з Літвы ў Беларусь дзейнічае ліміт у 60 еўра наяўных на чалавека (на іншую валюту абмежаванні не распаўсюджваюцца).
Каментары