«Не абавязаныя». Страхавая кампанія адмовіла беларусу ў падаўжэнні поліса пасля буйной выплаты

У страхавой кампаніі мужчыну заявілі, што працягваць з ім дамову «немэтазгодна», бо поліс павінен прыносіць прыбытак, а не страты, піша Myfin.by.

У Пятра ўласная кампанія ў сферы мікратурызму. Яго кліенты актыўна выязджаюць на конныя маршруты і сплаўляюцца на байдарках. Каб максімальна засцерагчы людзей падчас падарожжаў, прадпрымальнік увёў абавязковае страхаванне ад траўмаў і няшчасных выпадкаў.

— За два гады мая кампанія застрахавала ў «Белнафтастраху» каля сотні турыстаў, прынёсшы страхавой кампаніі стабільны і даволі добры прыбытак. Я вырашыў застрахаваць і сябе, але стандартны ліміт выплаты 5 тысяч рублёў мяне не задавальняў.

Паколькі буйныя страхавыя сумы (звыш 20 тысяч рублёў) патрабуюць узгаднення з кіраўніцтвам кампаніі, Пятру ў індывідуальным парадку ўхвалілі максімальную страхавую суму ў 50 тысяч рублёў. У выніку ён заплаціў за поліс больш за 1 200 рублёў. Сума немалая, але на здароўі мужчына эканоміць не хацеў.

Прыкладна праз паўгода адбыўся страхавы выпадак.

— Я ўпаў з ровара і зламаў дзве косткі ў локці. Лячэнне зацягнулася больш чым на тры месяцы, а рэабілітацыя працягваецца і цяпер. За пералом «Белнафтастрах» выплаціў мне 5 тысяч рублёў.

У чэрвені Пётр моцна парэзаў нагу падчас чарговага сплаву. Тыдзень праляжаў у бальніцы, а калі прыйшоў афармляць выплату, высветлілася, што тэрмін дзеяння поліса ўжо скончыўся.

— Аказалася, што ніхто і не збіраўся нагадваць мне пра падаўжэнне, хоць раней менеджары заўсёды загадзя тэлефанавалі. У гэтай жа кампаніі я страхую і іншыя аб’екты, у тым ліку аўтамабіль, і там такіх праблем ніколі не ўзнікала. На пытанне, чаму мяне не папярэдзілі, у «Белнафтастраху» адказалі, што не абавязаныя гэтага рабіць, і спаслаліся на тое, што дасылаюць апавяшчэнні ў Viber, якога ў мяне наогул няма на тэлефоне.

У цэнтральным офісе бізнесмена накіравалі ў другое аддзяленне, дзе і агучылі сапраўдную прычыну: у падаўжэнні страхоўкі адмоўлена, бо страхаваць яго далей «немэтазгодна» — папярэдняя выплата за зламаны локаць была занадта вялікай.

— Атрымліваецца, страхавым кампаніям цікава атрымліваць унёскі толькі ад тых кліентаў, якія ніколі не траўміруюцца. Змяншаць страхавую суму я сам адмовіўся, а працягваць дамову на ранейшых умовах кампанія не захацела.

Паводле слоў Пятра, гэта ўжо другі выпадак, калі буйны страхоўшчык яго падвёў. Раней, знаходзячыся ў Грузіі, ён атрымаў траўму нагі, маючы поліс для тых, хто выязджае за мяжу. Мясцовыя лекары памылкова замест пералому дыягнаставалі звычайны ўдар. Пётр вырашыў не траціць грошы страхавой кампаніі за мяжой і вярнуўся далечвацца ў Беларусь.

— Аднак у выплаце мне адмовілі, спаслаўшыся на бюракратычны нюанс: паколькі дапамога не была аказана ў Грузіі, замежны поліс не дзейнічае, а для Беларусі патрэбна асобная страхоўка. Атрымліваецца, я зэканоміў грошы кампаніі, а сам застаўся без выплаты.

Менавіта пасля таго выпадку Пётр і аформіў беларускі поліс на 50 тысяч рублёў. Але варта было адбыцца першаму сур’ёзнаму страхавому выпадку, як кампанія выплаціла грошы і адразу пасля гэтага адмовілася працягваць дамову на наступны тэрмін.

Страхавая кампанія: мы скарысталіся сваім правам

Мы папрасілі прадстаўнікоў страхавой кампаніі пракаментаваць гэтую сітуацыю. Вось які адказ атрымалі:

«Пётр заключыў са страхавой кампаніяй «Белнафтастрах» у перыяд з 2024 года па чэрвень 2026 года 15 дамоваў страхавання.

З іх: тры — абавязковага страхавання грамадзянскай адказнасці ўладальнікаў транспартных сродкаў, восем — добраахвотнага страхавання ад няшчасных выпадкаў і захворванняў на час паездак за мяжу ў дачыненні да сябе і членаў сваёй сям’і, яшчэ чатыры — добраахвотнага страхавання ад няшчасных выпадкаў у дачыненні да сябе. Агульная сума выплачаных страхавых унёскаў склала 1 243,68 рубля.

За названы перыяд страхавая кампанія тройчы (ў ліпені 2024 года, ліпені 2025 года і жніўні 2025 года) ажыццяўляла Пятру страхавыя выплаты ў сувязі з надыходам страхавых выпадкаў.

Узровень выплат па гэтым страхавальніку склаў 507%.

З улікам такога ўзроўню выплат і ацэньваючы магчымыя рызыкі будучых перыядаў, кампанія скарысталася сваім правам адмовіць у заключэнні дагавора добраахвотнага страхавання (арт. 391 Грамадзянскага кодэкса Рэспублікі Беларусь).

Што датычыцца інфармавання страхавальнікаў, то ЗАСТ «Белнафтастрах», як кліентаарыентаваная кампанія з высокімі стандартамі абслугоўвання, надае вялікую ўвагу сэрвісу і, калі кліент даў згоду на атрыманне паведамленняў у Viber у межах суправаджэння дагавораў страхавання, заўсёды дасылае напаміны пра неабходнасць аплаты чарговага ўзносу або пра заканчэнне тэрміну дзеяння дагавора страхавання».

• 0
• 3
• 5
• 6
• 0
• 0
• 0
• 0