Спектаклі пра жыццё ў Беларусі пасля 2020 года, мацярынства і ўцекачоў — што яшчэ чакае гледачоў на міжнародным тэатральным фестывалі ў Познані?
11 верасня ў Познані стартуе міжнародны тэатральны фестываль «Другая спроба» («Druga Próba. Teatr ponad granicami»), на якім пакажуць пастаноўкі творцаў з Беларусі, Украіны і Польшчы.
Сярод важных анонсаў — пастаноўка рэжысёркі Наталлі Ляванавай «Пчала ў горле» па п’есе ананімнай аўтаркі знутры краіны, якая шчыра раскрывае тэму жыцця ў Беларусі пасля 2020 года.
Гледачы таксама змогуць убачыць манадраму «LUBA» у рэжысуры Марыі Бруні, якая закранае складаную тэму мацярынства і маральнай адказнасці; харэаграфічны спектакль «Tsundoku» Вольгі Кебас, засяроджаны на ўнутраных маналогах сучаснай жанчыны.
Асобнае месца ў афішы займаюць перфарматыўныя чытанні п’ес сучасных аўтарак, якія пройдуць 18 і 19 верасня ў Бібліятэцы імя Рачыньскіх. Беларускіх творцаў тут рэпрэзентуюць драматургіня Жэня Давідзенка і рэжысёрка Юлія Шаўчук з іх пастаноўкай «Як пазбавіцца сораму».
Гледачы таксама змогуць пабачыць пастаноўку «Бежанцы 1915» беларускага рэжысёра і акцёра Андрэя Новіка. З цікавостак спектакля — яго шматмоўе. Са сцэны прагучыць як польская, беларуская, руская мовы, так і падляшскі дыялект.
Дадаткова ў межах фестывалю пройдзе дыскусія «Тэатр як адлюстраванне грамадска-палітычных працэсаў: Беларусь, Украіна, Польшча».
Адукацыйны складнік пашыраны і за кошт інтэнсіўных трохдзённых лабараторных прац у рамках тэатра-дакумента, дзе сумесныя міжнародныя групы будуць працаваць над асабістымі біяграфіямі.
Гісторыя фестывалю «Другая спроба» пачалася як натуральны адказ нa хвалі вымушанай эміграцыі творцаў, якія пакінулі свой дом пасля драматычных падзей 2020 года ў Беларусі і пачатку поўнамаштабнага расійскага ўварвання ва Украіну ў 2022 годзе. Многія прафесійныя акцёры, рэжысёры і драматургі, апынуўшыся ў чужой краіне без ведання мовы і прафесійных сувязей, сутыкнуліся з феноменам «прафесійнай нябачнасці», калі прызнаныя майстры сцэны і людзі культуры былі вымушаныя працаваць на будоўлях або складах адзення.
Сімвалічная назва «Другая спроба» стала для іх рэальным шанцам вярнуцца ў прафесійны тэатр, аднавіць страчаную суб'ектнасць і зноў атрымаць голас у публічнай прасторы.
Больш інфармацыі пра фестываль і яго праграма — па спасылцы.
Цяпер чытаюць
«Я яб*н, таму і пайшоў». Малады беларус кінуў цяжарную жонку і паехаў на вайну, пасля здрадзіў ёй дый загінуў5
Каментары