Мінабароны Расіі паведаміла пра ўдары па вайсковых суднах. Але атакаваныя ў Чорным моры танкеры ішлі ў Малдову па сланечнікавы алей

Як паведамляе выданне The Insider са спасылкай на прэм'ер-міністра Румыніі Луку Нікулеску, інцыдэнт адбыўся ўвечары 14 лістапада 2026 года каля румынскага суднаходнага канала Суліна. Першым а 21:10 мясцовага часу пад удар трапіў танкер EVIAPETROL V пад сцягам Грэцыі, які знаходзіўся прыкладна за 7,4 кіламетра ад канала. Праз 35 хвілін беспілотнік уразіў сухагруз MARSOL пад сцягам Сент-Кітса і Невіса за 9,3 кіламетра на паўднёвы ўсход ад Суліны. Абодва судны на момант нападу знаходзіліся ў тэрытарыяльных водах Румыніі. Пазней румынскае Міністэрства абароны зафіксавала атаку на трэцяе судна — танкер ALI NAJAFOV пад такім жа сцягам.

У выніку ўдараў на палубах узніклі пажары, якія экіпажам удалося ліквідаваць уласнымі сіламі. Ніхто з маракоў не пацярпеў. З прычыны з'яўлення паветраных цэляў у раёне вусця Дуная румынскія ВПС двойчы падымалі ў паветра знішчальнікі. Лука Нікулеску кваліфікаваў напады як парушэнне міжнароднага права і звязаў іх з расійска-ўкраінскай вайной, хоць афіцыйны Бухарэст пакуль прама не ўдакладніў прыналежнасць запушчаных беспілотнікаў.

Расійскія заявы пра зброю

Раніцай 15 лістапада Міністэрства абароны Расіі апублікавала справаздачу аб працягу ўдараў па партовай інфраструктуры Украіны і марскіх суднах. Прадстаўнікі расійскага ведамства заявілі пра ўдары па двух сухагрузах, якія нібыта перавозілі вайсковыя грузы і грузы двайнога прызначэння ў Адэсу. Дакладных каардынат, назваў суднаў або відэазапісаў атак Мінабароны не прадставіла.

Аднак аналіз даных сэрвісу адсочвання суднаў Starboard Maritime Intelligence паказвае іншую карціну: усе тры атакаваныя гандлёвыя караблі ішлі не ва Украіну, а ў Малдову. Танкер EVIAPETROL V выйшаў з турэцкага порта Амбарлы 1 лістапада і з 13 лістапада чакаў у раёне Суліны праходу па канале да малдаўскага порта Джурджулешты, дзе мусіў загрузіць каля 6,5 тысячы тон сланечнікавага алею. Праз паўтары гадзіны пасля ўдару, а 22:40, экіпаж змяніў у сістэме AIS пункт прызначэння на грэцкі Пірэй і пакінуў раён. У другой паловк дня 15 лістапада судна рухалася на паўднёвы ўсход уздоўж берагоў Балгарыі з хуткасцю 22,2 км/г. Малдаўская аграпрамысловая група Trans-Oil ужо афіцыйна пацвердзіла, што праз атрыманыя пашкоджанні танкер не зможа закончыць рэйс, што прывядзе да затрымак экспарту і парушэння кантрактаў.

Сухагруз MARSOL, які выйшаў раніцай 14 лістапада з румынскай Канстанцы, таксама меў заяўленым пунктам прызначэння Джурджулешты, куды мусіў прыбыць праз два дні. Пасля атакі ён адышоў на поўдзень і спыніўся. Танкер ALI NAJAFOV рушыў з Турцыі 11 лістапада па тым жа малдаўскім маршруце, але апошнія даныя яго геалакацыі абрываюцца а 23:00 у дзень нападу.

Джурджулешты застаюцца адзіным марскім портам Малдовы. Размешчаны на Дунаі на стыку межаў з Румыніяй і Украінай, ён з'яўляецца галоўным транспартным вузлом краіны для імпарту нафтапрадуктаў і экспарту сельскагаспадарчай прадукцыі.

Статыстыка нападаў каля межаў НАТА

Прадстаўнікі групы Trans-Oil адзначаюць, што гэта ўжо другі за месяц напад на судна, якое ішло да іх па алей. 15 кастрычніка расійскія дроны атакавалі танкер WINE TRADER пад сцягам Сан-Марына. Судна знаходзілася ў выключнай эканамічнай зоне Румыніі за 24 кіламетры ад Суліны. Пасля ўдару 7 з 12 членаў экіпажа зніклі без вестак, а ў пачатку лістапада на борце адбуксіраванага ў балгарскую Варну танкера знайшлі чалавечыя парэшткі шасці маракоў. Расійскае Мінабароны тады таксама апублікавала заяву пра знішчэнне вайсковых грузаў для Украіны, але Марскі рэгістр Сан-Марына афіцыйна пацвердзіў, што ў момант атакі танкер ішоў пустым.

За дзень да апошніх падзей, 13 лістапада, яшчэ адзін беспілотнік пашкодзіў грузавы кран сухагруза LARISSA 1 пад сцягам Палау за 12,6 кіламетра ад румынскага ўзбярэжжа. Агулам з пачатку кастрычніка 2026 года ля берагоў Румыніі і Балгарыі атакам падвергліся прынамсі 13 гандлёвых суднаў.

У сувязі з ростам пагроз Бухарэст прапанаваў чарнаморскім краінам Паўночнаатлантычнага альянсу стварыць сумеснае камандаванне для абароны ад беспілотнікаў і запытаў дадатковую дапамогу ў патруляванні. У адказ на сітуацыю Францыя ўжо часова перабазавала ў Румынію патрульны самалёт Atlantique 2, а камандаванне НАТА абвясціла пра агульнае ўзмацненне групоўкі марской авіяцыі ў рэгіёне.

• 0
• 0
• 0
• 0
• 0
• 0
• 0
• 0