Jeŭrapiejski analityk: Minsk vielmi ŭdała łaviravaŭ u časie ŭkrainskaha kryzisu
«Dla Biełarusi niezaležnaja Ukrajina navat bolš patrebnaja, čym dla Polščy, — miarkuje Vojciech Kanančuk, analityk polskaha Asiarodku ŭschodnich daśledavańniaŭ. – Biełaruś patrabuje Ukrainy jak procivahu dla Rasii. U vypadku papadańnia Ukrainy ŭ rasijskuju zonu ŭpłyvu Biełaruś zastaniecca adzin na adzin z Maskvoj».
Hetaje mierkavańnie analityk vykazaŭ na dyskusii «Ukrainskija padziei praz pryzmu Biełarusi», što prajšła 9 červienia ŭ Biblijatecy Varšaŭskaha ŭniviersiteta.
U dyskusii ŭziali ŭdzieł taksama palitołahi Anais Maren i Ryhor Astapienia, kiraŭnik Case-Biełaruś Sierž Naŭrodski. Vioŭ dyskusiju žurnalist Andrej Pačobut.
Vojciech Kanančuk adznačyŭ vialikuju zaniepakojenaść Biełarusi i Kazachstana — najbližejšych sajuźnikaŭ Rasii. Abiedźvie krainy zrabili dvuchsensoŭnyja zajavy adnosna ŭkrainskich padziej i zrabili niekatoryja zachady, skiravanyja na toje, kab abmiežavać mahčymaści ŭmiašańnia ŭ spravy Biełarusi z boku Rasii.
Kanančuk adznačyŭ, što na Zachadzie niama adnaznačnaj acenki, ci biełaruskaja armija niezaležnaja, ci jana de-fakta stała častkaj rasijskaj. I heta robić niemahčymym prahnoz taho, jak by Biełaruś reahavała ŭ vypadku sproby Rasii dałučyć Biełaruś siłaj.
Anais Maren, jakaja raniej pracavała ŭ Finskim instytucie mižnarodnych adnosin, a ciapier žyvie ŭ Polščy, ličyć, što Minsk vielmi ŭdała łaviravaŭ u časie ŭkrainskaha kryzisu, kab zachavać u cełym niejtralitet. Na dumku Maren, Biełarusi ŭdałosia nie spravakavać Rasii, ale adnačasova prademanstravać Ukrainie dobrasusiedstva.
Ale, ličyć Maren, heta ŭsiaho tolki taktyčnaja pieramoha, a stratehičnyja pierśpiektyvy našaj krainy nieviasiołyja.
Na dumku Maren, Biełaruś sama zaviała siabie ŭ takuju situacyju — i palityčna, i ekanamična, kali joj vielmi ciažka supraciŭlacca namahańniam Rasii dałučyć jaje ŭ jakaści subjekta. A takija namahańni buduć, upeŭnienaja jana, pytańnie tolki, kali. Dla Biełarusi ŭ Kramli rychtujecca nie krymski i nie daniecki, a asablivy scenar.
Skieptycyzm što da pierśpiektyvaŭ Biełarusi vykazaŭ i maderatar Andrej Pačobut. Jon adznačyŭ, što novy prarasijski, prasaviecki trend zachapiŭ i moładź u Biełarusi, i niajasna, kali hetaja chvala źmienicca.
Ciapier čytajuć
Andreja Pačobuta pamianiali na łukašenkaŭskich špijonaŭ, aryštavanych u Polščy44
Kamientary