Ślesar z kałhasa «Rasija»: piać faktaŭ pra Michaiła Ordu, novaha kiraŭnika FPB
Siońnia byŭ abrany novy kiraŭnik Fiederacyi prafsajuzaŭ Biełarusi. Zamiest Leanida Kozika arhanizacyju ŭznačaliŭ Michaił Orda. «NN» sabrała cikavyja fakty pra hetaha čałavieka.
Ślesar, vieterynar, deputat
Michaiłu Ordu 48 hadoŭ. Jon naradziŭsia ŭ Dziatłavie. A pieršym miescam pracy byŭ kałhas «Rasija» ŭ Dziatłaŭskim rajonie (SPK z takoj nazvaj isnuje pa siońniašni dzień), dzie Orda byŭ ślesaram. Skončyŭ novy kiraŭnik prafsajuzaŭ Viciebski vieterynarny instytut, a taksama Rasijskuju akademiju kiravańnia pry prezidencie Rasii.
U 2003 hodzie Michaił Orda ŭznačaliŭ Biełaruski respublikanski sajuz moładzi. Adnu z samych masavych arhanizacyj u krainie. Adnak dobra viadoma jak stvarajecca hetaja masavaść. Studenty ŭstupali ŭ šerahi BRSM u prymusova-dobraachvotnym paradku. Inakš jany mahli nie atrymać miesca ŭ internacie, ci mieć prablemy z raźmierkavańniem. Aby adčapilisia.
Taksama Orda dvojčy byŭ deputatam pałaty pradstaŭnikoŭ. Spačatku ŭ 2000 hodzie jon byŭ «abrany» ad Lidskaj sielskaj akruhi. A ŭ 2008 – pa Dziatłaŭskaj.
Praciŭnik karty palaka
U čas pracy Michaiła Ordy ŭ pałacie pradstaŭnikoŭ jon patrabavaŭ pravieści pravavuju acenku pa karcie palaka. Na jahonuju dumku, vydača karty palaka «naradžaje niedavier i ŭnosić razdor miž ludźmi». «Polskaja dziaržava biare na siabie prava dzialić biełarusaŭ na tych, chto varty prava atrymać kartu i chto nie varty».
Uvohule varta skazać, što ŭ svajoj ideałahičnaj vyvieranaści Michaił Orda nie daŭ zasumniavacca nivodnaha razu. Treba raskrytykavać Jeŭrasajuz, sp.Orda nie admaŭlaŭ, Amieryku – taksama. «Jeŭrasajuz biare na siabie rolu suśvietnaha dyktatara, i heta stała mahčymym tamu, što nie isnuje supraćvahi, jakim raniej byŭ Saviecki Sajuz», — kazaŭ jon.
Chunvejbiny Ordy
Pad kiraŭnictvam Michaiła Ordy ŭ BRSM nieadnarazova prachodzili pikietavańni pasolstvaŭ zachodnich krain. Adbyvałasia heta padčas polska-biełaruskaha dypłamatyčnaha kryzisu ŭ 2005, paśla prezidenckich vybaraŭ 2006 hoda. Kandydata ad apazicyi na prezidenckich vybarach-2006 Alaksandra Milinkieviča «beeresemaŭcy» pravadžali na vakzale ź miotłami, kab jon «vymiataŭsia» z krainy.
Faktyčna, pry Ordzie BRSM vykonvała pracu kitajskich chunviejbinaŭ časoŭ «kulturnaj revalucyi». Pry nastupnych staršyniach hetkaja psieŭdaaktyŭnaść zaŭvažna źmienšyłasia.
Pakinuŭ BRSM Orda ŭ 39-hadovym uzroście. Mabyć, praciahvać zastavacca «moładzievym lidaram» užo nie vypadała.
Čorny śpis
Nie vypadkova, što takoj svajoj aktyŭnaściu Michaił Orda zasłužyŭ prava ŭvachodzić u śpis biełaruskich čynoŭnikaŭ nieŭjaznych na terytoryju Jeŭrasajuza čynoŭnikaŭ. U 2011 hodzie Polšča admoviła jamu i staršyni aficyjnaha Sajuza piśmieńnikaŭ Mikałaju Čarhincu ŭ vydačy viz dla naviedańnia pachavańnia skandalnaha lidara partyi «Samaabarona» Andžeja Lepiera.
Praca z zasłužanymi piensijanierami
Choć Michaił Orda i addany pracaŭnik, ale da vysokich pasadaŭ va ŭradzie ci Administracyi prezidenta, dzie prymajucca važnyja rašeńni, jon tak i nie dasłužyŭsia. Apošniaj jahonaj pracaj była cichaja i niapylnaja pasada ŭ pastajannym pradstaŭnictvie sajuznaj dziaržavy ŭ Minsku. Kudy čaściej adpraŭlajuć zasłužanych piensijanieraŭ, jak byłych ministra ŭnutranych spravaŭ Anatola Kulašova, pa padatkach i zborach Hannu Dziejku, kiraŭnika prezidenckaj kancylaryi Uładzimira Maćviejčuka, vice-premjera Ivana Bambizu.
Darečy, u BRSM Orda mieŭ vielmi vyraznuju mianušku. Jana składałasia ź pieršaj litary jahonaha imia i ŭsiaho proźvišča.
Kamientary