Machlaram bolš nie patrebny vaš parol. Jany mohuć skraści «ličbavy kluč» i atrymać dostup da akaŭnta navat pry dvuchfaktarnaj abaronie

Vy ŭvajšli ŭ internet-bankinh, pravieryli bałans, apłacili rachunki i zakryli noŭtbuk. A praź niekatory čas vyśviatlajecca, što vašym bankaŭskim akaŭntam zavałodali machlary, choć jany nie viedali ni parola, ni koda paćviardžeńnia.

Jak tłumačać ekśpierty, takoje mahčyma praz kradziež tak zvanych siesijnych cookie-fajłaŭ. Kali čałaviek uvachodzić na sajt, toj zachoŭvaje na jaho pryładzie ŭnikalny identyfikatar, dziakujučy jakomu «pamiataje» karystalnika i nie patrabuje paŭtornaj aŭtaryzacyi pry pierachodzie pamiž staronkami.

«Ujavicie siesijny cookie jak ličbavy kluč, jaki ŭžo paviarnuli ŭ zamku. Kali chakier vykradzie hety aktyŭny fajł, jon faktyčna stanovicca vami. Jamu nie patrebny parol, jon nie vyklikaje papiaredžańnia pra novy ŭvachod i časta moža abyści šmatfaktarnuju aŭtentyfikacyju», — tłumačyć techničny dyrektar kampanii NordVPN Maryjus Bryjedzis.

Pavodle jaho słoŭ, cookie-fajły stali adnoj z hałoŭnych mišeniaŭ chakieraŭ. Za hod, jaki skončyŭsia ŭ červieni, śpiecyjalisty NordVPN vyjavili 52 miljardy cookie-fajłaŭ siarod skradzienych danych, jakija raspaŭsiudžvalisia ŭ internecie.

Jak machlary atrymlivajuć dostup da akaŭntaŭ

Čaściej za ŭsio cookie kraduć z dapamohaj škodnasnych prahram, jakija karystalnik sam, nie padazrajučy pra niebiaśpieku, ustaloŭvaje na svaju pryładu. Jany mohuć chavacca ŭ prahramach ci pašyreńniach dla braŭziera.

Paśla zaražeńnia škodnasnaja prahrama znachodzić u braŭziery aktyŭnyja siesijnyja cookie i pierasyłaje ich złamyśnikam. Tyja mohuć vykarystać skradzieny identyfikatar, kab atrymać dostup da akaŭnta, pakul sieans zastajecca sapraŭdnym. Achviara pry hetym moža doŭha ničoha nie padazravać, bo dla jaje ŭsio vyhladaje jak zvyčajnaja praca ŭ internecie.

Nastupstvy zaležać ad taho, jaki mienavita akaŭnt uzłamali. Atrymaŭšy dostup da elektronnaj pošty ci sacyjalnych sietak, machlary mohuć rassyłać paviedamleńni ad imia ŭładalnika i padmanvać jaho znajomych. U internet-kramach jany mohuć źmianiać adrasy dastaŭki i vykarystoŭvać zachavanyja płaciežnyja danyja. Atrymaŭšy dostup da internet-bankinhu, złamyśniki mohuć skarystacca znojdzienaj tam infarmacyjaj, kab vydavać siabie za ŭładalnika rachunku i ździajśniać machlarstva.

Jak abaranicca

Śpiecyjalisty rajać pieradusim uvažliva stavicca da prahram i pašyreńniaŭ dla braŭziera, jakija vy ŭstaloŭvajecie. Mienavita praź ich na pryłady niaredka traplaje škodnasnaje prahramnaje zabieśpiačeńnie.

Prykmietami zaražeńnia mohuć być raptoŭnaje zapavoleńnie pracy kampjutara ci telefona, chutkaje razradžeńnie batarei, častyja zboi, niečakanyja pieranakiravańni na inšyja sajty abo źjaŭleńnie rekłamy i ŭspłyvajučych voknaŭ.

Śpiecyjalisty taksama rajać nie prosta zakryvać układku braŭziera, a vychodzić z akaŭnta praz knopku «Vyjści». Samo pa sabie zakryćcio ŭkładki nie zaŭsiody zaviaršaje sieans, tady jak vychad z akaŭnta zvyčajna robić adpaviedny siesijny cookie niesapraŭdnym.

Taksama varta rehularna vydalać cookie-fajły, a dla zachoŭvańnia parolaŭ vykarystoŭvać asobny mieniedžar parolaŭ.

Kali jość padazreńnie, što pryłada zaražanaja, nieabchodna pravieryć jaje antyvirusam, zaviaršyć usie aktyŭnyja sieansy ŭ svaich akaŭntach i źmianić paroli. Kali zaŭvažyli padazronyja bankaŭskija apieracyi, treba nieadkładna źviazacca z bankam.

Niahledziačy na toje, što kradziež siesijnych cookie moža dazvolić abyści šmatfaktarnuju aŭtentyfikacyju, śpiecyjalisty ŭsio adno rajać jaje vykarystoŭvać, bo jana zabiaśpiečvaje bolšuju abaronu, čym adzin tolki parol.

• 4
• 1
• 1
• 3
• 5
• 0
• 1
• 0