Ukrainskija bieśpiłotniki pačali čaściej atakavać rasijskija mietałurhičnyja pradpryjemstvy paśla taho, jak administracyja Donalda Trampa damahłasia ad Kijeva prypynieńnia ŭdaraŭ pa naftapierapracoŭčych zavodach, pahražajučy adklučyć Ukrainie dostup da danych Starlink, piša The Moscow Times.
Z pačatku 2026 hoda da siaredziny kastryčnika Uzbrojenyja siły Ukrainy nie mienš za 114 razoŭ atakavali rasijskija NPZ. Pavodle infarmacyi The Moscow Times, heta pryviało da skaračeńnia abjomaŭ pierapracoŭki nafty ŭ Rasii prykładna na tracinu i vyklikała paliŭny kryzis u roznych rehijonach krainy — ad Sibiry da Maskvy.
U kastryčniku paśla abviaščeńnia Trampam «enierhietyčnaha pieramirja» ŭdary pa NPZ spynilisia. Apošnimi siarod takich abjektaŭ byli atakavanyja zavod u Razani 15 kastryčnika i pradpryjemstva ŭ Surhucie 16 kastryčnika.
Novymi celami ŭkrainskich bieśpiłotnikaŭ stali mietałurhičnyja pradpryjemstvy. 26 kastryčnika pad udar trapiŭ Jakaŭleŭski horna-ŭzbahačalny kambinat, jaki ŭvachodzić u kampaniju «Sievierstal» miljardera Alaksieja Mardašova. Pradpryjemstva, jakoje zabiaśpiečvaje kampaniju syravinaj ź Jakaŭleŭskaha radovišča, častkova zastałosia biez elektryčnaści. Rabotnikaŭ šachty daviałosia padymać na pavierchniu. Paśla papiaredniaj ataki ŭ pačatku kastryčnika kambinat užo byŭ vymušany pracavać u abmiežavanym režymie.
U noč na 28 kastryčnika pad ataku trapiŭ Navalipiecki mietałurhičny kambinat, jaki naležyć miljarderu Uładzimiru Lisinu. Heta najbujniejšy mietałurhičny zavod Rasii, na dolu jakoha prypadaje kala 20% vytvorčaści stali ŭ krainie. Pavodle źviestak OSINT-kanałaŭ, pa pradpryjemstvie ŭdaryli rakietami Storm Shadow. Na zavodzie ŭźnik pažar.
Novyja ataki mohuć pahoršyć stanovišča rasijskaj mietałurhičnaj haliny, jakaja ŭžo i tak pieražyvaje surjozny kryzis. Paśla ŭviadzieńnia zachodnich sankcyj vytvorcy stracili kala traciny ekspartnych rynkaŭ. Adnačasova ŭ Rasii źniziŭsia ŭnutrany popyt na mietał praz spad u budaŭnictvie, zapavoleńnie ekanomiki i vysokija kredytnyja staŭki.
Praź ciažkaści sa zbytam mietałurhičnyja kampanii letaś skaracili vypłaŭku stali da najnižejšaha ŭzroŭniu za 15 hadoŭ. U studzieni — mai 2026 hoda vytvorčaść źmienšyłasia jašče na 8,4% u paraŭnańni z anałahičnym pieryjadam minułaha hoda i skłała 26,6 miljona ton.
Analityki servisa «ŚbierInviesticii» nazvali situacyju ŭ halinie biesprecedentnym kryzisam, adznačyŭšy praciahłaść i hłybiniu padzieńnia. Za pieršaje paŭhodździe 2026 hoda čysty prybytak Navalipieckaha kambinata źniziŭsia bolš čym udvaja — z 45,6 da 21 miljarda rubloŭ. U «Sievierstali» jon skaraciŭsia ŭ dzieviać razoŭ, da 4,12 miljarda rubloŭ. Mahnitahorski mietałurhičny kambinat za toj ža pieryjad atrymaŭ čystyja straty ŭ pamiery 19,1 miljarda rubloŭ, a jaho vyručka źmienšyłasia na 10%.
Analityki «Śbiera» papiaredžvali, što ŭ 2026 hodzie prybytak rasijskich staleliciejnych pradpryjemstvaŭ moža apuścicca da najnižejšaha ŭzroŭniu za niekalki dziesiacihodździaŭ.
Pamiatajecie Piatrušu, jaki vydziraŭ draty «dydžejam Pieramien»? Jaho pieraviali ŭ treciuju lihu čynoŭnikaŭ paśla miesiacaŭ biespracoŭja7
Pamiatajecie Piatrušu, jaki vydziraŭ draty «dydžejam Pieramien»? Jaho pieraviali ŭ treciuju lihu čynoŭnikaŭ paśla miesiacaŭ biespracoŭja
«Paśla pieršaha zabojstva ź im raźviałasia žonka». Što viadoma pra šmatdzietnaha Siarhieja sa Stolinskaha rajona, jaki paśla vyzvaleńnia z kałonii zabiŭ troch čałaviek44
Kamientary