Ukrainka aburyłasia, što ŭ sałonie Varšavy jaje pastryhła rasijanka. Vyśvietliłasia, što majstar — biełaruska

Publikacyja nabrała bolš za 350 tys. prahladaŭ i kala 1,2 tys. kamientaryjaŭ. Karystalniki źviarnuli ŭvahu, što majstarka moža być biełaruskaj. Most źviazaŭsia z sałonam, dzie paćvierdzili: dziaŭčyna sapraŭdy ź Biełarusi, a supracoŭnikaŭ nie prymušajuć razmaŭlać na peŭnaj movie.

«Chaču padtrymlivać ukraincaŭ za miažoj»

Historyja pačałasia z publikacyi karystalnicy Threads pad nikam valerii_7_. Jana raskazała, što nieadnarazova naviedvała sałon pryhažości Pied-de-poule u Varšavie. Raniej žančyna karystałasia pasłuhami ŭstanovy ŭ rajonie Vilanaŭ i zastałasia zadavolenaja absłuhoŭvańniem.

24 kastryčnika jana zapisałasia na stryžku ŭ inšy filijał sałona pa adrasie Piękna 49. Pa słovach klijentki, zapis prachodziŭ na ŭkrainskaj movie, a administratarka kamunikavała z naviedvalnikami na ŭkrainskaj, polskaj abo ruskaj — u zaležnaści ad klijenta.

Adnak padčas stryžki žančyna źviarnuła ŭvahu, što majstarka praktyčna nie razmaŭlała ź joj pa-ŭkrainsku.

— Ja źviartałasia pa-ŭkrainsku, a ŭ adkaz čuła pieravažna «uhu». Za ŭsiu praceduru — litaralna niekalki fraz pa-rusku, — napisała klijentka.

Paśla naviedvańnia sałona jana vyrašyła znajści staronku cyrulnicy ŭ Instagram. Tam žančyna vyjaviła infarmacyju, jakaja jaje aburyła. Pa śćviardžeńni aŭtarki publikacyi, majstarka ŭ 2022 hodzie prachodziła navučańnie cyrulnickaj spravie ŭ Rasii. U paćviardžeńnie jana apublikavała skrynšoty, u tym liku dypłom ź imiem śpiecyjalistki i dataj.

— Ja idu ŭ ukrainski sałon. Chaču padtrymlivać ukraincaŭ za miažoj, — rastłumačyła žančyna.

Jana taksama publična źviarnułasia da pradstaŭnikoŭ sałona z pytańniem, ci ličać jany narmalnym nie papiaredžvać klijentaŭ pra pachodžańnie supracoŭnikaŭ.

U kamientaryjach zajavili, što cyrulnica — biełaruska

Publikacyja vyklikała aktyŭnaje abmierkavańnie. Niekatoryja karystalniki padtrymali ŭkrainku, adznačyŭšy, što razumiejuć jaje niežadańnie karystacca pasłuhami rasijan na fonie vajny, jakaja praciahvajecca. Adnak inšyja kamientatary źviarnuli ŭvahu, što pra čałavieka nielha sudzić pa pašparcie i da taho ž mnohija rasijanie nie padtrymlivajuć vajnu. Akramia taho, aŭtarcy ŭkazali na mahčymuju pamyłku: pa ich śćviardžeńniach, cyrulnica zusim nie rasijanka, a biełaruska.

— Jana ž biełaruska. Litaralna ŭ profili biełaruski ściah, — napisaŭ adzin z karystalnikaŭ.

Inšy ŭdzielnik abmierkavańnia taksama źviarnuŭ uvahu, što na staroncy śpiecyjalistki jość fatahrafija z hieałakacyjaj Biełarusi i što majstarka nieabaviazkova padzialaje pazicyju rasijskich uładaŭ adnosna vajny suprać Ukrainy.

U kamientaryjach razharnułasia dyskusija pra toje, ci majuć prava klijenty patrabavać absłuhoŭvańnia supracoŭnikami peŭnaj nacyjanalnaści. Častka karystalnikaŭ padtrymała pazicyju ŭkrainki. Jany ličać, što ŭstanova, jakaja pazicyjanuje siabie jak ukrainskaja, pavinna ŭličvać staŭleńnie klijentaŭ da Rasii i papiaredžvać ich pra pachodžańnie supracoŭnikaŭ.

Inšyja ŭdzielniki abmierkavańnia vystupili suprać takoha padychodu.

— Navat kali sałon pazicyjanuje siabie jak ukrainski, heta aŭtamatyčna nie aznačaje, što kožny jaho supracoŭnik abaviazany być ukraincam, — napisała adna z karystalnic.

Jašče adna ŭdzielnica dyskusii, jakaja pradstaviłasia biełaruskaj, raskazała, što pracuje z ukraincami, jakija kamunikujuć ź joj na ŭkrainskaj movie, a jana adkazvaje im pa-rusku. Pa jaje słovach, heta nie pieraškadžaje kaleham razumieć adzin adnaho.

Inšaja ŭkrainka zastupiłasia za rasijan i biełarusaŭ

Historyja vyklikała reakcyju nie tolki ŭ kamientaryjach da pieršapačatkovaj publikacyi. Inšaja karystalnica Threads pad nikam no.more.8 apublikavała asobny dopis, u jakim vystupiła suprać ckavańnia rasijan i biełarusaŭ, jakija nie padtrymlivajuć vajnu i aŭtarytarnyja režymy.

— Toje, što ja siońnia ŭbačyła ŭ Threads, mianie vielmi zasmuciła. Ja chaču, kab ludzi, jakija biahuć ad režymaŭ, viedali, što ich padtrymlivajuć, — napisała žančyna.

Pa jaje słovach, jana taksama pasprabavała vykazać svaju pazicyju ŭ abmierkavańni, adnak aŭtarka pieršapačatkovaj publikacyi jaje zabłakavała.

— Rasijanie i biełarusy, jakija nie zhodnyja z vajnoj i režymam, biahuć sa svaich krain za inšym žyćciom, žyvuć pa zakonie i paradku, nie pavinny sutykacca ź nianaviściu, pieraśledam i ckavańniem, — ličyć karystalnica.

Što raskazali ŭ sałonie

Most źviazaŭsia z pradstaŭnikom sałona pryhažości Pied-de-poule ŭ Varšavie, dzie pracuje cyrulnica, jakaja apynułasia ŭ centry abmierkavańnia. Va ŭstanovie paćvierdzili, što dziaŭčyna sapraŭdy biełaruska.

Pradstaŭnica sałona patłumačyła, što ŭ Varšavie žyvuć ludzi roznych nacyjanalnaściaŭ, tamu va ŭstanovie pracujuć supracoŭniki z roznych krain, u tym liku ź Biełarusi. Pry hetym nijakich patrabavańniaŭ razmaŭlać z klijentami vyklučna na ŭkrainskaj movie niama.

— Jany razmaŭlajuć na toj movie, na jakoj im zručna, jakuju ŭsie razumiejuć. U cełym, na žal, tak, ruskuju ŭsie razumiejuć, i biełarusy. Tamu bolšaść razmaŭlaje tak. I ja nie mahu skazać, što chtości kamuści niešta vinien, — adkazała pradstaŭnica sałona na pytańnie, ci abaviazany biełaruskija cyrulniki razmaŭlać z ukrainskimi klijentami pa-ŭkrainsku.

Most taksama pacikaviŭsia, jak adčuvaje siabie biełaruska paśla šmatlikich publikacyj i kamientaryjaŭ u Threads.

— Tak, usio absalutna ŭ paradku. Toje, što ŭ Threads, zastajecca ŭ Threads. Nakolki ja viedaju, u nas nijakich prablem niama, — zapeŭniła surazmoŭnica.

• 3
• 0
• 5
• 47
• 0
• 2
• 3
• 0