Łatuška: Pieramovy pa Ukrainie mohuć adkryć mahčymaści dla Biełarusi. Demsiły pavinny być za stałom

Ničoha pra nas biez nas — stratehija Łatuški i NAU

Zvarot byłych palityčnych źniavolenych z zaklikam vyzvalić tych, chto zastajecca ŭ turmach, i spynić represii maje važnaje značeńnie.

Taksama važna adznačyć i toje, što šmat u čym u acency situacyi i nieabchodnych krokaŭ aŭtary sychodziacca z toj stratehijaj, jakuju vyznačyli i jakoj prytrymlivajucca instytuty demsił: Kabiniet i Kaardynacyjnaja rada.

My nikoli nie zabyvali i nie majem prava zabyvać pra losy ludziej, jakija pakutujuć ad represiŭnaj palityki režymu Łukašenki.

Pry hetym nieabchodna jasna razumieć: adkaznaść za toje, što adbyvajecca, niasie vyklučna režym. Nie Jeŭrapiejski sajuz, nie Złučanyja Štaty Amieryki, a mienavita dyktatar Łukašenka, jaki zachapiŭ uładu ŭ krainie i pieraśleduje luboje inšadumstva.

Ja zaŭsiody ličyŭ i praciahvaju ličyć vyzvaleńnie ludziej pryjarytetam. Niama ničoha bolš kaštoŭnaha za čałaviečaje žyćcio i los. Razam z tym važna pamiatać, što stratehičnaj metaj dla nas źjaŭlajecca dasiahnieńnie sistemnych źmien u Biełarusi.

U suviazi z hetym nieabchodna kompleksna damahacca nastupnaha:

1. Spynieńnia represij i vyzvaleńnia ŭsich palitviaźniaŭ.

2. Svabodnaha viartańnia biełaruskich emihrantaŭ, aktyvistaŭ i palitykaŭ i harantyj niepieraśledu.

3. Dekryminalizacyi palityčnaj i hramadzianskaj dziejnaści, uklučajučy dziejnaść palityčnych partyj i niaŭradavych arhanizacyj u Biełarusi.

4. Dekryminalizacyi dziejnaści niezaležnych ŚMI ŭ Biełarusi.

5. Źmieny palityčna matyvavanaj praktyki prymianieńnia kryminalnaha zakanadaŭstva pravaachoŭnymi orhanami ŭ dačynieńni da palitykaŭ i pradstaŭnikoŭ hramadzianskaj supolnaści.

6. Admieny narmatyŭnych aktaŭ, jakija abmiažoŭvajuć pravy biełarusaŭ za miažoj, i likvidacyi źviazanych ź imi abmiežavańniaŭ: u śfiery pašpartnych pasłuh, ździajśnieńnia nataryjalnych dziejańniaŭ i ŭdziełu ŭ hałasavańni za miažoj.

7. Praviadzieńnia kruhłaha stała z demakratyčnymi siłami.

8. Spynieńnia ŭdziełu Biełarusi ŭ vajnie i padtrymki ahresiŭnych dziejańniaŭ Rasii.

9. Reabilitacyi niezakonna asudžanych i tych, chto zaznaŭ represii, a taksama admieny ŭsich palityčna matyvavanych rašeńniaŭ pa kryminalnych i administracyjnych spravach.

10. Viartańnia kanfiskavanaj i aryštavanaj majomaści.

Padstavy dla ŭviadzieńnia sankcyj Jeŭrapiejskaha sajuza i ZŠA majuć kompleksny charaktar. Tamu i vypracoŭka palityki ES u dačynieńni da Łukašenki patrabuje kompleksnaha padychodu. Siońnia niama bačnych pryčyn dla źmieny palityki ES u dačynieńni da režymu Łukašenki. Praciahvajucca represii, hibrydnaja ahresija suprać dziaržaŭ — členaŭ ES i padtrymka ahresii suprać Ukrainy.

Režym Łukašenki ažyćciaŭlaje samyja maštabnyja transnacyjanalnyja represii ŭ Jeŭropie ŭ XXI stahodździ suprać jeŭrapiejskaha biełaruskaha naroda.

Łukašenka praciahvaje sadziejničać destabilizacyi ŭnutrypalityčnaj i hramadskaj situacyi ŭ ES. Robiacca masavyja sproby viarboŭki hramadzian Biełarusi na terytoryi dziaržaŭ — členaŭ ES. Pry padtrymcy śpiecsłužbaŭ u ES ździajśniajucca akty dyviersij i sabatažu.

Sankcyi ŭviedzienyja pa roznych padstavach: za parušeńni pravoŭ čałavieka, hibrydnuju ahresiju suprać ES, zachop hramadzianskaha samalota i padtrymku ahresii. Znajści prostaje rašeńnie ŭ hetaj situacyi składana. Samym pramym vychadam stała b źmianieńnie palityki samim Łukašenkam. A dla taho, kab heta adbyłosia, jon i dalej pavinien adčuvać mocny cisk i razumieć, što raskałoć Jeŭrapiejski sajuz nie ŭdasca. Tamu važna, kab ES zajmaŭ uzvažanuju, mocnuju i adzinuju pazicyju pa Biełarusi.

Adnačasova nadzvyčaj važnaja ciesnaja, instytucyjnaja kaardynacyja ES z demakratyčnymi siłami, našymi instytutami i arhanizacyjami hramadzianskaj supolnaści. Nieabchodnaja adzinaja, skaardynavanaja pazicyja ES i demsił.

My majem prava być paŭnapraŭnymi ŭdzielnikami lubych kantaktaŭ z režymam Łukašenki, jakija datyčacca losu Biełarusi. Siońnia, źviartajučysia da našych jeŭrapiejskich partnioraŭ, ja padkreślivaju: kali Łukašenka stukajecca ŭ vašy dźviery, adkazvajcie adnym hołasam — niachaj pačynaje dyjałoh z hramadzianskaj supolnaściu i demakratyčnymi siłami. My, biełarusy, subjekt, a nie abjekt. Ničoha pra Biełaruś i biełarusaŭ — bieź biełarusaŭ.

Miarkuju, u najbližejšyja miesiacy moža adkrycca akno mahčymaściaŭ u suviazi z padychodami da pieramoŭ pa Ukrainie, jakija ciapier aktyŭna abmiarkoŭvajucca. I tut važna adkryć akno mahčymaściaŭ dla situacyi ŭ Biełarusi.

Nam stratehična važna ŭžo ciapier damahacca ŭklučeńnia biełaruskaha pytańnia ŭ ich paradak dnia. Pieramovy pra mir va Ukrainie mohuć jak stvaryć pieradumovy dla vyzvaleńnia palityčnych źniavolenych u Biełarusi z adnačasovym spynieńniem represij, tak i stać ryčahom dla dasiahnieńnia bolš hłybokich źmien u našaj krainie.

Pierad nami staić kałasalny vyklik: ci budziem my pad stałom pieramoŭ, na stale, dzie nas buduć dzialić, ci za stałom — u jakaści ŭdzielnikaŭ? Chto budzie pradstaŭlać našy intaresy? Chto stanie našymi sajuźnikami? Biezumoŭna, takimi sajuźnikami mohuć być Jeŭrapiejski sajuz, Ukraina i, spadziajusia, ZŠA.

• 1
• 0
• 1
• 1
• 0
• 0
• 0
• 0