Rektar EHU Polik sydzie ŭ adstaŭku. Praces vybaru novaha rektara choča kantralavać SIDA
V.a. staršyni Kiraŭničaj rady Jeŭrapiejskaha humanitarnaha ŭniviersiteta (EHU) En Łonsdejł abviaściła, što prafiesar Devid Polik sydzie z pasady rektara pry kancy leta. Pry hetym paviedamlajecca, što heta nie daterminovy sychod, a skančeńnie dvuchhadovaha terminu «znachodžańnia ŭ EHU pavodle pieršapačatkovaha płanu», paviedamlajecca ŭ pres-relizie ŭniviersiteta.
Adstaŭka supała z publikacyjaj spravazdačy ab dziejnaści EHU, zroblenaj mižnarodnaj kampanijaj Deloitte, u jakoj havaryłasia pra nadzvyčaj vysokija zarobki i traty Polika na pasadzie rektara. Spravazdača mahła stać pryčynaj ci adnoj z pryčynaŭ spynieńnia finansavańnia EHU Paŭnočnaj radaj, choć sama Rada nazyvaje inšyja pryčyny.
Cćviardžajecca, što Polik chacieŭ syści raniej, adnak «pa prośbie Vykanaŭčaha kamiteta Rady łaskava pahadziŭsia praciahnuć termin da kanca biahučaha navučalnaha hoda, kab zaviaršyć praces stratehičnaha płanavańnia i raspracoŭki novaha błoka ahulnaŭniviersiteckich kursaŭ, a taksama dać mahčymaść pravieści prafiesijny mižnarodny pošuk novaha rektara. Kiraŭničaja rada hłyboka ŭdziačnaja praf. Poliku za hatoŭnaść pajści nasustrač supolnaści EHU ŭ taki važny dla nas čas», — piša Łonsdejł.
Abrańnie Polika vyklikała abureńnie mnohich vykładčykaŭ EHU i pratesty biełaruskaj hramadzianskaj supolnaści. Jak adznačałasia ŭ vynikach aŭdytu, praviedzienaha kampanijaj Deloitte, pracedura abrańnia parušałasia, a pieramožcam urešcie vyjšaŭ čałaviek, jaki nie viedaje ni rasiejskaj, ni biełaruskaj movaŭ i nikoli nie pracavaŭ ź Biełarusi ani ŭ rehijonie.
Pry hetym Poliku była vyznačanaja hihanckaja zarpłata plus vypłaty.
Dahetul niajasna, ci było abrańnie Polika idejaj prafiesara Michajłava, doŭhaterminovaha rektara EHU, jaki pierajšoŭ na pasadu prezidenta, ci Kiraŭničaj rady.
Niekatoryja naziralniki vykazvali mierkavańnie, što prychod Polika mieŭ na mecie stvaryć apraŭdańnie dla padvyšeńnia zarobkaŭ administracyi EHU. Inšyja tłumačyli kandydaturu Polika jahonymi asabistymi suviaziami z členami Kiraŭničaj rady. Aleju ŭ ahoń padliŭ kaardynatar vypusknikoŭ EHU Sierž Charytonaŭ, jaki vyjaviŭ, što Polik davioŭ da bankructva papiaredni kaledž, jaki ŭznačalvaŭ, pry hetym jaho i tam abvinavačvali ŭ praźmiernych zarobkach.
En Łonsdejł u svajoj zajavie piša: «Dla nas — Kiraŭničaj rady — zaŭždy było vidavočna, što praf. Polik mieŭ namier pracavać tut tolki dva hady. Ja taksama vielmi ŭdziačnaja za toje, što jon pahadziŭsia zastacca na bolš doŭhi termin, pakul nie pačnie rabotu novy rektar. My ŭskłali na jaho ciažkija abaviazki: stvareńnie i realizacyju stratehičnaha płana, poruč sa značnym skaračeńniem univiersiteta ŭ adkaz na źnižeńnie kolkaści studentaŭ u rehijonie i nieabchodnaściu padvysić efiektyŭnaść vydatkaŭ. Heta nadzvyčaj składanaja kiraŭničaja zadača, ale dziakujučy jaho bliskučamu akademičnamu kiravańniu i aktyŭnaj padtrymcy z boku kaleh pa EHU jana nabližajecca da zaviaršeńnia i budzie zavieršanaja da jaho sychodu ŭletku 2016 h. My niejmavierna ŭdziačnyja Devidu za jaho niastomnuju pracu na karyść univiersiteta. My žadajem jamu ŭsiaho samaha najlepšaha ŭ jaho novych pačynańniach».
U pres-relizie EHU adznačajecca, što Polik za čas svajho znachodžańnia na pasadzie «ažyćciaviŭ nastupnyja zadačy, jakija byli jamu daručanyja Kiraŭničaj radaj:
- pryviadzieńnie ŭniviersiteta ŭ adpaviednaść z pracoŭnym zakanadaŭstvam Litvy;
- paśpiachovaja pieraakredytacyja ŭniviersiteta;
- pierapracoŭka Statuta ŭniviersiteta;
- novaja partycypatarnaja struktura kiravańnia;
- restrukturyzacyja kiraŭnictva;
- novy partycypatarny biudžetny praces;
- aŭtsorsinh IT-pasłuh;
- biudžetnyja skaračeńni zvyš 25% apieracyj;
- udzieł u piaci aŭdytach univiersiteckich finansaŭ i pracedur».
U pres-relizie adznačajecca, što budzie praviedzieny adkryty mižnarodny pošuk novaha rektara i što «Šviedskaje ahienctva mižnarodnaha raźvićcia (SIDA) budzie hrać važnuju rolu ŭ pracesie pryniaćcia hetych rašeńniaŭ. Jany patrabujuć, kab my skarystalisia pasłuhami pošukavaj firmy, jakuju jany sami pryznačać.
Pošuk raspačniecca naprykancy maja i, jak my spadziajomsia, zavieršycca adboram kandydata-finalista Kiraŭničaj radaj EHU ŭ vieraśni 2016 hoda, kab novy Rektar moh raspačać pracu ŭžo ŭ pačatku nastupnaha navučalnaha hoda».
Hałoŭnaj prablemaj EHU stała źnižeńnie kolkaści studentaŭ. Na siońnia tam na vočnaj formie navučajecca ŭsiaho kala 500 čałaviek — mienš, čym na siarednim fakultecie biełaruskaj VNU.
Ahulnaja kolkaść studentaŭ EHU pamienšała za apošnija šeść hadoŭ z 1965 da 1050.
Kolkaść vykładčykaŭ za hety ž čas pamienšała z prykładna 250 da 170.
Kamientary