U minskim mietrapalitenie prakamientavali incydent z absypańniem farby na stancyjach mietro
U internecie raspaŭsiudzili fota sa stancyj mietro «Aeradromnaja» i «Słucki haściniec», dzie sa ścien absypałasia farba.
U Minskim mietrapalitenie paćvierdzili najaŭnaść niedachopaŭ tolki na adnoj stancyi, pišuć «Minsk-naviny».
— Na puciavoj ścianie stancyi mietro «Aeradromnaja» absypałasia farba. Našy rabotniki adrazu heta zaŭvažyli, i ŭ noč z 28 na 29 listapada śpiecyjalisty začyścili hety ŭčastak, — raskazaŭ aficyjny pradstaŭnik pradpryjemstva Andrej Drob. — Pakolki hety abjekt znachodzicca na harantyi, pradstaŭniki mietrapalitena źviarnulisia ŭ arhanizacyju, jakaja zabiaśpiečvaje harantyjnaje absłuhoŭvańnie. Jana budzie pravodzić kompleks mierapryjemstvaŭ pa likvidavańni zaŭvah.
Fatahrafija ž sa stancyi mietro «Słucki haściniec» užo archiŭnaja — ciapier tam usio ŭ paradku, paviedamlaje «Minski mietrapaliten».
Kamientary