U centry Mahilova znosiać histaryčny chlebazavod: zamiest art-prastory, jakuju prasili haradžanie, tam moža źjavicca 18‑paviarchovy ofisny hmach
U histaryčnym centry Mahilova pačali znosić kompleks budynkaŭ byłoha chlebazavoda №2. Pramysłovyja karpusy, uźviedzienyja jašče ŭ 1930‑ia hady, doŭhi čas stajali zakinutymi. Mahiloŭcy ŭskładali šmat spadziavańniaŭ na hetaje miesca, maračy pra modnuju łoft-prastoru, jak u stalicy. Ale haradskija ŭłady, vidać, dali kart-błanš čarhovamu prajektu, jaki idzie nasupierak zakonu.
Pavodle miascovych miedyja, chlebazavod №2 na zavułku Mihaja, 3 nie funkcyjanavaŭ užo bolš za 15 hadoŭ. Hety abjekt — uzor savieckaha kanstruktyvizmu — pieražyŭ vajnu i doŭhija hady karmiŭ horad, adnak apošnija dziesiacihodździ budynki pustavali, terytoryja była zakinutaj, a kanstrukcyi dajšli da avaryjnaha stanu.
Znos stavić kropku na nadziejach haradžan pieratvaryć kompleks u kulturny kłastar. Placoŭku addajuć pad kamiercyjnuju zabudovu.
Što mienavita źjavicca na miescy chlebazavoda, aficyjna pakul nie abvieščana. Adnak raniej paviedamlałasia pra intares pryvatnych inviestaraŭ i mahčymuju realizacyju šmatfunkcyjanalnaha kompleksu David Plaza. Jaho kancepcyja była prezientavanaja ŭ pačatku hoda Mahiloŭskamu harvykankamu pryvatnym unitarnym pradpryjemstvam «DAVID Płaza», zarehistravanym tolki ŭ lipieni 2024 hoda ŭ vioscy Zacišša Viejnianskaha sielsavieta.
Miarkujučy pa rendarach, jakija publikavalisia ŭ ŚMI, David Plaza — heta maštabny kompleks, jaki składajecca z dvuch vyšynnych abjomaŭ, abjadnanych ahulnym styłabatam, što zojmie ŭsiu ŭnutrykvartalnuju prastoru.
Vyšynia najvyšejšaha z abjomaŭ dasiahaje kala 18 pavierchaŭ. I heta ŭ samym sercy histaryčnaha centra, pobač z 2-3‑paviarchovymi kamianicami XIX — pačatku XX stahodździa.
Telehram-kanał «Spadčyna» źviartaje ŭvahu na toje, što takija paramietry hruba parušajuć zakanadaŭstva — vyšynia pieravyšaje dapuščalnuju adrazu ŭ šeść razoŭ.
Zhodna z prajektam zon achovy histaryčnaha centra Mahilova, były chlebazavod znachodzicca ŭ miežach achoŭnaj zony, u kvartale typu II. U pierymietralnaj zabudovie takich kvartałaŭ zabaroniena ŭzvodzić budynki ŭ niecharakternych dla histaryčnaha asiarodździa formach i vyšej za maksimalnuju adznaku dachu prylehłych histaryčnych damoŭ.
A ŭnutry takich kvartałaŭ — mienavita tam, dzie płanujuć raźmiaścić David Plaza, — zabaroniena budavać vyšej za 11 m ad uzroŭniu ziamli da vyšejšaj kropki dachu, što prykładna adpaviadaje trom paviercham. Prajekt ža praduhledžvaje kala 18 pavierchaŭ.
Kali na miescy chlebazavoda sapraŭdy paŭstanie hety hmach, heta budzie śviedčyć pra toje, što inviestar atrymaŭ ad miascovych uładaŭ kart-błanš na parušeńnie zaćvierdžanych rehłamientaŭ.
Mahiloŭcy ž chacieli bačyć na hetym miescy rekanstrujavany i adnoŭleny histaryčny budynak. Jašče ŭ 2018 hodzie aktyŭnyja haradžanie źbirali podpisy pad pietycyjaj za zachavańnie pomnika i jaho revitalizacyju.
Haradžanie prapanoŭvali pajści pa šlachu Minska, dzie stary chlebazavod u Rakaŭskim pradmieści ŭdała transfarmavali ŭ papularnuju hramadskuju prastoru.
U Mahilovie isnavała ŭnikalnaja mahčymaść stvaryć sapraŭdny «Kvartał mastactvaŭ». Łakacyja idealna padychodziła dla hetaj mety, bo terytoryja zavodu miažuje z muziejem Białynickaha-Biruli, dziciačaj škołaj vyjaŭlenčych mastactvaŭ i muziejem u histaryčnym pažarnym depo. Aktyvisty prapanoŭvali adkryć u cechach byłoha pradpryjemstva «Muziej chleba» ź piakarniaj, halerei, majsterni dla mastakoŭ i litaraturnaje art-kafe.
Adnak hołas hramadskaści pačuty nie byŭ. Zamiest stvareńnia ŭnikalnaha turystyčnaha abjekta horad ryzykuje atrymać čarhovy dysanansny ofisny centr, jaki razburyć harmoniju histaryčnaha centra Mahilova, i biez taho mocna praredžanaha i sapsavanaha vajnoj i paślavajennaj zabudovaj.
Nahadajem, što ŭletku 2024 hoda ŭ Mahilovie ŭžo źniščyli adzin pomnik industryjalnaha raźvićcia — pieršuju haradskuju elektrastancyju. Na jaje miescy taksama musić paŭstać čarhovy žyły dom sumnieŭnaj architekturnaj vartaści.
«Naša Niva» — bastyjon biełaruščyny
PADTRYMAĆCiapier čytajuć
Kolkaść achviar vybuchu ŭ maskoŭskim elitnym restaranie na jubilei hienierała, jaki kamandavaŭ nastupam na Kijeŭ ź Biełarusi ŭ 2022-m, vyrasła da piaci čałaviek44
Kamientary