Rasijskija vojski pačali vykarystoŭvać novuju zbroju — «śpiačyja drony»
Rasijskija vojski pačali prymianiać tak zvanyja śpiačyja drony suprać ukrainskich mašyn i sałdat. Havorka idzie pra drony-kamikadze, jakija hadzinami čakajuć svajho prymianieńnia na abočynie darohi — faktyčna ŭ zasadzie.
Uvieś hety čas apieratar pavinien sačyć za videapatokam drona. Kali da jaho nabližajecca ukrainskaja mašyna, «śpiačy» dron uźlataje i atakuje praciŭnika ź minimalnaj adlehłaści.
Taktyka zasady stała mahčymaj dziakujučy ŭsio bolš častamu vykarystańniu Rasijaj dronaŭ na aptyčnym vałaknie. Takija BPŁA abstalavanyja optavałakonnym kabielem daŭžynioj da 30 kiłamietraŭ, jaki złučaje ich z apierataram.
U adroźnieńnie ad FPV-dronaŭ, što kirujucca pa radyjosihnale, takija aparaty možna vykarystoŭvać na vialikaj adlehłaści i vielmi blizka da ziamli, pryčym uklučać imhnienna.
Sałdat Uładzimir z 4‑j bryhady Nachvardyi «Rubiež» na poŭnač ad Pakroŭska raspaviadaje žurnalistu Bild: «Rasijskija śpiačyja drony mohuć čakać svaju vajskovuju cel da šaści hadzin. Ale kali nichto nie źjaŭlajecca i zarad batarei skančvajecca, jany atakujuć i cyvilnych, kab dron nie dastaŭsia nam».
Kab abaranić linii zabieśpiačeńnia, Ukraina buduje ŭzdoŭž frontu ŭsio bolš «kalidoraŭ», nakrytych sietkami (hetyja sietki bačnyja na videakadrach z dronaŭ). Adnak optavałakonnyja BPŁA mohuć navodzicca z nadzvyčajnaj dakładnaściu i vykarystoŭvać navat nievialikija pramiežki ŭ sietkach, kab pralacieć u kalidor i parazić celi na darozie, jakaja zdajecca biaśpiečnaj.
USU taksama vykarystoŭvajuć «śpiačyja drony», ale značna radziej za rasijskuju armiju. Rasijskaja abaronnaja pramysłovaść pry padtrymcy Kitaja ciapier vyrablaje bolš za 1200 dronaŭ na aptyčnym vałaknie ŭ dzień. Ukrainskaja pramysłovaść i pramysłovaść jaje zachodnich sajuźnikaŭ — navat nie 100. I tyja ŭ asnoŭnym «made in China», reziumuje vajenny ahladalnik BILD Julijan Ropkie.
Kamientary