Siońnia ŭ biblijatecy AN — prezientacyja ŭnikalnaha zboru połackich hramat

21 kastryčnika ŭ 14.30 u Centralnaj navukovaj biblijatecy im. Jakuba Kołasa NAN Biełarusi adbudziecca prezientacyja fundamientalnaha dvuchtomnaj vydańnia «Połackija hramaty XIII - pačatku XVI stahodździa».

Pavialičyć

Heta vydańnie padrychtavana sumiesnymi namahańniami rasijskich i biełaruskich navukoŭcaŭ, pradstaŭnikoŭ Centralnaj navukovaj biblijateki Nacyjanalnaj akademii navuk Biełarusi (NANB), Instytuta historyi NANB, Histaryčnaha fakulteta Biełaruskaha dziaržaŭnaha univiersiteta, Instytuta słavianaznaŭstva Rasijskaj akademii navuk (RAN), Instytuta rasijskaj historyi RAN, Rasijskaha dziaržaŭnaha archiva staražytnych aktaŭ: Alaksandram Hrušam, Vasilom Varoninym, Hannaj Charaškievič, Siarhiejem Polechavym, Alesiem Žłutkam, Kaciarynaj Skvajrs, Andrejem Ciulpinym.

Vydańnie ŭjaŭlaje saboj zbornik dakumientaŭ (ahulnaja ich kolkaść kala 500), siarod jakich pryvilei vialikich kniazioŭ litoŭskich na ziamielnyja padaravańni žycharam Połacka i Połackaj ziamli, damovy i pierapiska hetych kniazioŭ z uładami Ryhi pa spravach pałačan, karespandencyja pałačan i ryžan i inš. Dakumienty adlustroŭvajuć składanaje i šmatbakovaje ŭzajemadziejańnie roznych etnasaŭ - rusinaŭ, łatyšoŭ, litoŭcaŭ, niemcaŭ, ich kultur, raznastajnyja aficyjnyja, dziełavyja i asabistyja kantakty ich pradstaŭnikoŭ. Vydańnie padrychtavana ŭ adpaviednaści z sučasnymi navukovymi patrabavańniami i budzie karysnym nie tolki historykam, ale i linhvistam roznych śpiecyjalnaściaŭ.

Vydańnie źmiaščaje šyroki ilustracyjny materyjał.

U ramkach prezientacyi adbudziecca adkryćcio vystaŭki «A Połtiesk' tiež jość, chvalači Boha, miesca słovutnoje …». U ekspazicyi buduć demanstravacca dakumienty XVII - pačatku XX stst., a taksama pracy historykaŭ XIX - pačatku XX stst. i dasiahnieńni sučasnaj biełaruskaj i zamiežnaj histaryjahrafii.

U tym liku knihi, jakija vychodzili ŭ drukarni Połackaha jezuickaha kalehiuma. Heta słoŭniki, padručniki, kalendary, tvory Haracyja, Cycerona. Siarod vydańniaŭ kniha z kalekcyi Biblijateki Niaśvižskaj ardynacyi - padručnik hramatyki łacinskaj movy Manuela Alvaresa (1526-1582) z ekślibrysam Ježy Radziviła («Emmanuelis Alvari … de Institutione grammatical linguae Latinae …», 1794).

Šyroka buduć pradstaŭleny unikalnyja rukapisnyja materyjały XVII-XVIII stst. z rukapisnaha fondu «Kalekcyja». Siarod ich handlovyja, ziamielnyja i sudovyja dakumienty, źviazanyja z Połackam i Połackaj ziamloj.

Uvachod volny.

• 0
• 0
• 0
• 0
• 0
• 0
• 0
• 0