Rasijanie prydumali novuju mutnuju schiemu, jak jeździć na luksavych aŭto ź biełaruskimi numarami i ekanomić hrošy
U kamplekt z aŭto uvachodzić fiktyŭnaja firma.
Praz šalonyja staŭki ŭtylizacyjnaha zboru na aŭto z mahutnymi ruchavikami rasijanie šukajuć šlachi, jak jeździć na aŭto ź biełaruskaj rehistracyjaj. Raniej my ŭžo pisali pra toje, što niekatoryja hatovyja rabić dla hetaha biełaruski DNŽ.
Ale jość działki, jakija prydumali jašče adnu schiemu, dzie rasijanin, kab zekanomić hrošy, pavinien stać biełaruskim biznesmienam.
U rekłamie svaich pasłuh u sacsietkach adna takaja rasijskaja kampanija, jakaja zajmajecca pryhonam aŭto na zamovu, kaža, što biełaruski ŭlik daje mahčymaść sekanomić kala 50% na kupli mašyny. Pry hetym jany dadajuć, što heta nibyta absalutna zakonna.
«Na tvoj rasijski pašpart možna adkryć jurasobu ŭ Biełarusi i pastavić aŭtamabil na ŭlik na hetuju jurasobu», — tłumačyć mužčyna na videa i dadaje, što ŭ adroźnieńnie ad padobnych schiem z Kazachstanam i Kyrhyzstanam ty takim čynam źjaŭlaješsia ŭłaśnikam aŭto.
Ź jaho słoŭ, kab paśla pajechać na hetym aŭto ŭ Rasiju, dastatkova tolki zrabić strachoŭku.
«Ale jość niuans: raz na hod vy pavinny vyjazdžać na hetym aŭto z Rasii. Ale miažy pamiž krainami niama, tady jak zrazumieć, kali ty na im ujechaŭ u Rasiju», — adznačaje mužčyna.
Nakolki adroźnivajucca ceny
Kampanija pravodzić raźliki, kolki mašyna budzie kaštavać na rasijskim, a kolki na biełaruskim uliku.
Tak, naprykład, BMW M3 2024 hoda vypusku z trochlitrovym matoram na 520 k. s. z pastanoŭkaj na ŭlik u Rasii abydziecca prykładna ŭ $140 tysiač, a kali na biełaruskim, to ŭsiaho ŭ $86 tysiač.
Niekatoryja aŭto prapanujuć vyklučna z raźlikam praź biełaruskuju schiemu, bo praź vialiki abjom ruchavika tolki ŭtylzbor u Rasii składaje $64 tysiačy pa ciapierašnim kursie.
Amierykanskija Dodge z 6.4 pad kapotam na biełaruskim uliku prapanujuć za $41‑52 tysiačy. A ŭ Rasii tolki ŭtylzbor na ich bolš za $60 tysiač.
Jak pracuje schiema?
Kab daviedacca padrabiaźniej pra schiemu, my źviazalisia ź działkami pad vyhladam zacikaŭlenaj asoby.
Vyśvietliłasia, što kampanija robić usio pad kluč, tamu, aproč dapamohi z adkryćciom jurydyčnaj asoby na rasijski pašpart, jany zajmajucca mytnaj ačystkaj u Biełarusi.
Pry hetym sekanomić prapanujuć nie tolki na ŭtylzbory, ale i na mycie. Mašyny ŭ Biełarusi afarmlajuć na lhotnika, kab zapłacić tolki 50% ad myta.
Dalej lhotnik pradaje mašynu novaj jurasobie, jakaja naležyć hramadzianinu Rasii, paśla čaho aŭto źjaždžaje ŭ Rasiju, dzie budzie jeździć na biełaruskich numarach.
Pry hetym usio ž udakładniajuć, što raz na hod treba budzie vyjezdžać z Rasii, a na ŭtrymańnie jurasoby ŭ Biełarusi nibyta treba zakładać jašče kala $500 na hod.
U vyniku atrymlivajecca: pierad tym, jak trapić na rasijskija vulicy, spačatku działki abychodziać zachodnija sankcyi, paśla čaho vykarystoŭvajuć ilhotu ŭ Biełarusi nie pa pryznačeńni i adkryvajuć fiktyŭnuju firmu, jakaja budzie imitavać dziejnaść vyklučna dziela taho, kab rasijanin nie płaciŭ dziasiatki tysiač dalaraŭ utylzboru.
Jak doŭha budzie pracavać padobnaja schiema — pytańnie rytaryčnaje. U kamientarach pad videa mnohija vykazvajuć mierkavańni, što Rasija chutka padobny schiematoz prykryje, na što pradstaŭniki kampanii adkazvajuć, što prynamsi pakul tema rabočaja. I što, maŭlaŭ, lepiej kupić dva aŭto na biełaruskich numarach, čym adno na rasijskich.
Ale schiemu mohuć prykryć i ź biełaruskaha boku, kali padatkovaja i inšyja kantralujučyja orhany pačnuć vyśviatlać, čamu ŭ Biełarusi źjaŭlajecca ŭsio bolš firm, asnoŭnaja dziejnaść jakich nakiravana na toje, kab nabyć i pastavić na ŭlik čarhovy daražezny aŭtamabil.
Ciapier čytajuć
Na aŭtašou ŭ Lidzie ledź nie zahinuŭ adzin z samych znakamitych kaskadzioraŭ Biełarusi — jaho videa bačyli amal paŭmiljarda čałaviek. Što ź im ciapier?
Kamientary