Hramadzianka Biełarusi ŭ ZŠA pryznała vinu ŭ niezakonnym eksparcie avijakampanientaŭ u Rasiju
Hramadzianka Biełarusi, 33‑hadovaja Jana Lavonava ŭ ZŠA pryznała vinu pa spravie ab niezakonnych pastaŭkach avijacyjnych kampanientaŭ amierykanskaj vytvorčaści ŭ Rasiju. Pra pryznańnie viny 20 maja paviedamiła prakuratura akruhi Kałumbija, piša «Radyjo Svaboda».
Apošnim časam Lavonava žyła ŭ Rasii. Pavodle viersii amierykanskich uładaŭ, paśla pačatku poŭnamaštabnaj vajny Rasii suprać Ukrainy jana ŭdzielničała ŭ schiemie zakupki avijoniki i abstalavańnia praź firmy-pasiaredniki ŭ Armienii i inšych krainach, chavajučy kančatkovaha atrymalnika hruzaŭ.
Lavonava pryznała siabie vinavataj pierad sudździoj Łaren Alichan u parušeńni Zakona ab reformie ekspartnaha kantrolu ZŠA. Prysud joj pavinny vynieści 10 žniŭnia 2026 hoda.
«Kožny, chto ličyć, što moža vykarystoŭvać amierykanskija łancužki pastavak dla ŭzbrajeńnia našych sapiernikaŭ, pavinien uvažliva pahladzieć na toje, što adbyłosia ź Janaj Lavonavaj», — zajaviła prakurorka Žanin Piro.
Lavonavu zatrymali ŭ Francyi i ŭ listapadzie 2025 hoda ekstradavali ŭ ZŠA. Pieršapačatkova joj vystavili bolš šyroki nabor abvinavačańniaŭ — u tym liku ŭ kantrabandzie, admyvańni hrošaj i machlarstvie suprać ZŠA. Paśla damovy sa śledstvam jana pryznała vinu pa abvinavačańni, źviazanym z parušeńniem ekspartnaha zakanadaŭstva.
Jak dziejničała schiema
U suviazi z rasijskaj vajennaj ahresijaj va Ukrainie ZŠA zabaranili pastaŭki vysokich technałohij u Rasiju, kab abmiežavać dostup rasijskaha vajskova-pramysłovaha kompleksu da krytyčna važnych kampanientaŭ. Hetyja zachady zaklikanyja padarvać zdolnaść Rasii vyrablać, madernizavać i papaŭniać zapasy ŭzbrajeńniaŭ (u pryvatnaści, rakiet i bieśpiłotnikaŭ), jakija vykarystoŭvajucca ŭ vajennych dziejańniach.
Jana Lavonava vykarystoŭvała padstaŭnyja kampanii, padroblenyja dakumienty i zamiežnych pasiarednikaŭ, kab schavać niezakonny ekspart avijacyjnych kampanientaŭ amierykanskaha pachodžańnia ŭ Rasiju. Śledčyja adsačyli hetuju schiemu ŭ niekalkich jurysdykcyjach i dabilisia pryciahnieńnia jaje da adkaznaści.
Pavodle materyjałaŭ spravy, schiema pačała dziejničać u traŭni 2022 hoda — nieŭzabavie paśla rasijskaha ŭvarvańnia va Ukrainu. Amierykanskija śledčyja śćviardžajuć, što Lavonava razam z suŭdzielnikami z ZŠA i Armienii zakuplała ŭ amierykanskich dystrybjutaraŭ avijacyjnyja elektronnyja sistemy i inšyja kampanienty dla samalotaŭ, a zatym arhanizoŭvała ich pierapraŭku ŭ Rasiju bieź licenzij Ministerstva handlu ZŠA.
Dla abychodu ekspartnych abmiežavańniaŭ vykarystoŭvalisia kampanii ŭ Armienii, na Maldyvach i ŭ inšych jurysdykcyjach. U dakumientach naŭmysna paznačalisia chłuślivyja kančatkovyja karystalniki i punkty pryznačeńnia. Apłaty prachodzili ŭ dalarach ZŠA praz zamiežnyja bankaŭskija rachunki i rachunki ŭ Złučanych Štatach.
Amierykanskija ŭłady nie nazyvajuć kampaniju, dla jakoj pryznačalisia pastaŭki, adnak adznačajuć, što havorka idzie pra byłoha pracadaŭcu Lavonavaj — arhanizacyju, uklučanuju ŭ sankcyjny śpis Ministerstva handlu ZŠA. U hety pieralik unosiać kampanii, jakija, na dumku Vašynhtona, dziejničajuć nasupierak intaresam nacyjanalnaj biaśpieki i źniešniaj palityki ZŠA. Pavodle śledstva, detali vykarystoŭvalisia dla absłuhoŭvańnia ci ekspłuatacyi pryvatnych samalotaŭ.
Chto taja biełaruska, jakuju ekstradavali ŭ ZŠA dla suda za kantrabandu detalaŭ dla samalotaŭ
Biełarusku pavinny sudzić u ZŠA za kantrabandu avijadetalaŭ u Rasiju, ale adździeł mihracyi choča jaje jak nielehałku departavać da suda
Hramadzianku Biełarusi aryštavali za niezakonny ŭvoz avijacyjnych składnikaŭ z ZŠA ŭ Rasiju
Ciapier čytajuć
Łukašenka zajaviŭ pra hatoŭnaść pryjechać u Kijeŭ72
Kamientary