Vynik druhoha tura vybaraŭ u Małdovie budzie zaležać ad jaŭki vybarcaŭ. Moładź masava praihnaravała pieršy tur, jaŭka na im była hranična nizkaj navat dla Małdovy — 49%. U vyniku lidar prarasijskaj partyi sacyjalistaŭ Ihar Dadon nabraŭ 48,2% hałasoŭ, a kandydat ad prajeŭrapiejskaj partyi «Dziejańnie i salidarnaść» Maja Sandu — 38,5%.
41-hadovaha Dadona padtrymlivaje Maskva. Jon prapanuje razarvać damovy ab svabodnym handli ź Jeŭrasajuzam i ŭvajści ŭ Jeŭrazijski ekanamičny sajuz.
Byłaja supracoŭnica Suśvietnaha banka, a paśla ministarka adukacyi 44-hadovaja Sandu sprabavała źjadnać vakoł svajoj kandydatury padzielenyja pravyja siły Małdovy.
Rasčaravańnie vybarcaŭ u prajeŭrapiejskich siłach źviazanaje z tym, što pieršy prajeŭrapiejski premjer Małdovy Uład Fiłat akazaŭsia źviazany z afieraj pa kradziažu miljarda dalaraŭ z Ekanambanka krainy. Dla Małdovy, ekanomika jakoj u 8 razoŭ mienšaja za biełaruskuju, heta było złačynstva stahodździa.
Libieralna-demakratyčnaja partyja Fiłata razvaliłasia, a na jaje ruinach uźnikli płatforma «Hodnaść i praŭda» na čale z Andrejem Nestase i partyja «Dziejańnie i salidarnaść» na čale z Majaj Sandu. Apošniaja i stała samym papularnym lidaram pravicy.
Dadon pryznaje Krym rasijskim, Sandu ličyć Krym ukrainskim.
U adroźnieńnie ad Dadona, Sandu praviała vielmi ścipłuju prezidenckuju kampaniju, na jakuju vytraciła ŭsiaho kala 23 tysiač jeŭra. Jana nie zamaŭlała biłbordavaj i televizijnaj rekłamy. Dadonu ž prezidenckaja honka abyšłasia prykładna ŭ 295 tysiač jeŭra.
Kamientary