Cvaje pieśni na słovy biełaruskich sučasnych paetaŭ maładyja biełaruskija vykanaŭcy mohuć padać da 17 traŭnia. Najlepšych čakaje navučalnaja siesija, praca ŭ studyi, kancerty, hrašovy pryz i zdymki klipa.
Na čaćviorty konkurs «Zaśpiavaj 4x4» prymajucca zajavy ad muzykaŭ 18-30 hod, jakim prapanujecca abrać vierš sučasnaha paeta, napisany ŭ apošnija 30 hod, dy pakłaści jaho na svaju muzyku. «My chočam złučyć sučasnuju paeziju i muzyku ŭ adzinaje cełaje. Z adnaho boku adkryć dla maładych muzykaŭ śviet biełaruskaj sučasnaj paezii, a z druhoha paspryjać tamu, kab dobryja vieršy stali pieśniami», — zajaŭlajuć arhanizatary konkursu, jaki ładziać internet-partał TuzinFM.by i fond «Viartańnie» pry padtrymcy kampanii «Budźma biełarusami!».
Termin pryjomu zajavaŭ vyrašana praciahnuć da 17 traŭnia, kab usie achvočyja paśpieli aformić zajavy na konkurs. Z usich padadzienych zajavaŭ na mejł [email protected] žury adbiare 4 finalisty. Ich čakaje navučalnaja siesija ź lekcyjami, majstar-kłasami dy praktyčnymi zaniatkami, praca nad konkursnaj pieśniaj u studyi, spravazdačny kancert pry padtrymcy viadomaha vykanaŭcy. Pieramožca konkursu atrymaje hrašovy pryz u 1000 BYN (kala 500 jeŭra), a na jaho konkursnuju pieśniu režysior Arciom Łobač zdymie klip.
Adbylisia źmieny ŭ składzie mientaraŭ i žury konkursu.
Ź finalistami buduć pracavać lidar hurtu Vuraj i kiraŭnik «Śpieŭnaha Schodu» Siarhiej Doŭhušaŭ, lidar «Pałacu» i vykładčyk Aleh Chamienka, saŭnddyzajnier, lideru hurta CherryVata i kiraŭnik łejbłu «Ezhevika» Źmicier Litvinovič dy saŭndpradusar i kiraŭnik studyi «Central Station» Andrej Akataŭ. Da žury taksama dałučacca arhanizatary konkursu Siarhiej Budkin i Pavieł Bierahovič.
Padrabiaźniej pra ŭmovy konkursu
Ciapier čytajuć
Łukašenka zajaviŭ pra hatoŭnaść pryjechać u Kijeŭ92
Kamientary