Parłamienckija vybary ŭ Francyi: čakajecca pieramoha libierałaŭ i katastrofa sacyjalistaŭ
11 červienia ŭ Francyi adbyvajecca pieršy tur parłamienckich vybaraŭ. Jak pakazvajuć apytańni hramadskaj dumki, jany pryniasuć pieramohu novaj libieralnaj partyi La République En Marche! (REM), jakaja idzie na vybary ŭ kaalicyi z centrystami z MoDem. REM była stvoranaja pad vybarčuju kampaniju Emaniuela Makrona. Jaho pieramoha vyvieła partyju ŭ lidary honki.
Jak čakajecca, za REM prahałasujuć kala 30% vybarcaŭ.
Pravacentrysckija respublikancy majuć padtrymku kala 20%. Na trecim miescy idzie Nacyjanalny front Maryny Lo Pen z 17%. Levaja «Niaskoranaja Francyja» i kamunisty majuć padtrymku prykładna 14% vybarcaŭ. Vybary abiacajuć być pravalnymi dla sacyjalistaŭ, za jakich hatovyja hałasavać tolki 8% vybarcaŭ. Partyja, što daminavała na francuzskaj palityčnaj scenie z 1940-ch, syšła ŭ cień paśla niaŭdałaha prezidenctva Fransua Alanda.
Francyja — prezidenckaja respublika, ale pieramoha na parłamienckich vybarach palehčyć Makronu praviadzieńnie reformaŭ u ekanamičnaj śfiery.
U vypadku kali Makron budzie papularnym prezidentam, nie vyklučana, što palityčny śpiektr Francyi źmienicca. Niekalki dziesiacihodździaŭ za ŭładu zmahalisia pravacentrysty i levacentrysty, halisty i sacyjalisty. Ciapier značnuju rolu mohuć adyhryvać libierały.
Z hledzišča biełaruskich intaresaŭ, niebiaśpieku ŭjaŭlajuć krajnie pravyja i krajnie levyja, Nacyjanalny front i «Niaskoranaja Francyja», bo jany vystupajuć za sastupki pucinskaj Rasii i asłableńnie Jeŭrasajuza, što moža ŭskładnić situacyju narodaŭ u prastory miž ES i Rasijaj.
Kančatkovy raskład sił u parłamiencie stanie jasny pa vynikach druhoha tura, jaki projdzie 18 červienia.
Ciapier čytajuć
«Kazaŭ, što źniščyć mianie, bo ŭ jaho suviazi i pahony». Byłaja žonka vajuje z padpałkoŭnikam. Taho panizili da ŭčastkovaha5
Kamientary