Minski hurt Re1ikt zrobić pierapynak u kancertnaj dziejnaści, kab zavieršyć pracu nad novym, šostym studyjnym albomam.
«My ŭžo narychtavali dastatkova idej dla stvareńnia novaha alboma, navat pačali zapisvać pieršyja dema. Taksama vyznačylisia ź jaho kancepcyjaj. Tamu nam patrebny čas, kab spakojna pabyć u svajoj studyi i zrabić paŭnavartasnyja kampazicyi, bo kancerty vielmi adciahvajuć uvahu i zabirajuć čas, asabliva kali heta solnyja vystupy», — kaža lidar hurta, bubnač Alaksandr Dziemidzienka.
«Mahčyma, Re1ikt budzie źjaŭlacca na niejkich fiestyvalach dy imprezach, ale vialikich solnych kancertaŭ nie čakajecca ažno da viasny. Ale na raźvitańnie my vyrašyli zajhrać vosieński solny kancert pierad «tvorčym adpačynkam», — dadaje muzyka.
Hurt amal całkam vykanaje apošnija albomy 9 vieraśnia ŭ kłubie «Hrafici»: adno z adździaleńniaŭ budzie składacca ź piesień z dyska «Liekavyja Travy» (2015), druhoje — z kružełki «Kufar» (2016).
U albom «Liekavyja Travy» ŭvajšli narodnyja pieśni z roznych kutkoŭ paleskaha i inšych rehijonaŭ Biełarusi, a taksama kampazicyi, składzienyja ŭdzielnikami kamandy pavodle tvoraŭ kłasikaŭ biełaruskaj litaratury Jana Barščeŭskaha i Jakuba Kołasa.
Dysk byŭ dobra pryniaty słuchačami i krytykami dy atrymaŭ šerah uznaharod: «Albom hoda» — premija «Dajom rady»; «Najlepšy rok-albom», «Pryz narodnych ekśpiertaŭ», «Pryz štatnych ekśpiertaŭ» — partał Experty.by i inš. Najlepšym «Liekavyja Travy» taksama nazvaŭ amierykanski televiadučy Met O'Doneł.
Albom «Kufar» zapisvaŭsia ŭ Polščy paralelna z albomam «Liekavyja Travy» i atrymaŭsia takim ža liryčnym i atmaśfiernym. U jaho ŭvajšli i šmatlikija bonus-treki «niezvyčajnaha» Re1ikt, jaki zaŭsiody ekśpierymientuje (naprykład, stadyjonny chit «Razam» — himn futbolnaha kłuba «Krumkačy», a taksama džaz-rokavy duet «Tolki shieh» z saksafanistam Krambambula Paŭłam Arakielanam).
Pa vynikach minułaha hoda «Kufar» trapiŭ u top-10 televiadučaha Siarhieja Filimonava, kinakrytyka Maksima Žbankova, radyjožurnalista Dziny Kudrejki, redaktara partała «Tuzin hitoŭ» Siarhieja Budkina i znanaha biełaruskaha muzyčnaha ekśpierta Źmitra Padbiarezskaha.
Re1ikt — hurt, jaki pracuje ŭ napramku world rock, spałučajučy tradycyjny biełaruski piesienny falkłor z aktualnymi rok-napramkami. Re1ikt kreatyŭna vykarystoŭvaje niezvyčajnyja hitarnyja efiekty, a taksama narodnyja duchavyja i pierkusijnyja instrumienty. U kampazicyjach kamandy splalisia paleski šamanizm, aŭtentyčny drajv i tajamničy biełaruski kosmas.
Solny kancert hurta Re1ikt projdzie ŭ kłubie «Hrafici» (h. Minsk, zav. Kalinina, 16) 9 vieraśnia. Cana kvitkoŭ: 7—10 rubloŭ. Pačatak: 20:00.
Ciapier čytajuć
Łukašenka zajaviŭ pra hatoŭnaść pryjechać u Kijeŭ21
Kamientary