22-hadovaja brytanka Džordan Uort prysudžanaja da 7,5 hoda turmy pa spravie ab chatnim hvałcie i «prymusovym kantroli». Heta pieršy ŭ historyi krainy prysud pa takim artykule ŭ dačynieńni da žančyny, piša Bi-bi-si.
Uort abvinavačvajecca ŭ tym, što ciaham niekalkich hadoŭ ździekavałasia sa svajho maładoha čałavieka, 22-hadovaha Aleksa Skiła, jaki da taho ž pakutuje na hidracefaliju (vadzianka hałaŭnoha mozhu).
U intervju brytanskim ŚMI Skił raspavioŭ, što jaho dziaŭčyna na praciahu amal čatyroch hadoŭ prynosiła jamu nie tolki maralnyja, ale i fizičnyja pakuty, u vyniku čaho jon apynuŭsia na vałasok ad śmierci.
Małady čałaviek kaža, što jaho svajaki viedali, što Džordan akazvaje na jaho maralny cisk, adnak nie padazravali ab fizičnym hvałcie.
«Jana biła mianie i ablivała kipieniem, raniła mnie ruki, śćviardžajučy, što ja razmaŭlaŭ sa svajoj siamjoj, choć ja hetaha nie rabiŭ», — raspaviadaje Aleks.
Fizičny hvałt z boku dziaŭčyny pačaŭsia z prostych šturškoŭ, adnak pastupova pryniaŭ pahroźlivyja maštaby, pryznajecca paciarpieły.
«Ja pamiataju, jak adnojčy jana ŭdaryła mianie pa hałavie štekieram dla noŭtbuka, u mianie pačałosia krovaciačeńnie, ja skazaŭ: «Kali łaska, dapamažy mnie». Ja nachiliŭ hałavu, kroŭ praciahvała iści. Jana pajšła ŭvierch pa leśvicy, ja znoŭ paprasiŭ: «Kali łaska, dapamažy mnie», a jana skazała: «Idzi i pamry!» - kaža Aleks.
Małady čałaviek padumaŭ, što horš być užo nie moža, adnak paśla hetaha dziaŭčyna prydumała novy vid pakut: jana stała palivać jaho kipieniem, kali jon spaŭ.
«Mianie budziŭ bol ad kipieniu na majoj skury. Časam ja pračynaŭsia pasiarod nočy, kali heta zdarałasia», - raspaviadaje Skił.
Aleks mocna straciŭ u vazie, jaho cieła pakryłasia ranami, adnak jon nie advažvaŭsia raspavieści kamuści pra toje, što adbyvajecca ŭ jaho doma. Džordan, u svaju čarhu, zabaraniała jamu naviedvać daktaroŭ.
Hvałt spyniŭsia tolki paśla taho, jak u červieni minułaha hoda susiedzi Aleksa i Džordan vyklikali palicyju, spałochaŭšysia hučnych krykaŭ, jakija danosilisia ź ich doma.
Miedyki dyjahnastavali ŭ maładoha čałavieka traŭmy na ruce i apioki druhoj i treciaj stupieni.
Paśla hetaha Skił pierajechaŭ da svaich baćkoŭ u Biedfardzie. Pavodle jaho słoŭ, da taho momantu jon schudnieŭ amal na 18 kh i važyŭ kala 44 kh. Jon bajaŭsia, što jaho rany mahli zapalicca, i heta mahło pryvieści da amputacyi.
U chodzie pracesu, jaki prachodzić u Karaleŭskim sudzie Łutana, sudździa zajaviŭ, što Uort pryznałasia, što ŭžyvała fizičny hvałt u adnosinach da svajho byłoha bojfrenda, u tym liku z vykarystańniem naža i kipieniu.
Zhodna z rašeńniem suda, dziaŭčynie zabaranili kantaktavać z Aleksam pažyćciova.
Kamientary