Praz dva tydni vytvorča-ahrarnaje abjadnańnie «Masandra» — najbujniejšaje vinarobnaje pradpryjemstva Krymu — piarojdzie ŭ pryvatnyja ruki. Ułady aneksavanaha Rasiejaj paŭvostrava vyrašyli jaho pryvatyzavać: u dziaržavy nibyta niama srodkaŭ na ŭtrymańnie i raźvićcio pradpryjemstva, piša Radyjo Svaboda.
Lehiendarny brend źbirajucca pradać pa vidavočna zanižanaj canie kamuści z rasiejskich aliharchaŭ. U Krymie mnohija ŭpeŭnienyja, što investaraŭ cikaviać tolki ziemli «Masandry» ŭ kurortnaj zonie, i novyja haspadary vysiekuć vinahradniki i pabudujuć na ich miescy hateli i žyllo.
Rasiejskaja administracyja Krymu rasparadziłasia vystavić na aŭkcyjon 100 adsotkaŭ akcyj vytvorča-ahrarnaha abjadnańnia «Masandra» ŭ siaredzinie kastryčnika sioleta. Na partale «Rosełtorh» pačaŭsia pryjom zajavak na ŭdzieł u tarhach, jakija adbuducca 14 śniežnia.
Novamu ŭładalniku dastanucca tysiačy hiektaraŭ vinahradnikaŭ, vytvorčyja mahutnaści, sielskahaspadarčaja technika, budynki i pamiaškańni ahulnaj płoščaj amal 1 młn kvadratnych metraŭ, sam brend i najbujniejšaja ŭ śviecie kalekcyja vinaŭ, jakaja naličvaje bolš za 1 młn butelek.
Eksperty nie sumniavajucca, što «Masandru» rychtujuć da prodažu pad zahadzia vyznačanaha pakupnika. Pryčym heta vidavočna nie šarahovy investar — inakš by ŭłady nia stali ładzić takuju składanuju šmatstupiennuju praceduru vyvadu aktyvaŭ ź dziaržaŭnaj ułasnaści.
Apošnimi hadami ŭładalnikami ŭsich bujnych vinzavodaŭ Krymu stanoviacca biznes-struktury, jakija naležać ludziam z najbližejšaha atačeńnia Ŭładzimira Pucina.
Babaryka try chviliny adkazvaŭ na pytańnie, čyj Krym. Tak i nie adkazaŭ89
Kamientary