Amal 20% sioletniaha aŭtamabilnaha impartu skłali elektramabili i hibrydy
Pavodle źviestak Biełaruskaj aŭtamabilnaj asacyjacyi, amal piataja častka novych aŭtamabilaŭ, uviezienych u Biełaruś sioleta, prypała na elektramabili i hibrydy. Za 11 miesiacaŭ u krainu pastupiła bolš za 150 tysiač novych mašyn, ź jakich 27,6 tysiačy (kala 18,4%) — heta aŭto na novych krynicach enierhii (NEV).
Dyrektar UP «BAA-Kansałt» Dźmitryj Jarota adznačaje, što rynak NEV u Biełarusi ŭ 2025 hodzie maje niekalki admietnych rys.
Najpierš, jon amal całkam farmujecca za košt impartu — dziel ŭviezienych aŭtamabilaŭ składaje kala 95%. Akramia taho, u siehmiencie NEV pieravažajuć čystyja elektramabili (BEV): ich było zavieziena kala 20,4 tysiačy, što składaje prykładna 74% ad usich «zialonych» aŭto.
Asnoŭnuju častku elektramabilaŭ impartavali jurydyčnyja asoby — 14,4 tysiačy mašyn (bolš za 70% ad usiaho abjomu NEV). Fizičnyja asoby zavieźli kala 5 tysiač aŭtamabilaŭ, jašče prykładna 1 tysiača prypała na łakalnuju vytvorčaść.
Ekśpiert taksama padkreśliŭ, što ŭ 2025 hodzie jurydyčnyja asoby najčaściej karystalisia sproščanaj siertyfikacyjaj pry ŭvozie NEV: pavodle hetaj schiemy było aformlena kala 92% čystych elektramabilaŭ.
Adnak užo ŭ 2026 hodzie situacyja moža źmianicca. Pastanova Savieta Ministraŭ №372, jakaja ŭvodzić abaviazkovaje atrymańnie ŭchvaleńnia typu transpartnaha srodku i abmiažoŭvaje ŭvoz elektramabilaŭ pavodle sproščanych pravił, moža istotna paŭpłyvać na abjomy impartu «zialonych» aŭto jurydyčnymi asobami.
Z 2026 hoda ŭ Biełarusi istotna padaražeje šerah aŭto papularnych kitajskich marak
Na try hady padoŭžyli termin ilhotaŭ dla elektramabilaŭ
Kolki ŭ Kitai kaštujuć mašyny, na jakija ŭ Biełarusi buduć nalaplać šyldzik Zubr
«Poŭny farš, a cana jak u pustoj Tesla». Čym (nie) zadavolenyja ŭładalniki kitajskich elektramabilaŭ
Dzieviać čałaviek pamierli ŭ Breście i Minsku — usim im uvodzili adnyja i tyja ž leki. U preparacie znajšli bakteryi5
Kamientary