Łukašenka ŭhavorvaje amierykancaŭ nie bambić fłot narkamafii, a damaŭlacca
Donald Tramp viadzie paŭnavartasnuju vajskovuju kampaniju suprać narkatrafiku — VMS i avijacyja ZŠA bambiać sudny, jakija Vašynhton abviaščaje narkaterarystyčnymi. Alaksandr Łukašenka ŭ hutarcy z žurnalistkaj tielekampanii «Ńjusmaks», žonkaj śpiecpasłańnika Džona Koŭła Hretaj Konvej Van Sasteren pierakonvaŭ amierykancaŭ admovicca ad rakiet u baraćbie z narkahandlarami. «Treba damaŭlacca», kaža jon.
Što ZŠA treba rabić z tym patokam narkotykaŭ, jakija iduć ź Vieniesueły ŭ ZŠA, spytała žurnalistka Łukašenku.
— A vy ŭpeŭnienyja, što tam taki patok narkotykaŭ, pra jaki ŭ ZŠA tak šmat siońnia havorać? — paryravaŭ jon.
— Fientanił idzie ź Mieksiki, ale inšyja narkotyki, jany vyrablajucca ŭ Kałumbii i inšych krainach Łacinskaj Amieryki, jany praź Vieniesuełu ŭsio roŭna iduć u ZŠA, — adkazała taja.
Łukašenka skazaŭ, što napiaredadni mienavita heta pytańnie jon abmiarkoŭvaŭ z amierykanskaj delehacyjaj.
— Narkotyki, jak i mnohaje inšaje, handal ludźmi, prastytucyja, zbroja — heta realii našaha času. Z hetym treba zmahacca. Ale rakietami narkotyki nie pieramožaš, — zapeŭnivaje jon. — Heta vajna, heta baraćba. Vy pravilna pačali hetuju baraćbu suprać mihracyi i suprać narkotykaŭ. U hetym Tramp małajčyna, što jon padniaŭ hetuju temu. Suprać hetaha my budziem zmahacca. I paśla nas — my pojdziem, Tramp, ja, tvoj Džon, my pojdziem na niabiosy tudy — a našy dzieci buduć zmahacca suprać hetaj biady. Heta novaja źjava ŭ novaj eposie. Rakietami heta nie pieramahčy. Treba damaŭlacca, treba vyznačyć sumiesnyja miery baraćby.
Łukašenka pravioŭ paralel ź Biełaruśsiu i Jeŭropaj: maŭlaŭ, my zmahalisia z narkatrafikam, a Jeŭropa miežy zakryła — bolš my ich abaraniać nie budziem.
— Ja što, u hetaj situacyi pavinien abaraniać Jeŭropu? Navošta? Jany mianie dušać, a ja pavinien ich abaraniać ad narkotykaŭ. Tak ža i vy. Vy nie pavinny Vieniesuełu dušyć. Vy pavinny znajści hety kampramis, — prapanoŭvaje jon.
Jon havoryć, što narkotyki — źjava nie vieniesuelskaja, nie afhanskaja, tamu «treba dumać, a nie vajavać».
— Heta płanietarnaja źjava, ź jakoj nam treba zmahacca. Nie rakietami! Nam treba šukać, moža być, novyja mietady. Treba dumać, a nie vajavać. I ja, Hreta, nie vieru ŭ toje, što voś taki abjom narkotykaŭ, jaki idzie ŭ Złučanyja Štaty Amieryki, jon idzie ź Vieniesueły. Ja nie vieru ŭ toje, što kaža Tramp pa hetym pytańni.
— Ci nie ličycie vy, što prezident Madura asabista zacikaŭleny i zajmajecca narkatrafikam u ZŠA? — spytała karespandentka.
— U vas takich faktaŭ niama, i ŭ mianie taksama. Nie dumaju, što heta tak. Madura nie narkaman, heta ja viedaju dakładna, — zaklučyŭ Łukašenka.
Ciapier čytajuć
«Sojevyja ekstremisty pavinny adpracavać misku kłubnic». Skardziŭsia na ŭmovy pracy ŭ KDB, a ciapier uciuchvaje treninhi siłavikam — chto taki Anton Šabunievič1919
Kamientary
Voś tut prahavarvajecca. U jaho asabistym śpisie jašče nielehalnaja mihracyja i kantrabanda cyharet (chacia faktyčna, ale nie jurydyčna, heta taksama narkotyki).
Zbrojaj zajmaŭsia daŭno, handal ludźmi na piku.
Nie ździŭlusia, kali nastupnymi jaho spravami buduć narkotyki i prastytucyja. I apraŭdvacca budzie anałahična, typova dla siabie: maŭlaŭ, jany (Jeŭropa) sami heta zamaŭlajuć. Užo kaža: "Ja što, u hetaj situacyi pavinien abaraniać Jeŭropu? Navošta? Jany mianie dušać, a ja pavinien ich abaraniać ad narkotykaŭ."
Čałaviek, jaki šukaje najbolš brudnaje ŭsio žyćcio.
I pra svaje spravy z pabudovaj spadčynnaj manarchii prahavarvajecca:
"I paśla nas — my pojdziem, Tramp, ja, tvoj Džon, my pojdziem na niabiosy tudy — a našy dzieci buduć zmahacca suprać hetaj biady."