U Litvie dapuścili tranzit biełaruskaha kaliju i prapanavali ŭviazać jaho z prysutnaściu sił ZŠA ŭ krainie
Hałoŭny daradca prezidenta Litvy pa pytańniach nacyjanalnaj biaśpieki Dejvidas Matulonis kaža, što pradstaŭniki ZŠA pakul nie viali pieramovaŭ ź litoŭskimi słužbovymi asobami ab mahčymym adnaŭleńni tranzitu biełaruskich uhnajeńniaŭ praz Kłajpiedski port, a kali z časam da hetaha ŭsio ž viernucca, takoje rašeńnie možna było b źviazać z dadatkovaj prysutnaściu amierykanskich sił, piša LRT.
«Hetyja karektnyja pavodziny amierykancaŭ — jany sapraŭdy nie akazvajuć na nas cisku z patrabavańniem rabić dadatkovyja kroki, adnak kali kalijnyja ŭhnajeńni ź Biełarusi pačnuć pastupać u Amieryku, tady paŭstanie pytańnie, jakim maršrutam ich transpartavać. Voś tut i źjavicca cikavy momant», — skazaŭ Matulonis.
«Kali b my niešta rabili ŭ hetym kirunku, heta varta było b uviazać, mahčyma, z dadatkovymi mahčymaściami prysutnaści amierykanskich sił. Kali hetyja ŭhnajeńni pa sutnaści stanuć amierykanskimi, buduć pryznačany dla rynku ZŠA, to (…) my pavinny apynucca ŭ poli amierykanskich intaresaŭ, a nie iści nasupierak amierykancam», — dadaŭ jon.
13 śniežnia amierykancy abviaścili, što zdymajuć sankcyi ź biełaruskaha kaliju.
Čakajecca, što Jeŭrapiejski sajuz viasnoj prymie rašeńnie ab pradaŭžeńni ŭłasnych sankcyj u adnosinach da ŭhnajeńniaŭ.
Matulonis zaklikaŭ nie ideałahizavać pytańnie tranzitu biełaruskich uhnajeńniaŭ i, kali situacyja źmienicca, imknucca da realizacyi i prahmatyčnych intaresaŭ Litvy.
«Nacyjanalny intares — heta spałučeńnie kaštoŭnasnaj i prahmatyčnaj palityki», — skazaŭ savietnik prezidenta Litvy.
Litva zabaraniła tranzit biełaruskich uhnajeńniaŭ u pačatku 2022 hoda, spasyłajučysia na sankcyi ZŠA, u toj čas jak ES uvioŭ sankcyi suprać ich paźniej.
ZŠA raźmiaščajuć u Litvie, na palihonie ŭ Pabradzie, kala tysiačy svaich vajskoŭcaŭ, adnak u ciapierašni čas pierahladajuć pryjarytety dysłakacyi ŭ Jeŭropie i śviecie.
Ciapier čytajuć
Što ciapier ź italjanskimi vizami? Masavyja admovy? Turfirmy nazyvajuć alternatyvu5
Što ciapier ź italjanskimi vizami? Masavyja admovy? Turfirmy nazyvajuć alternatyvu
«Kali b ja byŭ śledčym KDB, ja b padkreśliŭ toje samaje». Fiaduta — pra schavanyja sensy «Kałasoŭ pad siarpom tvaim», uvahu siłavikoŭ da svajho rukapisu i zahadku z treciaj častkaj ramana Karatkieviča1212
Kamientary