Adna z najbahaciejšych siemjaŭ Saudaŭskaj Aravii choča nabyć zamiežnyja aktyvy «Łukojła»
Jak paviedamlaje Reuters sa spasyłkaj na try krynicy, asnoŭnym pretendentam vystupaje kampanija Midad Energy, jakaja ŭvachodzić u adzin z najbujniejšych chołdynhaŭ Saudaŭskaj Aravii, što pracuje pa ŭsim Blizkim Uschodzie. Kiraŭnik kampanii maje suviazi sa śpiecsłužbami.
Midad Energy płanuje zapłacić za aktyvy «Łukojła» praz eskroŭ-rachunak, dzie srodki buduć zabłakavanyja da źniaćcia sankcyj z rasijskaj kampanii. Pry hetym u ździełku mohuć być załučanyja amierykanskija kampanii.
Midad Energy uvachodzić u naftahazavy chołdynh Midad Holding, jaki, u svaju čarhu, źjaŭlajecca častkaj Al Fozan Holding — adnoj ź viadučych siamiejnych karparacyj Saudaŭskaj Aravii (11‑ie miesca ŭ rejtynhu Forbes). Al Fozan dziejničaje praz bolš za 20 daččynych kampanij u śfierach roźničnaha handlu, nieruchomaści, pramysłovaści, enierhietyki i achovy zdaroŭja. Midad Energy aktyŭna raźvivaje mižnarodnuju ekspansiju: u kastryčniku kampanija padpisała kantrakt na $5,4 miljarda pa raspracoŭcy naftahazavaha radovišča ŭ Ałžyry i ŭžo pracuje ŭ Azierbajdžanie i Jehipcie, jak i «Łukojł».
Hienieralny dyrektar Midad Energy Abdulełach Al-Ajban — brat upłyvovaha daradcy saudaŭskich uładaŭ pa nacyjanalnaj biaśpiecy Musajeda Al-Ajbana, jaki ŭdzielničaŭ u mirnych pieramovach pamiž ZŠA i Rasijaj u Saudaŭskaj Aravii. Ich baćka Machamied Al-Ajban byŭ pieršym kiraŭnikom raźviedki karaleŭstva.
Ekśpierty adznačajuć, što saudaŭski pretendent moža stać zručnym partnioram i dla Rasii, i dla ZŠA, bo Er-Ryjad imkniecca padtrymlivać dobryja adnosiny z Maskvoj i adnačasova raźvivaje supracoŭnictva z Vašynhtonam. Padčas vizitu Donalda Trampa ŭ Saudaŭskuju Araviju ŭ 2025 hodzie storany padpisali šerah pahadnieńniaŭ u halinie abarony, enierhietyki i technałohij, a Er-Ryjad abiacaŭ inviestavać u ZŠA da $1 tryljona.
Akramia Midad Energy, cikavaść da aktyvaŭ «Łukojła» prajaŭlali Exxon Mobil i Chevron (ZŠA), International Holding Company (AAE), vienhierskaja Mol i inviestycyjny fond Carlyle. Adnak niadaŭna Minfin ZŠA admoviŭ hrupie inviestaraŭ pad kiraŭnictvam Xtellus Partners, jakija chacieli abmianiać aktyvy «Łukojła» na jaho akcyi, zamarožanyja ŭ amierykanskich fondach paśla pačatku vajny va Ukrainie.
Siarod zamiežnych aktyvaŭ «Łukojła» — NPZ u Bałharyi, Rumynii i Niderłandach, kala 2000 AZS u Jeŭropie, Centralnaj Azii, ZŠA i na Blizkim Uschodzie, terminał dla avijacyjnaha paliva ŭ Małdovie, a taksama mahutnaści pa zdabyčy nafty i hazu ŭ Azierbajdžanie, Kazachstanie, Uźbiekistanie, Iraku, Jehipcie, AAE, Łacinskaj Amierycy i Afrycy.
ZŠA adkłali častku sankcyj suprać rasijskaha «Łukojła»
Suśvietnyja ceny na naftu ŭpali da ŭzroŭniaŭ 2021 hoda
Rasija stračvaje kantrol nad Uschodniaj Jeŭropaj — ale razmova nie pra Biełaruś
Saudaŭskaja Aravija źniziła ceny na naftu dla Indyi i Kitaja, kab zamianić pastaŭki z Rasii
«Łukojł» źbirajecca pradać svaje zamiežnyja aktyvy paśla ŭviadzieńnia amierykanskich sankcyj
Ciapier čytajuć
U Varšavu pryjechała sotnia biełaruskich palitviaźniaŭ13
Kamientary