Siamja Asada žyvie ŭ raskošy ŭ Maskvie, a sam były siryjski dyktatar źbirajecca pracavać aftalmołaham
Pakul Bašar Asad sprabuje viarnucca ŭ miedycynu, jaho dzieci marnujuć vialikija sumy na raskošnyja kupli ŭ rasijskaj stalicy i Dubai. Z padrabiaznaściami znajomić The Guardian.
U 2011 hodzie, na samym pačatku «arabskaj viasny», siryjskija školniki napisali na ścianie hrafici: «Ciapier tvaja čarha, lekar». Heta byŭ namiok na Bašara Asada, jaki da prezidenctva atrymaŭ adukacyju aftalmołaha ŭ Łondanie.
Ale čarha dabrałasia da Asada tolki praz 14 hadoŭ vajny, u jakoj, pavodle acenak, zahinuli sotni tysiač ludziej, a miljony stali ŭciekačami. U vyniku, kali paŭstancy padyšli da Damaska z poŭnačy i poŭdnia, Asad uciok — nočču, razam z synami, u kirunku Rasii.
Blizkija da siamji krynicy, a taksama surazmoŭcy ŭ Rasii i Siryi raskazali The Guardian pra izalavanaje, ale raskošnaje žyćcio byłoha dyktatara.
Pavodle słoŭ daśviedčanaj krynicy, były kiraŭnik Siryi znoŭ pajšoŭ vučycca.
«Jon vučyć ruskuju movu i aśviažaje svaje viedy ŭ aftalmałohii. Heta jaho zachapleńnie, jamu vidavočna nie patrebnyja hrošy. Jašče da pačatku vajny ŭ Siryi jon rehularna zajmaŭsia aftalmałahičnaj praktykaj u Damasku», — raskazaŭ siabar siamji i vykazaŭ mierkavańnie: kali Asad sapraŭdy pačnie praktykavać, jaho patencyjnymi klijentami mohuć stać zamožnyja žychary Maskvy.
Siamja Asadaŭ, chutčej za ŭsio, žyvie ŭ prestyžnaj Rubloŭcy — zakrytym pasiołku dla bahatych pad Maskvoj. Mienavita tam, z roznych paviedamleńniaŭ, u tym liku žyvie i były prezident Ukrainy Viktar Janukovič, jaki ŭciok z Kijeva ŭ 2014 hodzie.
Pieršyja miesiacy paśla ŭciokaŭ siamja zajmałasia zdaroŭjem Asmy Asad, byłoj pieršaj łedzi. Jana niekalki hadoŭ zmahałasia ź lejkiemijaj, i jaje stan byŭ krytyčnym. Pavodle krynic, paśla ekśpierymientalnaj terapii pad nahladam rasijskich śpiecsłužbaŭ jana ačuniała i ciapier adčuvaje siabie dobra.
Žyćcio ŭ izalacyi
Finansava siamja, jak śćviardžajecca, adčuvaje siabie ŭpeŭniena. Paśla sankcyj 2011 hoda, uviedzienych na fonie žorstkaha razhonu pratestaŭ u Siryi, značnuju častku kapitałaŭ, jak piša vydańnie, jany pieranieśli ŭ Maskvu — u jurysdykcyju, kudy zachodnim rehulataram daciahnucca značna ciažej.
Adnak raskoša nie roŭnaja svabodzie: pavodle śviedčańniaŭ, siońnia siamja žyvie izalavana i značna mienš uklučanaja ŭ koły, u jakich kruciłasia raniej. Bašar Asad amal ni z kim nie kantaktuje, akramia pary byłych paplečnikaŭ.
Krynica, blizkaja da Kramla, adznačaje: u rasijskaj palityčnaj elicie Asad ciapier «niecikavy» i «nie ŭpłyvovy», a Uładzimir Pucin nibyta nie lubić lidaraŭ, jakija stračvajuć uładu.
Heta paćvierdziŭ pasoł Rasii ŭ Iraku Elbrus Kutrašaŭ: «Asad moža žyć tut, ale nie moža zajmacca palitykaj. Jon nie maje prava zajmacca jakoj-niebudź miedyjnaj ci palityčnaj dziejnaściu. (…) Ale jon žyvy i ŭ biaśpiecy».
Ucioki: kinutyja sajuźniki i svajaki
The Guardian taksama raskryvaje dramatyčnyja detali ŭciokaŭ Asada ŭnočy 8 śniežnia 2024 hoda. Jon uciok z synami z Damaska, nie papiaredziŭšy navat bližejšych svajakoŭ i sajuźnikaŭ. Ich sustreŭ rasijski vajskovy eskort i dastaviŭ na rasijskuju avijabazu Chmiejmim, adkul ich samalotam vyvieźli z krainy.
Jaho brat Machier, vysokapastaŭleny vajskoviec, telefanavaŭ Bašaru niekalki dzion, ale toj nie braŭ słuchaŭku. U vyniku mienavita Machier, a nie prezident, dapamahaŭ inšym ratavacca, pakul paŭstancy ŭžo ŭvachodzili ŭ pałac. Siamja dziadźki Bašara, Ryfata Asada, była vymušana načavać u mašynach pierad rasijskaj avijabazaj Chmiejmim, pakul nie ŭmiašaŭsia vysokapastaŭleny rasijski čynoŭnik. Urešcie jany nibyta zmahli vyjechać u Aman.
Novaje žyćcio dziaciej
U adroźnieńnie ad baćki, dzieci Asada chutčej adaptavalisia da žyćcia maskoŭskaj «załatoj moładzi». Pa słovach krynicy, jany šmat času baviać za šopinham.
Adziny raz, kali siamju Asadaŭ — biez Bašara — bačyli razam na publicy ŭ Maskvie, byŭ vypuskny viečar jahonaj dački Zejn al-Asad 30 červienia. 22‑hadovaja dačka byłoha siryjskaha dyktatara ŭ toj dzień atrymała dypłom Maskoŭskaha dziaržaŭnaha instytuta mižnarodnych adnosin.
Adnahrupniki Zejn adznačyli, što Asady trymalisia ŭ ciani, nie fatahrafavalisia z Zejn na scenie, jak inšyja siemji i chutka źjechali. Źlityja bazy źviestak pakazvajuć, što dziaŭčyna zarehistravanaja ŭ elitnych sałonach pryhažości i spartzałach Maskvy.
Syn Chafiez, jakoha kaliści rychtavali ŭ pierajemniki, zakryŭ bolšaść svaich sacsietak paśla taho, jak u lutym u Telegram vykłaŭ videa z svajoj viersijaj uciokaŭ z Damaska, i siryjcy chutka vyznačyli jahonaje miescaznachodžańnie. Chłopiec zarehistravaŭ akaŭnty pad psieŭdanimam z amierykanskaha dziciačaha sieryjała.
Jak vyśvietlili žurnalisty, dzieci rehularna naviedvajuć AAE, i prynamsi, adnojčy ŭ takoj pajezdcy ź imi była maci Asma. Pieršapačatkova siamja spadziavałasia pierajechać tudy nazaŭždy, bo Dubaj im bolš znajomy i zrazumieły, čym chałodnaja Maskva. Adnak, jak piša Guardian, navat Emiraty, jakija prytulili mnohich sumnieŭnych bahaciejaŭ, pakul nie hatovyja pryniać taksičnaha eks-dyktatara na pastajannaje miesca žycharstva.
Kamientary