Pad Minskam vystavili na prodaž siadzibu XVIII stahodździa amal za paŭmiljona dalaraŭ
Usiaho za 12 kiłamietraŭ ad Minska, u ahraharadku Siomkava, źjaviłasia prapanova ab prodažy staradaŭniaj siadziby, pabudavanaj naprykancy XVIII stahodździa. Za histaryčny kompleks z amal 250‑hadovaj historyjaj prosiać 457,3 tysiačy dalaraŭ. Abjava raźmieščanaja na Inviestycyjnym partale Biełarusi.
Havorka idzie pra siadzibna-parkavy ansambl 1780 hoda pabudovy. U jaho skład uvachodziać hałoŭny dom i dva flihieli — usie budynki cahlanyja, adnapaviarchovyja. Ahulnaja płošča pamiaškańniaŭ składaje kala 1954 kvadratnyja mietry. Razam z budynkami pradajecca i ziamielny nadzieł płoščaj 3,61 hiektara. U apisańni adznačana, što terytoryja dahledžanaja i pakrytaja travoj.
Ciapier siadziba znachodzicca na bałansie adździeła ideałahičnaj raboty, kultury i spraŭ moładzi Minskaha rajvykankama. Paśla nabyćcia abjekt možna budzie vykarystoŭvać u śfiery pasłuh.
Inžyniernych kamunikacyj na terytoryi pakul niama. Adnak u dakumientach paznačana, što jość mahčymaść padklučeńnia vady, hazu i elektraenierhii. Taksama źviartajecca ŭvaha, što niepasredna kala abjekta adsutničaje transpartnaja infrastruktura.
Pačatak historyi hetaj siadziby źviazany ź imieniem Adama Chmary. Paśla treciaha padziełu Rečy Paspalitaj jon prysiahnuŭ impieratrycy Kaciarynie II, što dapamahło jamu zachavać svaje ŭładańni, u tym liku i majontak u Siomkavie. Ź ciaham času ŭ siadziby źmianiłasia niekalki ŭładalnikaŭ, a paśla revalucyi 1917 hoda jana była nacyjanalizavanaja.
U saviecki pieryjad u budynkach siadziby raźmiaščaŭsia dziciačy dom. Mienavita z hetym časam źviazana adna z samych trahičnych staronak jaje minułaha. Padčas niamieckaj akupacyi dzieci, jakich nie paśpieli adsiul evakujavać, apynulisia biez nahladu darosłych. Kab nie pamierci z hoładu, jany chadzili pa ježu ŭ susiednija vioski.
U lutym 1944 hoda bajcy partyzanskaj bryhady «Šturmavaja» vyvieźli 274 vychavancy na terytoryju partyzanskaj zony. Miarkujecca, što takim čynam im udałosia vyratavać dzieciam žyćcio. U pamiać pra hetyja padziei na terytoryi siadziby ŭstalavany pamiatny znak.
Paśla vajny budynak pierastali vykarystoŭvać u jakaści dziciačaha doma z-za adsutnaści centralnaha aciapleńnia i vodazabieśpiačeńnia. Pobač pabudavali novy korpus, a staraja siadziba pačała pastupova razburacca.
Da 2010 hoda ŭ adnym ź flihielaŭ jašče žyli ludzi. Niekatoryja ź ich zastajucca tam prapisanymi i ciapier, niahledziačy na toje, što budynak pryznany avaryjnym i daŭno nie ekspłuatujecca. Pry hetym śpiecyjalisty miarkujuć, što flihiel možna adnavić biez praźmiernych vydatkaŭ.
Stan hałoŭnaha doma značna horšy: paśla straty dachu razbureńnie paskoryłasia, i ŭ vyniku druhi pavierch byŭ całkam źniščany.
U Mastoŭskim rajonie šmatdzietnaja maci nabyła pad žyllo zakinuty dziciačy łahier
Dziciačy łahier pad Minskam kupili za miljon dalaraŭ, ale ŭžo praz paru miesiacaŭ viarnuli nazad
U Minsku pradajuć vahon ź biznes-sałonam. Cana, jak za niekalki kvater
U Tałačynskim rajonie vystavili na prodaž staruju siadzibu Ciundziavickich
Ciapier čytajuć
Aryštavany sienatar Karpicki, hałoŭny doktar Bresckaj abłasnoj balnicy7
Kamientary
Ciapier siadziba znachodzicca na bałansie adździeła ideałahičnaj raboty, kultury i spraŭ moładzi Minskaha rajvykankama./
Da jakoha žachlivaha stanu "dahledzieli" našu histaryčnuju spadčynu ideołahi Minskaha rajvykankama....