Film tydnia: «Pieršy sustrečny». Ramantyčnaja kamiedyja z Dženifier Łopiez — idealny varyjant, kab prosta rassłabicca
Karcina «Pieršy sustrečny» (Marry Me) vychodzić u minski prakat 10 lutaha, jakraz napiaredadni Dnia śviatoha Valancina. Stužka była hatovaja jašče ŭ žniŭni 2020 hoda, ale ž vychad karciny adkłali praz pandemiju. Tłumačym, čamu jaje varta pahladzieć.
Mora pačućciaŭ: kachańnie, zdrada, novaje kachańnie
Heta historyja viadomaj (vydumanaj) śpiavački Ket Valdez, jakaja čakaje šlubu z kachanym Baścijanam. Nie aby kim, a taksama pop-zorkaj.
Dla cyrymonii para vybiraje niezvyčajnyja abstaviny: Ket i Baścijan žadajuć pabracca šlubam na vialikim kancercie pierad natoŭpam fanataŭ.
Za niekalki chvilin da ŭračystaści Ket atrymlivaje žachlivuju infarmacyju, što Baścijan joj zdradziŭ. Ale ž jaje ŭsio roŭna čakaje cyrymonija! I Ket prymaje niečakanaje rašeńnie — vyjści zamuž za nieznajomca, pieršaha, chto trapiŭ joj na vočy siarod fanataŭ na tym samym kancercie, — prostaha vykładčyka matematyki.
Zabojny akciorski skład
Jakimi b jarkimi ni byli Ket i Baścijan, ich roli vykonvajuć nie mienšyja zorki (a to i bolšyja).
Za Ket «adkazvaje» Dženifier Łopiez — śpiavačka, jakaja nie patrabuje pradstaŭleńnia. Ale ž nahadajem, što Łopiez jašče i vopytnaja aktrysa. Voś niekalki samych viadomych stužak ź jaje ŭdziełam: «Sielena», «Ź mianie chopić», «Davajcie patancujem».
Što da zdradnika Baścijana, jaho ŭ stužcy syhraŭ kałumbijski śpiavak Małuma, vykanaŭca śpievaŭ u žanry rehieton. Jon nie taki znakamity ŭ nas, jak Džej Ło, ale ž heta adzin z najlepšych łacinaamierykanskich śpievakoŭ, kali hladzieć pa prodažach albomaŭ i sinhłaŭ.
Rolu vykładčyka matematyki, za kaho vyjšła Ket, vykonvaje taksama zorka. Heta Oŭen Uiłsan, i vy dakładna bačyli jaho ŭ stolkich kamiedyjach, što ciažka padličyć. Uiłsan zdymaŭsia ŭ takich stužkach, jak «Znajomstva z baćkami», «Znajomstva z Fakierami», «Noč u muziei» (usie try častki), «Vialiki hod». Dadadzim da hetaha niekamiedyjnyja, ale nie mienš viadomyja «Armahieddon» i «Vakoł śvietu za 80 dzion» — i heta daloka nie ŭvieś pieralik.
Vydatny saŭndtrek
«Pieršy sustrečny» — film sa śpievakami i pra śpievakoŭ, tamu naturalna, što ad karciny čakajuć dobry saŭndtrek. Častku piesień dla alboma zapisała Dženifier Łopiez, častku — Małuma, plus na dysku jość try ich sumiesnyja treki.
Łopiez tłumačyć, što joj nie chaciełasia vydavać čarhovy dysk «ad Džej Ło». Jana žadała ŭvasobić svaju hierainiu ŭ muzycy, zrabić niešta admietnaje.
Schadzicie i pahladzicie, jak atrymałasia.
Film tydnia: «Paralelnyja maci». Novaja stužka Almadovara, jakoj 9 chvilin apładziravali u Vieniecyi
Što pahladzieć. «Miunchien: na miažy vajny» — špijonski tryler pra Miunchienskuju zmovu, jaki pakidaje adčuvańnie dežaviu
Ciapier čytajuć
Jak žyvie Aleś Muchin, viadomy znaŭca «Što? Dzie? Kali?»11
Kamientary