Mask zatroliŭ Rahozina: «Kali zabłakujecie nas, chto vyratuje MKS?» — «SpaceX»
Hiendyrektar «Raskosmasa» Dźmitryj Rahozin aburyŭsia ŭ tvitary anansavanymi ZŠA sankcyjami ŭ suviazi z uvarvańniem Rasii va Ukrainu.
Voś, što jon napisaŭ:
«Bajden zajaviŭ, što novyja sankcyi zakranuć rasijskuju kaśmičnuju prahramu. Ok. zastajecca vyśvietlić detali.
1. Vy chočacie pierakryć nam dostup da radyjacyjna-stojkaj mikraelektroniki kaśmičnaha pryznačeńnia? Dyk vy heta ŭžo zrabili całkam aficyjna ŭ 2014 hodzie.
Jak vy zaŭvažyli, my, tym nie mienš, praciahvajem rabić svaje kaśmičnyja aparaty. I budziem ich rabić, razharnuŭšy vytvorčaść nieabchodnych kampanientaŭ i pryboraŭ u siabie.
2. Vy chočacie zabaranić usim krainam vyvodzić svaje kaśmičnyja aparaty na samych nadziejnych u śviecie rasijskich rakietach?
Dyk vy heta ŭžo robicie i płanujecie kančatkova źniščyć z 01.01.2023 hoda suśvietny rynak kaśmičnaj kankurencyi, uvodziačy sankcyi na našy rakiety-nośbity. My ŭ kursie. Heta taksama nie navina. My i tut hatovyja dziejničać.
3. Vy chočacie źniščyć naša supracoŭnictva na MKS?
Dyk vy heta ŭžo robicie, abmiažoŭvajučy abmieny pamiž našymi centrami padrychtoŭki kasmanaŭtaŭ i astranaŭtaŭ. Ci vy chočacie samastojna kiravać MKS? Moža prezident Bajden nie ŭ temie, to rastłumačcie jamu, što karekcyja arbity stancyi, jaje ŭchileńnie ad niebiaśpiečnych zbližeńniaŭ z kaśmičnym śmiećciem, jakim vašyja talenavityja biznesoŭcy zahadzili kalaziamnuju arbitu, vyrablajecca vyklučna ruchavikami rasijskich hruzavych karabloŭ «Prahres MS». Kali zabłakujecie supracoŭnictva z nami, chto vyratuje MKS ad niekiravanaha zychodu z arbity i padzieńnia na terytoryju ZŠA?»
U hetym momancie ŭ śpič Rahozina ŭvarvaŭsia Iłan Mask.
«SpaceX», — łakanična adkazaŭ jon hiendyrektaru «Raskosmasa».
Ranicaj 26 lutaha Rahozin anansavaŭ sankcyi Rasii ŭ adkaz na sankcyi Jeŭrasajuza.
«Raskosmas» prypyniaje supracu ź jeŭrapiejskimi partniorami pa arhanizacyi kaśmičnych zapuskaŭ z kasmadroma Kuru i adklikaje svoj techničny piersanał, uklučajučy zvodny startavy raźlik, z Francuzskaj Hvijany», — paviedamiŭ jon.
Ciapier čytajuć
«Abmiarkoŭvajem pytańnie ab vyzvaleńni jašče 1300 źniavolenych». Tramp raskazaŭ, pra što havaryŭ z Łukašenkam27
Kamientary