Abvinavačany ŭ napadzie na Azaronka raskazaŭ pra katavańni paśla zatrymańnia

Ni Azaronak, ni apieratyŭny supracoŭnik KDB Alaksiej Hardziejeŭ, jaki byŭ ukaraniony ŭ AHSB, u sud siońnia nie pryjšli. Adnak byli začytanyja pakazańni Hardziejeva.

Viadoma, što da ŭkaranieńnia ŭ AHSB jon try hady pracavaŭ u KDB. U jaho abaviazki ŭvachodziŭ apieratyŭny zbor infarmacyi, jakaja stvaraje pahrozu nacbiaśpiecy, ustupleńnie ŭ kantakty z asobami, jakija źbirajucca ździejśnić akty teraryzmu, a taksama złačynstvy, nakiravanyja na zachop ułady niekanstytucyjnym šlacham.

Jak vynikaje z pakazańniaŭ Hardziejeva, jon zavioŭ akaŭnty, praź jakija pačaŭ kantaktavać sa strukturami, jakija nibyta płanavali ździajśnieńnie teraktaŭ u Biełarusi. Ustupiŭ u pierapisku z kiraŭnikom AHSB i zakazčykam teraktaŭ Dzianisam Chromavym/Chofmanam (Dzisam).

Pa jaho słovach, havorka išła pra vybuchi na terytoryi Biarezinskaha lashasa, na rasijskaj vajskovaj bazie «Vilejka», a taksama ździajśnieńnie teraktu ŭ dačynieńni da jakoha-niebudź biełaruskaha teležurnalista.

Jak vynikaje z pakazańniaŭ Hardziejeva, Chofman pastaviŭ zadaču «vykraści kaho-niebudź ź biełaruskich teležurnalistaŭ — Azaronka, Tura abo Markava, vyvieźci ŭ les, prymusić jaho na fonie bčb-ściaha admovicca ad padtrymki Łukašenki, potym adrezać jazyk, pryniać miery, kab jon zastaŭsia žyvy, źniać usio heta na videa i adpravić jaho Dzisu».

Z pakazańniaŭ apieratyŭnika vynikaje, što Dzis spyniŭsia na kandydatury Azaronka, tamu što ličyŭ, što videa z Azaronkam, jaki adrakajecca ad svajoj pazicyi, i z adrezanym jazykom stanie «tryhieram dla hramadstva».

Pavodle jaho słoŭ, čałaviek ź nikam «Błek Džek» zaprasiŭ 400 dalaraŭ za napad.

Pavodle pakazańniaŭ apieratyŭnika, u zaplečniku, ź jakim jany pryjechali da doma Azaronka, byli «maski, pistalet, patrony, elektrašokier, skotč, abcuhi — kab trymać jazyk».

Apieratyŭnik zajaviŭ, što terakt u dačynieńni da Azaronka ździejśnić nie ŭdałosia z pryčyny taho, što jany byli zatrymanyja supracoŭnikami KDB, a čałaviek ź nikam «Błek Džek» — heta Dźmitryj Sasnoŭski.

Padčas dačy pakazańniaŭ u formie volnaha apoviedu Sasnoŭski płakaŭ i zajaviŭ, što ŭ złačynstva ŭ dačynieńni da Azaronka jaho ŭciahnuli padčas śledčaha ekśpierymientu.

Jon taksama zajaviŭ sudu, što paśla zatrymańnia kala doma Azaronka da jaho «ŭžyvali hvałt i katavańni, prymusili napisać čystasardečnaje pryznańnie».

Sasnoŭski taksama zajaviŭ sudu, što nie pryznaje siabie vinavatym u padrychtoŭcy złačynstva ŭ dačynieńni da Azaronka. Ale pry hetym padrabiazna raspavioŭ, jak jamu prapanoŭvali paŭdzielničać u vykradańni žurnalista.

Adkazvajučy na pytańnie prakurora, čamu jon nie zajaviŭ u milicyju ab tym, što ŭ dačynieńni da Azaronka rychtujecca złačynstva, Sasnoŭski zajaviŭ, što pabajaŭsia, što milicyja pačnie jaho vykarystoŭvać i adpravić na sustreču «z žučkami».

Sasnoŭski kateharyčna admoviŭsia ad udziełu ŭ złačynstvie ŭ dačynieńni da Azaronka, paćvierdziŭšy, što prapanoŭvaŭ svaim zmoŭščykam, kab paciarpieły «sam čyknuŭ sabie jazyk na kamieru».

Sasnoŭskaha taksama abvinavačvajuć u stvareńni i viadzieńni telehram-kanała «Hidra», pryznanaha ekstremisckim. Dźmitryj nie pryznaŭ siabie vinavatym. Jon skazaŭ, što ŭ telehram-kanale pisaŭ iłžyvyja paviedamleńni, kab adciahnuć uvahu siłavikoŭ.

Nie pryznaŭ Sasnoŭski i abvinavačvańniaŭ u niezakonnym abychodžańni z ahniastrelnaj zbrojaj, a taksama ŭ tym, što jon raspalvaŭ sacyjalnuju roźnicu i varožaść (art.130).

Čytajcie taksama:

«Sprava AHSB»: jak KDB arhanizoŭvaŭ «terakty»

• 4
• 0
• 1
• 3
• 1
• 8
• 36
• 0