«Sotni kurdaŭ raskazvajuć pra suviaź z dačkoj premjera Kurdystana. I tolki 1% zajaŭ na prytułak ad mihrantaŭ u Brytanii sapraŭdnyja»

Tema nielehalnaj mihracyi zastajecca adnoj z vostrych u Vialikabrytanii. Ludzi praciahvajuć pierasiakać Ła-Manš na nievialikich łodkach, a ich prybyćcio časam vyklikaje pratesty.

Na hetym fonie hazieta The Times apublikavała vialiki materyjał pra toje, jak pracuje brytanskaja sistema prytułku i jakimi sposabami joj mohuć złoŭžyvać.

Krynicaj vydańnia staŭ supracoŭnik Ministerstva ŭnutranych spraŭ, jaki šmat hadoŭ prymaje rašeńni pa zajavach na prytułak i za hety čas razhledzieŭ tysiačy spraŭ. The Times nie nazyvaje jaho imia i paznačaje litaraj J.

«U najlepšym vypadku tolki 1% zajaŭ na prytułak majuć sapraŭdnyja padstavy. Amal niama takoha aśpiektu sistemy prytułku, dzie nie było b albo maštabnaha machlarstva, albo surjoznych zbojaŭ. Ničoha nie pracuje tak, jak pavinna», — śćviardžaje jon.

Sotni «kachankaŭ» i «hiejaŭ»

J raskazaŭ The Times, što ŭ pracy rehularna sutykajecca z adnolkavymi historyjami ad ludziej z adnych i tych ža krain. Jon i jaho kalehi nazyvajuć ich «pakietnymi zajavami».

Adzin z najbolš jaskravych prykładaŭ — irakskija kurdy, jakija śćviardžali, što mieli ramantyčnyja adnosiny z dačkoj premjer-ministra Kurdystana i tamu vymušanyja šukać prytułak.

Takich mužčyn, pavodle J, akazalisia sotni. Siarod supracoŭnikaŭ MUS heta navat stała pradmietam žartaŭ.

Inšaja schiema źviazanaja z hramadzianami Pakistana, jakija śćviardžajuć, što na radzimie im pahražaje niebiaśpieka praź ich homaseksualnaść.

J kaža, što jon i jaho kalehi sutykalisia z sotniami zajaŭ ad pakistancaŭ, jakija nazyvali svaim bojfrendam adnaho i taho ž mužčynu. Toj davaŭ im listy, jakija pavinny byli paćvierdzić ich adnosiny.

Pavodle J, u zajavach pakistanskich mužčyn časta fihuravali fatahrafii z adnoj i toj ža hiej-placoŭki va ŭschodnim Łondanie — kłuba Legs 800, jaki nazaŭsiody začyniŭsia ŭ minułym hodzie.

«Atrymlivaješ hetyja zdymki — i tam dziesiać pakistanskich chłopcaŭ stajać z hołym torsam u kłubie, abniaŭšy adzin adnaho, kab pasprabavać dakazać, što jany hiei», — raskazvaje J.

Ministerstva ŭnutranych spraŭ rasśleduje rost kolkaści falšyvych zajaŭ ad ludziej, jakija vydajuć siabie za hiejaŭ. Sioleta była pačataja novaja pravierka paśla taho, jak rasśledavańnie BBC vykryła cieniavuju industryju jurydyčnych firmaŭ i imihracyjnych kansultantaŭ, jakija biaruć tysiačy funtaŭ za dapamohu mihrantam u padačy iłžyvych zajaŭ ab svajoj aryjentacyi.

Adzin ź imihracyjnych advakataŭ raskazaŭ žurnalistu, jaki vydaŭ siabie za mihranta, što MUS nikoli nie praviaraje praŭdzivaść takich słoŭ, i paraiŭ kazać na intervju: «Ja hiej, i heta maja realnaść».

Apazicyjaniery z Banhładeš

Pavodle słoŭ J, za apošnija paru hadoŭ źjaviłasia vialikaja kolkaść zajaŭnikaŭ z Banhładeš, jakija śćviardžajuć, što zaznajuć palityčny pieraśled praź siabroŭstva ŭ «Avami Lih», jakaja była va ŭładzie 15 hadoŭ da 2024 hoda. Ciapier usia dziejnaść hetaj partyi ŭ Banhładeš zabaronienaja.

Jak śćviardžaje J, mnohija banhładešcy, jakija nazyvajuć siabie siabrami partyi abo jaje studenckaha kryła «Čchatra», nie mohuć raskazać ničoha istotnaha pra jaje palityku, aproč łozunha «Adukacyja, mir, roskvit».

Pry hetym jany niaredka zajaŭlajuć, što zajmali ŭ partyi vysokija pasady — prezidenta, vice-prezidenta abo hienieralnaha sakratara. Na pytańnie pra svaje abaviazki jany adkazvajuć adnolkava: «dapamahać studentam, jakija mieli finansavyja ciažkaści padčas navučańnia».

Pavodle J, padobnyja historyi z Banhładeš źjaŭlalisia hadami. Paśla źmieny ŭłady zajaŭnikam, pavodle jaho, zastavałasia tolki pamianiać nazvu partyi, pieraśledu jakoj jany nibyta bajalisia.

Zajavy časta padmacoŭvajucca «falšyvymi palicejskimi dakumientami», dzie «znoŭ i znoŭ vykarystoŭvajecca adno i toje ž imia sudździ, adnaho i taho ž mahistrata i adno i toje ž miesca».

Ale patelefanavać u Banhładeš i pravieryć sapraŭdnaść dakumienta brytanski čynoŭnik nie moža. Mižnarodnyja praviły kanfidencyjalnaści zabaraniajuć paviedamlać uładam krainy pachodžańnia pra toje, što čałaviek prosić prytułak: kali jaho historyja sapraŭdnaja, takaja pravierka sama moža pastavić jaho pad pahrozu.

Pry hetym, jak adznačaje vydańnie, Pakistan i Banhładeš uvachodziać u lik asnoŭnych krain pa kolkaści zvarotaŭ pa prytułak u Vialikabrytanii. Amal dzieviać ź dziesiaci ŭsich zajaŭ padajuć ludzi, jakija pryjechali ŭ krainu pa pracoŭnych, vučebnych abo turystyčnych vizach i zastalisia paśla zakančeńnia terminu ich dziejańnia.

Admović składaniej, čym pahadzicca

J bačyć prablemu nie tolki ŭ dziejańniach niekatorych mihrantaŭ, ale i ŭ samoj arhanizacyi pracy MUS.

Paśla prybyćcia ŭ Vialikabrytaniju abo padačy zajavy paśla zakančeńnia vizy mihranty prachodziać karotkaje «skryninhavaje intervju», na jakim źbirajecca bazavaja infarmacyja. Pavodle J, zajaŭniki padčas jaho časta adkazvajuć vielmi raspłyvista.

Paźniej pravodzicca druhoje, asnoŭnaje intervju, jakoje moža praciahvacca niekalki hadzin. Raniej pamiž dvuma intervju mahło prajści niekalki miesiacaŭ. Surazmoŭca vydańnia ličyć, što taki pierapynak dazvalaje padrychtavać historyju, atrymać kansultacyi i znajści nieabchodnyja falšyvyja dokazy.

Ciapier MUS paskoryła razhlad zajaŭ i skaraciła hety pramiežak. Adnak, pavodle J, niekatoryja zajaŭniki biaruć daviedku ab chvarobie i tak atrymlivajuć jašče niekalki miesiacaŭ na padrychtoŭku.

Pavodle J, kultura ŭ kamandach Ministerstva stvaraje ŭnutranuju ŭstanoŭku na karyść zadavalnieńnia zajaŭ. Čynoŭnik pavinien zadavolić zajavu, kali ličyć, što zajaŭnik «chutčej za ŭsio» kaža praŭdu.

Adabreńnie zajavy zajmaje «maksimum paŭhadziny», tady jak afarmleńnie admovy moža doŭžycca šmat hadzin, bo čynoŭnik musić adkazać na kožny arhumient zajaŭnika.

J pryvodzić prykład: čałaviek kaža, što baicca być zabitym paśla viartańnia na radzimu, ale śćviardžaje, što nie viedaje, jak paviedamić pra niebiaśpieku palicyi svajoj krainy. Supracoŭnik MUS tady pavinien rastłumačyć jamu, jak źviarnucca ŭ palicyju. Časam u rašeńni davodzicca taksama pieraličvać kanstytucyjnyja pravy, jakija čałaviek maje ŭ siabie na radzimie.

Pavodle J, kiraŭnictva taksama zahadvała nazyvać prośbitaŭ prytułku «klijentami». Jon ličyć, što heta adlustroŭvaje padychod, pry jakim supracoŭnik adčuvaje, što «akazvaje pasłuhu im, a nie krainie».

Pazicyja ŭładaŭ

Ministerstva ŭnutranych spraŭ nie pahadziłasia z vysnovami ananimnaha supracoŭnika.

U viedamstvie zajavili The Times, što nie kamientujuć «ananimnyja paviedamleńni». U MUS zapeŭnivajuć, što majuć adpracavanyja pracedury pravierki praŭdzivaści zajaŭ i vyjaŭleńnia machlarstva. 

U jakaści adnaho z pakazčykaŭ viedamstva pryvodzić statystyku. U 2022 hodzie stanoŭča zakančvalisia 77% razhledžanych zajaŭ, ciapier — 38%. Za hod da červienia status uciekača atrymali 42 394 čałavieki pry 115 394 pieršasnych rašeńniach.

Brytanskija ŭłady abiacajuć dalej uzmacniać baraćbu sa złoŭžyvańniami. U kancy červienia ŭ Pałatu abščyn unieśli novy zakonaprajekt ab imihracyi i prytułku, jaki ŭžo prajšoŭ druhoje čytańnie i ciapier znachodzicca na razhladzie parłamienta.

U MUS zajaŭlajuć, što novy zakon pavinien paskoryć razhlad zajaŭ i ŭzmacnić baraćbu z tymi, chto sprabuje padmanuć imihracyjnuju sistemu. Kiraŭnica viedamstva papiaredziła: tym, chto sprabuje padmanam atrymać prava zastacca ŭ Vialikabrytanii, admoviać i vyšluć z krainy.

• 0
• 0
• 7
• 4
• 0
• 1
• 0
• 0