Nastupleńnie USU na Limanskim kirunku: što viadoma pra apieracyju i čamu OSINT-analityki nazyvajuć jaje praryvam
Kamandujučy Trecim armiejskim korpusam Uzbrojenych sił Ukrainy hienierał Andrej Bilecki apublikavaŭ 7 vieraśnia videa z centra horada Śviatahorsk u Danieckaj vobłaści, jaki Ministerstva abarony Rasii i asabista prezident Uładzimir Pucin užo abviaścili zachoplenym. Bolš za toje, pavodle danych OSINT-analitykaŭ, ukrainskaja armija praciahvaje kontrnastupalnuju apieracyju na Limanskim kirunku i, imavierna, užo dasiahnuła značnych pośpiechaŭ. Krynicy Ukrainskaj słužby Bi-bi-si padkreślivajuć, što heta «sakretnaja apieracyja jašče praciahvajecca».
Pra ŭziaćcie Śviatahorska kiraŭnik Kramla Uładzimir Pucin zajaviŭ 1 vieraśnia. Hety horad lažyć za 15 km na paŭnočny zachad ad Limana, i na jaho ŭskrainie raźmieščanaja važnaja śviatynia dla pravasłaŭnych chryścijan — Śviata-Uśpienskaja łaŭra. Na nastupny dzień infarmacyju pra zachop horada raspaŭsiudziła Ministerstva abarony Rasii. Nijakich dokazaŭ hetaha viedamstva nie padało.
Užo tady hetyja zajavy vyklikali skiepsis navat u prarasijskich vajennych błohieraŭ. Reč u tym, što nasieleny punkt znachodziŭsia na toj momant prykładna za 10—12 km ad linii frontu i nijakich danych pra paśpiachovuju infiltracyju ŭ jaho kirunku rasijskich šturmavikoŭ nie było.
Na nastupny dzień paśla zajaŭ Rasii šerah ukrainskich žurnalistaŭ prajšlisia pa Śviatahorsku i nie znajšli tam rasijan. Udzień 7 vieraśnia pres-słužba Treciaha armiejskaha korpusa, jaki adkazvaje za hety ŭčastak frontu, raspaŭsiudziła videa z zajavaj hienierała Bileckaha, jaki svabodna i navat biez kaski hulaje pa vulicach Śviatahorska i kala Śviata-Uśpienskaj Łaŭry. Jon demanstruje, što pa horadzie pierasuvajucca cyvilnyja aŭtamabili, a sam nasieleny punkt znachodzicca pad poŭnym kantrolem ukrainskaj armii. Bolš za toje, kamandzir 3 AK nazyvaje jaho «tyłavym horadam».
«U Śviatahorsku nie toje što nikoli rasijskaha sałdata nie było (u 2022 hodzie hety horad niekalki miesiacaŭ byŭ pad akupacyjaj armii RF. — Red.), ale tut u pryncypie hulać možna bieź nijakich prablem, choć i pažadana ŭ braniravanaj kamizelcy… Heta tyłavaja zona našaha korpusa, tut usio cudoŭna», — zajaviŭ jon.
Pa mierkach rasijska-ŭkrainskaj vajny farmuloŭka «tyłavaja zona» moža śviedčyć, što nasieleny punkt znachodzicca jak minimum za 20—30 km ad linii frontu. I dalejšyja paviedamleńni ŭkrainskich, rasijskich i zamiežnych OSINT-analitykaŭ sapraŭdy zaśviedčyli, što ŭkrainskaj armii, imavierna, udałosia nie tolki adkinuć praciŭnika ad Śviatahorska, ale i adbić u jaho značnuju terytoryju kala Limana.
«Uraźlivy» vystup
Infarmavanyja krynicy Bi-bi-si siarod vajskova-palityčnaha kiraŭnictva paćviardžajuć fakt nastupalnaj apieracyi kala Limana, ale padkreślivajuć, «što jana jašče praciahvajecca». Adpaviedna, pakul nijakich aficyjnych padrabiaznaściaŭ.
U pres-słužbie Treciaha armiejskaha korpusa zajavili, što nie mohuć kamientavać hetaje pytańnie «ź mierkavańniaŭ biaśpieki».
U toj ža čas šerah zamiežnych OSINT-analitykaŭ paviedamili pra toje, što nastup ukraincaŭ na hetym učastku frontu ŭžo dasiahnuŭ pośpiechu i ŭdałosia vyzvalić sotni kiłamietraŭ terytoryi, zrezaŭšy «vystup» rasijskaj armii, jaki sfarmavaŭsia na paŭnočny zachad ad Limana.
Havorka idzie pra płacdarm US RF, jaki jany zachapili na pravym bierazie raki Čorny Žarabiec letam-vosieńniu 2025 hoda. Tady rasijskija vajskoŭcy zmahli farsiravać vodnuju pieraškodu i prasunucca ŭhłyb ukrainskaj terytoryi na 17—20 km u kirunku Śviatahorska. Jany taksama farsiravali raku Nitryus i ŭ sakaviku hetaha hoda Minabarony Rasii abviaściła pra ŭziaćcie pasiołka Jaravaja, jaki znachodzicca ŭsiaho za 5 km ad Śviatahorskaj Łaŭry.
Dalejšaje prasoŭvańnie mahło pryvieści da padzieńnia Limana, jaki b akazaŭsia adrezanym ad łahistyčnych maršrutaŭ, a za im i da surjoznaha ŭskładnieńnia situacyi na poŭdzień — kala Słavianska-Kramatorskaj ahłamieracyi.
Pavodle danych francuzskaha vajskovaha OSINT-analityka Klemana Malina, ukrainskija Siły abarony jašče naprykancy maja pačali kontrnastupalnuju apieracyju kala Limana, jakaja praciahvałasia amal 4 miesiacy ŭ režymie poŭnaj sakretnaści.
Ekśpiert adznačyŭ, što baki amal nie publikavali kantent z hieapryviazkaj da hetych miaścin, ale jon u pryvatnaści analizavaŭ, kudy mienavita traplali rasijskija avijabomby. Heta dazvalała jamu rabić vysnovy pra toje, chto kantraluje zhadanuju terytoryju.
Malin adznačyŭ, što jašče ŭ červieni-lipieni USU ŭdałosia vyzvalić šerah siołaŭ na hetym kirunku, adnak infarmacyja pra heta była zasakrečanaja. Ciapier, pavodle jaho danych, ukrainskaja armija całkam zrezała rasijski vystup, adkinuŭšy praciŭnika za raku Žarabiec.
Amierykanski analityčny centr «Instytut vyvučeńnia vajny» (ISW) u svajoj spravazdačy ad 7 vieraśnia spasyłajecca na rasijskich vajennych błohieraŭ, jakija «ŭsio čaściej pryznajuć fakty ŭkrainskich kontratak navokał Limana»
«Mietadałohija kartahrafavańnia ISW niedaaceńvaje maštaby imaviernych ukrainskich pośpiechaŭ u biahučych kontratakach na Limanskim kirunku, i dadatkovy zbor danych, imavierna, pakaža poŭny maštab ukrainskich pieramoh na Limanskim kirunku uvosień 2026 hoda», — havorycca ŭ spravazdačy.
Ukrainski vajskovy analityk Michaił Žyrochaŭ zajaviŭ Bi-bi-si, što jahonyja krynicy siarod vajskoŭcaŭ USU paćviardžajuć infarmacyju pra paśpiachovuju likvidacyju rasijskaha płacdarma kala Limana.
«Mnie vielmi aściarožna paćvierdzili, što sapraŭdy tak, udałosia zrezać rasijski vystup», — skazaŭ jon.
Analityk patłumačyŭ:
«Reč u tym, što hety vystup RF «pieraśpieŭ». Rasijanie vysunulisia zanadta daloka, a fłanhi jaho nie zabiaśpiečyli, nieabchodnych sił i srodkaŭ tam nie było. Ukrainskija hrupoŭki zmahli nanieści rasijanam dva sustrečnyja ŭdary ŭ kirunku vuzkaha «pierašyjka» hetaha vystupu. Heta było najbolš uraźlivaje jaho miesca».
Žyrochaŭ padkreślivaje, što, pavodle jaho danych, ukrainskaja armija nie prosta stvaryła tut «kił-zonu» z dapamohaj udarnych BPŁA, a fizična začyściła ad praciŭnika paznačanuju terytoryju. Na jaho dumku, USU nie praciahnuć nastup uhłyb terytoryi, a buduć utrymlivać abaronu pa rubiažy raki Čorny Žarabiec, kab nie dapuścić jaje farsiravańnia. Heta moža zrujnavać usie płany RF pa zachopie Limana i vychadzie ŭ tył hrupoŭki, jakaja abaraniaje Słaviansk.
Što kažuć rasijanie
Aficyjnyja rasijskija krynicy ŭkrainskija kontrataki kala Limana (Kreml vykarystoŭvaje savieckuju nazvu «Čyrvony Liman») nie kamientavali. Bolš za toje, zhodna z zajavami Minabarony RF, pa stanie na siaredzinu žniŭnia rasijanie pravodzili «začystku Limana» i «pierarezali łahistyku» USU na hetym kirunku.
Zusim inšaja situacyja vymaloŭvajecca z paviedamleńniaŭ pravajennych błohieraŭ z Rasii. Niekatoryja ź ich navat pačali havaryć pra adstupleńnie ci atačeńnie rasijskaj hrupoŭki.
Tak, bujny telehram-kanał «Dva majora» (amal 1,2 miljona padpisčykaŭ) pa stanie na 8 vieraśnia zajaŭlaŭ, što situacyja na Limanskim kirunku «ŭskładniajecca». Adznačana, što ŭkrainskija siły atakujuć z paŭnočnaha kirunku kala viosak Redkadub i Karpaŭka, zachodziać u vioski Jampoleŭka i Zarečnaje, jakija znachodziacca na levym bierazie raki Čorny Žarabiec, a taksama ŭžo vybili armiju Rasii z paŭdniova-ŭschodnich uskrain Limana.
Jašče adzin rasijski Z-błohier Juryj Padalaka (amal 2,7 miljona padpisčykaŭ) taksama pryznaŭ, što ŭkrainskaja armija «prasoŭvajecca napierad» z metaj abrazańnia rasijskaj łahistyki kala Limana.
Telehram-kanał «Rybaŕ» (1,5 miljona padpisčykaŭ) pryznaje, što na hetym kirunku «źjaŭlajucca novyja śviedčańni paharšeńnia abstanoŭki».
Pavodle danych vajennaha błohiera Anatola Radava (36,5 tysiač padpisčykaŭ), situacyja tut dla rasijskich vojskaŭ «składanaja» i robicca «ŭsio horšaj i horšaj». Adnak jon admaŭlaje, što jość «zahad na adstupleńnie vojskaŭ» kala Limana.
«Chłopcy trymajuć abaronu», — napisaŭ jon.
Praŭda, nie adznačyŭ, dzie mienavita.
Ciapier čytajuć
Julijana Šamietaviec z «Kibierpartyzanaŭ» stała maci — raskazvaje pra dekretny adpačynak u ZŠA i toje, ci sapraŭdy možna sumiaščać pracu z maciarynstvam1414
Kamientary
[Zredahavana]