Hienieralnaja asambleja AAN padtrymała rezalucyju, jakaja zaklikaje admovicca ad tradycyjnaj karty śvietu — prajekcyi Mierkatara — i vykarystoŭvać karty, jakija bolš dakładna pieradajuć realnyja płoščy kantynientaŭ i krain, najpierš Afryki, Hrenłandyi i Rasii.
Za rezalucyju prahałasavali 164 krainy, jašče šeść ustrymalisia. Suprać vystupili tolki ZŠA. Amierykanski pradstaŭnik nazvaŭ dakumient niepatrebnym.
Prajekcyju Mierkatara fłamandski kartohraf Hierard Mierkatar stvaryŭ u 1569 hodzie. Jana pieršapačatkova pryznačałasia dla marskoj navihacyi, tamu dazvalała zachoŭvać pravilnaje značeńnie vuhłoŭ i azimutaŭ na karcie.
Adnak takaja prajekcyja mocna skažaje pamiery terytoryj. Čym dalej ad ekvatara znachodzicca peŭnaja miascovaść, tym bolšaj jana vyhladaje na karcie ŭ paraŭnańni z realnymi pamierami. Naprykład, Hrenłandyja na karcie Mierkatara zdajecca amal takoj ža vialikaj, jak Afryka, choć nasamreč Afryka prykładna ŭ 14 razoŭ bolšaja.
Rezalucyju ab admovie ad tradycyjnaj karty śvietu prapanavała afrykanskaja dziaržava Toha, a jaje padtrymali krainy Afrykanskaha sajuza.
Kampanija #CorrectTheMap, jakuju ŭ 2025 hodzie padtrymaŭ Afrykanski sajuz, vystupaje za vykarystańnie bolš dakładnaj prajekcyi Equal Earth, stvoranaj u 2018 hodzie.
U pietycyi kampanii adznačajecca, što na terytoryi Afryki možna było b raźmiaścić ZŠA, Kitaj, Indyju, Japoniju, Mieksiku i bolšuju častku Jeŭropy, i pry hetym jašče zastałosia b volnaje miesca. Pietycyja ŭžo sabrała bolš za 11 tysiač podpisaŭ.
Jak adznačaje vydańnie The Guardian, rezalucyja Hienieralnaj asamblei AAN nie maje abaviazkovaj siły. Adnak jaje pryniaćcie moža paŭpłyvać na školnyja prahramy i karty, jakimi ludzi karystajucca ŭ štodzionnym žyćci.
Ministr zamiežnych spraŭ Francyi Žan-Nael Baro ŭžo zajaviŭ, što Francyja admovicca ad kartaŭ Mierkatara na karyść prajekcyj, adaptavanych da kankretnych zadač. Pavodle jaho, takija karty bolš dakładna pieradajuć sapraŭdnyja płoščy i adpaviadajuć rekamiendacyjam kartohrafaŭ i navukoŭcaŭ.
Urad Toha płanuje pravieści ŭ stalicy krainy Łamie mierapryjemstva z udziełam JUNIESKA i Google Maps, kab raspracavać płan realizacyi rezalucyi.
Afryka patrabuje stvaryć novuju kartu śvietu
U krainach Afryki čutki pra «kradziež hienitalij» pryviali da dziasiatkaŭ zabojstvaŭ
Rasijski «Afrykanski korpus» dapamoh miascovaj chuncie zadušyć sprobu vajskovaha pieravarotu ŭ Nihiery
Čałaviectva takoje hienietyčna raznastajnaje dziakujučy śmiarotnaj malaryi, jakaja tysiačahodździami dzialiła Afryku na izalavanyja rehijony
Ciapier čytajuć
Julijana Šamietaviec z «Kibierpartyzanaŭ» stała maci — raskazvaje pra dekretny adpačynak u ZŠA i toje, ci sapraŭdy možna sumiaščać pracu z maciarynstvam1414
Kamientary