U Polščy šyracca biełaruskamoŭnyja słužby ŭ kaściołach. Dzie i kali ich možna naviedvać?

Nabaženstvy pa-biełarusku ŭ Polščy byli i raniej, da 2020 hoda i masavaj emihracyi biełarusaŭ, asabliva ŭ Varšavie i Lublinie. Ale ž paśla pačatku pratestaŭ baraćba za malitvu na rodnaj movie ŭzmacniłasia. «Pryjechała nadta šmat ludziej, u tym liku i aktyŭnych katalikoŭ. Uźnikła patreba malicca jak doma — pa-biełarusku, sa svaimi ludźmi, i tyja razavyja słužby, što adbyvalisia raniej, pačali rabić pastajannymi, kožnuju niadzielu», — kaža Arciom Tkačuk.

Arciom padkreślivaje, što inicyjatyva biełaruskamoŭnych nabaženstvaŭ sychodziła źnizu. Ludzi kidali zaklik i sami vyrašali pytańnie, šukali śviataroŭ.

Ciapier, tłumačyć Tkačuk, na biełaruskich nabaženstvach słužać dva typy śviataroŭ: polskija śviatary, što niekali słužyli ŭ našaj krainie, i śviatary-biełarusy, što vymušanyja byli źjechać pa palityčnych pryčynach.

Aktyvist raskazvaje, što imknieńnie da takich słužb źviazanaje nie tolki z daemihracyjnymi zvyčkami: «Biełarusy pryjazdžajuć sa svaimi psichałahičnymi traŭmami, u davoli drennym stanie. U polskich parafijach ludziam časam ciažka zrazumieć, čamu my vyjechali i što ŭ nas adbyłosia, što takoje pieratrus i zatrymańnie. Dy i sam dośvied emihracyi nie pa svajoj voli ciažki — bahata ludziej zmahajecca z depresijaj, nie moža znajści siabie i pačać pracavać. Biełarusy pačali arhanizoŭvać takija słužby jašče i tamu, što im chaciełasia dzialicca niečym, być u svaim kole».

Ciapier słužby adbyvajucca ŭ siami haradach Polščy — Varšavie, Krakavie, Hdańsku, Biełastoku, Łodzi, Urocłavie, Lublinie. Štotydzień na ich prychodzić nie mienš za niekalki dziasiatkaŭ čałaviek, a to i sotnia, u śviaty parafijan našmat bolš.

Arciom padkreślivaje, što, vierahodna, nie ŭsie biełarusy jašče viedajuć pra takuju mahčymaść, a kamuści, moža, zručniej chadzić u polskamoŭny kaścioł.

Nie ŭsie razumiejuć kaštoŭnaść słužby na svajoj movie i ŭ svaim asiarodździ, ludziam praściej naviedvać polskuju parafiju. Tkačuk zhadvaje dziasiatki historyj, kali biełarusy paśla polskaha kaścioła traplali na słužbu na rodnaj movie i adhukalisia pra jaje słovami «Vaŭ, nibyta doma pabyvaŭ!», płakali, jak čuli bohasłužbovyja himny pa-biełarusku.

Arciom nazyvaje i jašče adnu prablemu, jakaja zaminaje źbirać bolš ludziej na biełaruskamoŭnych słužbach: «Biełaruś — napeŭna, nie asabliva vierujučy kraj, i kataliki — heta mienšaść, moža, i mienšaść siarod tych, chto vyjechaŭ».

Ale jon zaklikaje dałučacca da słužbaŭ nie tolki z relihijnych mierkavańniaŭ — heta mahčymaść pabyć siarod svaich. 

Raskład nabaženstvaŭ 

Varšava, płošča Troch Kryžoŭ, kaścioł sv. Alaksandra, dolny chram (uvachod z vulicy schodami ŭniz)

Śviataja Imša — paniadziełak i čaćvier, 18:00

Śviataja Imša: niadziela i ŭračystaści — 11:30 i 18:00

Hdańsk, 80-894 ELŻBIETAŃSKA 9/10, parafija sv. Juzafa

Śviataja Imša — niadziela, 14:30

Urocłaŭ (WROCŁAW — BROCHÓW), 52-115 UL. BIEGŁA 3, parafija sv. Hieorhija Mučanika i Uzvyšeńnia śviatoha Kryža

Śviataja Imša — kožnaja druhaja niadziela miesiaca, 15:00

Lublin, ul. Krakowskie Przedmieście 42, Klasztor zakonu braci mniejszych kapucynów

Śviataja Imša — kožnaja treciaja niadziela miesiaca (kastryčnik-červień), 14:30

Krakaŭ, 30-715 ul. Saska 2, parafija Najśviaciejšaha Serca Pana Jezusa

Śviataja Imša — niadziela, 14:30

Łodź, 90-001 ul. Ogrodowa 2, parafija sv. Juzafa

Śviataja Imša — niadziela, 14:00

Biełastok, ul. Wroclawska 8, parafija Maci Božaj Hvadełupskaj

Raskład słužbaŭ pakul dapaŭniajecca, infarmacyju možna šukać tut.

Za źmienami i inšaj nieabchodnaj infarmacyjaj pa biełaruskamoŭnych słužbach u Polščy možna sačyć tut.

U Biełastoku źjavilisia katalickija nabaženstvy pa-biełarusku

«Tolki dziejańnie ratuje». Spytali ŭ viadomych biełarusaŭ, jak pieražyć hetyja časy

Ułady zabirajuć u viernikaŭ Čyrvony kaścioł. Što budzie dalej?

• 17
• 0
• 0
• 0
• 0
• 1
• 0
• 0