Daradca Cichanoŭskaj paabiacaŭ dziejničać zahadzia ŭ vypadku zabarony rasijanam turystyčnych viz u ES
Dyskusija pra toje, ci varta całkam zakryć Jeŭropu dla hramadzian Rasii, znoŭ nabiraje abaroty. Pradstaŭniki niamieckaha Chryścijanska-demakratyčnaha sajuza (CHDS) na čale z kancleram Hiermanii Frydrycham Miercam vystupili za poŭnuju zabaronu turystyčnych viz dla hramadzian Rasii. Adnačasova hrupa z adzinaccaci jeŭrapiejskich krain zaklikała Brusiel zrabić ahulnajeŭrapiejskija praviły vydačy šenhienskich viz jašče bolš strohimi.
U biełarusaŭ uźnikaje pytańnie, jakoje ŭžo nieadnarazova hučała paśla pačatku poŭnamaštabnaj vajny: ci nie mohuć novyja miery rana ci pozna zakranuć i nas?
Jeŭropa rychtuje novy etap abmiežavańniaŭ
Paśla pačatku poŭnamaštabnaj vajny Rasii suprać Ukrainy Jeŭrasajuz užo značna ŭskładniŭ atrymańnie šenhienskich viz dla rasijan. U 2022 hodzie było całkam prypyniena dziejańnie pahadnieńnia ab spraščeńni vizavaha režymu pamiž ES i Rasijaj. Heta zrabiła praceduru doŭhaj, darahoj i składaniejšaj.
U listapadzie 2025 hoda Jeŭrakamisija pajšła jašče dalej: rasijanie faktyčna stracili mahčymaść atrymlivać šmatrazovyja šenhienskija vizy. Ciapier u bolšaści vypadkaŭ im treba padavacca na novuju vizu pierad kožnaj pajezdkaj.
U pačatku červienia Šviecyja, Litva, Łatvija, Estonija, Polšča, Danija, Finlandyja, Čechija, Niderłandy, a taksama Isłandyja i Narviehija vystupili za novyja abmiežavańni dla rasijskich turystaŭ. Ich arhumient — pytańni biaśpieki i nieabchodnaść pazbavić rasijan mahčymaści spakojna jeździć u Jeŭropu, pakul praciahvajecca vajna va Ukrainie.
U Brusieli ŭžo paćvierdzili, što rychtujuć novyja prapanovy pa ŭzmacnieńni vizavaha režymu dla hramadzian Rasii. Praŭda, pakul havorka idzie pra metavyja abmiežavańni, a nie pra poŭnuju zabaronu.
Ci mohuć pad udar trapić biełarusy?
Pakul što nijakich rašeńniaŭ adnosna hramadzian Biełarusi niama.
Daradca Śviatłany Cichanoŭskaj pa pytańniach dypłamatyi Dzianis Kučynski adznačyŭ u kamientary «Našaj Nivie», što apošnija hady Jeŭrasajuz paśladoŭna prytrymlivajecca pryncypu adździaleńnia biełaruskaha naroda ad režymu Łukašenki i biełarusaŭ ad rasijan.
«Heta adzin z najvažniejšych vynikaŭ pracy demakratyčnych sił paśla lutaha 2022 hoda — nam udałosia danieści da jeŭrapiejskich partnioraŭ, što Biełaruś i biełarusy nie roŭnyja režymu, jaki słužyć Kramlu i ŭciahvaje našu krainu ŭ čužuju vajnu», — adznačaje jon.
Razam z tym Dzianis Kučynski pryznaje: pavodziny biełaruskaha režymu robiać takija dyskusii ŭsio bolš składanymi.
«Padtrymka rasijskaj ahresii, hibrydnyja ataki suprać susiedziaŭ, vykarystańnie mihracyi jak zbroi, zasyłańnie ahientaŭ u krainy ES i stvareńnie pahroz dla nacyjanalnaj biaśpieki praciahvajuć stvarać dadatkovyja ryzyki. Tamu pytańnie zachavańnia asobnaha padychodu da biełarusaŭ patrabuje pastajannaj uvahi i pracy z našymi jeŭrapiejskimi partniorami», — kaža daradca Cichanoŭskaj.
Pavodle jaho słoŭ, ciapier niama nijakich rašeńniaŭ ab raspaŭsiudžvańni mahčymych novych abmiežavańniaŭ dla rasijan na hramadzian Biełarusi.
«My budziem i nadalej nastojvać, što biełarusaŭ nielha karać za dziejańni nielehitymnaha režymu. Naadvarot, mahčymaść vyjazdžać u Jeŭropu, atrymlivać adukacyju, padtrymlivać suviazi z demakratyčnym śvietam — heta inviestycyja ŭ budučyniu svabodnaj Biełarusi», — padkreśliŭ Dzianis Kučynski.
Dla mnohich biełarusaŭ šenhienskaja viza daje mahčymaść vučycca, pracavać, padtrymlivać suviaź z rodnymi, udzielničać u mižnarodnych prajektach, atrymlivać abaronu ad pieraśledu abo prosta nie apynucca adrezanymi ad Jeŭropy. Tamu lubaja novaja dyskusija pra vizavyja abmiežavańni vyklikaje tryvohu.
Dzianis Kučynski kaža, što ŭžo ŭ najbližejšy čas płanuje abmierkavać hetaje pytańnie ź niamieckimi palitykami: «Ja budu mieć kansultacyi ź niamieckimi kalehami i abaviazkova ŭzdymu hetaje pytańnie ŭ svaich razmovach, u tym liku z kamandaj kanclera i partyjaj CHDS. Važna, kab Hiermanija i nadalej zachoŭvała adkrytaść dla biełarusaŭ».
Darečy, Hiermanija zastajecca adnoj z najvažniejšych krain Šenhienskaj zony dla biełarusaŭ. Pavodle dadzienych niamieckaj ambasady ŭ Minsku, u 2025 hodzie biełarusam było vydadziena kala 42 tysiač šenhienskich viz, što robić Hiermaniju adnym z hałoŭnych vizavych kirunkaŭ dla hramadzian Biełarusi.
Ciapier čytajuć
Zornaja biełaruskaja intelektuałka pajšła na realici ad TNT — budzie plaści intryhi, kab atrymać 100 tysiač jeŭra8
Kamientary
Małajcy !
Chaj siabie bierahuć, bo ciažkaja pierapracoŭka moža adbicca na zdaroŭji.